الماتى قالاسى وڭىرلىك كوممۋنيكاسيالار قىزمەتى سىر ەلىندە وتكەن V ۇلتتىق قۇرىلتاي تورىنەن تابىلعان تۇلعالارمەن سۇحباتتاسىپ، ولاردىڭ القالى جيىندا كوتەرىلگەن نەگىزگى تاقىرىپتار مەن باستامالار جونىندەگى پىكىرلەرىن بىلگەن بولاتىن.
دارحان ءقىدىرالى، پارلامەنت سەناتىنىڭ دەپۋتاتى:
قۇرىلتايدا بۇگىنگى كۇنى جۇرگىزىلىپ جاتقان رەفورمالاردىڭ ساباقتاستىعىنا نازار اۋدارىلدى. ماسەلەن، جاڭا كونستيتۋسيا مەن پارلامەنتتىك وزگەرىستەردى تالقىلاۋ – رەفورمالاردىڭ زاڭدى جالعاسى. ءيا، وتىرىستا ەلدىڭ بولاشاعى مەن ونىڭ نەگىزگى زاڭىنا قاتىستى تالاي ماڭىزدى نارسە ايتىلدى، تالاي دۇنيە قوزعالدى وسى جولى. بۇل قازىرگى زامانعى سىن-قاتەرلەر مەن قوعام سۇرانىسىنا تولىقتاي جاۋاپ بەرەرى ءسوزسىز.
مۇرات ابەنوۆ، پارلامەنت ءماجىلىسىنىڭ دەپۋتاتى:
بانكتەر ءقازىر بەرەشەك ادامنىڭ ەسەپشوتىن تولىق بۇعاتتاي الادى. بۇل ازاماتتاردىڭ قۇقىعىن شەكتەۋ دەگەن ءسوز. مۇندايدى نە مۇلدەم الىپ تاستاۋ كەرەك، نە تابىستىڭ 50 پايىزىنان اسپايتىنداي ەتىپ شەكتەۋ قاجەت. قۇرىلتايدىڭ سەكسيالىق وتىرىستارىندا مەديسينا، مەكتەپتەردى جاراقتاندىرۋ مەن ەڭبەك قاتىناستارى ماسەلەلەرى دە تالقىلاندى.
اسقار جۇمادىلدايەۆ، اكادەميك:
مەملەكەت باسشىسى قازاقتى تەحنوكرات ۇلت بولۋعا ۇندەپ ءجۇر. وكىنىشكە قاراي، ءقازىر ءبىزدىڭ قوعام جاساندى ينتەللەكتىنىڭ نە ەكەنىن بىلگەنىمەن، ول تۋرالى ءالى دە تەرەڭ بىلە بەرمەيدى ەكەن. جاساندى ينتەللەكتىنى دامىتقاندا ول تۋرالى ءبىلىم بەرىپ، ونىڭ پايدالى جانە زياندى جاعىن دا قاتار وقىتۋىمىز كەرەك.
ديليارا قايداروۆا، پروفەسسور، ۇعا اكادەميگى:
سەكسيالىق وتىرىستا عىلىمدى دامىتۋعا قاتىستى جۇيەلى ماسەلەلەردى، اتاپ ايتقاندا عىلىمي جۋرنالداردىڭ ساپاسى مەن ۇلتتىق عىلىم اكادەمياسىنىڭ قامقورلىعىمەن جوعارى يمپاكت-فاكتورى بار ءبىرىڭعاي عىلىمي باسىلىم قۇرۋ قاجەتتىلىگى ايتىلدى. سونىمەن قاتار، بالالار اراسىنداعى سەمىزدىككە نازار اۋدارىپ، ولاردى ەرتە جاستان سالاۋاتتى ءومىر سالتىنا شاقىرىپ، سونداي مادەنيەتى قالىپتاستىرۋعا باعىتتالعان مەملەكەتتىك باعدارلاما ازىرلەۋدى ۇسىندىق.
انار فازىلجانوۆا، احمەت بايتۇرسىن ۇلى اتىنداعى ءتىل ءبىلىمى ينستيتۋتىنىڭ ديرەكتورى:
ۇلتتىق قۇرىلتايدىڭ وسى جولى سىر وڭىرىندە ءوتۋىنىڭ سيمۆولدىق ءمانى بار دەر ەدىم. ءبىزدىڭ لينگۆيستەر ەلىمىزدىڭ ءار وڭىرىندەگى تىلگە بايلانىستى جاعدايدى ۇنەمى زەرتتەپ وتىرادى. وسى جولعى ساۋالنامادا قىزىلوردا وبلىسى مەملەكەتتىك ءتىلدى مەڭگەرۋ دەڭگەيى جاعىنان دا ەڭ جوعارى كورسەتكىشكە يە بولعانىن بايقادىق. وسى ورايدا ءوڭىر تۇرعىندارىنا قازاق تىلىنە دەگەن قۇرمەتى ءۇشىن العىس بىلدىرگىم كەلەدى.
سىرىمبەك تاۋ، كاسىپكەر:
شاعىن جانە ورتا بيزنەس بەس ميلليونداي ادامدى جۇمىسپەن قامتىپ وتىرعانىمەن، كاسىپكەرلەر ءقازىر قارجى جاعىنان قاتتى قيىندىق كورۋدە. مىسالى، ءبىز نەسيەنى 25 پايىزبەن الامىز، 15 پايىزىن ونلاين-پلاتفورمالارعا تولەيمىز، 16 پايىز قوسىلعان قۇن سالىعى، بۇدان بولەك باسقا دا شىعىندار بار. سودان كاسىپكەرگە تۇسەتىن جۇكتەمە شامامەن، 78 پايىزعا جەتەدى. بۇل بيزنەستى قولداۋ ەمەس، ونىڭ مۇمكىندىكتەرىن شەكتەۋ. وسى ماسەلەنىڭ كۇن تارتىبىنە شىققانى ابزال.
قۇرىلتايعا قاتىسۋشىلاردىڭ پىكىرىنشە، بيلىك پەن ساراپشىلار قاۋىمداستىعى اراسىنداعى «اشىق ديالوگ» فورماتى وسىنداي وزەكتى ماسەلەلەردى كوتەرىپ، ەلدىڭ ۇزاق مەرزىمدى دامۋىنا، قوعامنىڭ ناقتى سۇرانىسىنا باعىتتالعان شەشىمدەر قابىلداۋعا مۇمكىندىك بەرەدى.