ءماجىلىس دەپۋتاتى اسحات ايماعامبەتوۆ الەۋمەتتىك جەلىدەگى بەلسەندىلىگىنە قاتىستى جاڭا شەشىم قابىلداعانىن ايتتى ، - دەپ حابارلايدى aqshamnews.kz ءتىلشىسى.
ونىڭ ايتۋىنشا، بۇل ويدى ءۇش جىل بويى تارازىلاپ، ارىپتەستەرىمەن تالقىلاعان، بارلىق تاۋەكەل مەن مۇمكىندىكتى ەسەپكە العان. سونىڭ ناتيجەسىندە بيىلدان باستاپ جەكە YouTube-ارناسىن بەلسەندى جۇرگىزىپ، كورەرمەنگە پايدالى كونتەنت ۇسىنۋدى جوسپارلاپ وتىر.
دەپۋتاتتىڭ سوزىنشە، ارنانىڭ باستى ماقساتى – زاڭداردى حالىققا تۇسىنىكتى، قاراپايىم تىلمەن جەتكىزۋ. ياعني جاڭا زاڭ جوبالارىنىڭ نە ءۇشىن قاجەت ەكەنى، ازاماتتارعا بەرەر پايداسى، سونداي-اق قابىلدانعان نورمالاردىڭ تاجىريبەدە قالاي ىسكە اساتىنى اشىق تۇسىندىرىلمەك.
ايماعامبەتوۆ ارنا مازمۇنى تەك زاڭ شىعارۋ تاقىرىبىمەن شەكتەلمەيتىنىن دە اتاپ وتكەن. وندا:
-
قابىلدانعان زاڭداردىڭ ورىندالۋ بارىسى،
-
پارتيالىق باعدارلامالار اياسىنداعى جۇمىستار،
-
ءوز تاجىريبەسىنە سۇيەنگەن سالالىق تالداۋلار قامتىلادى.
تاقىرىپتاردى كەڭىرەك اشۋ ءۇشىن ول ساراپشىلار مەن ارنايى قوناقتاردى شاقىرۋدى كوزدەپ وتىر. ءقازىردىڭ وزىندە ارنادا ءبىرقاتار ارحيۆتىك ماتەريال بار، ال الداعى ۋاقىتتا جاڭا ۆيدەولار تۇراقتى تۇردە جاريالانىپ تۇرادى.