وڭىرلىك كوممۋنيكاسيالار قىزمەتى الاڭىندا وتكەن باسپا ءسوز كونفەرەنسياسىندا الماتى قالاسى سپورت باسقارماسىنىڭ باسشىسى دارحان نۇرحان ۇلى بەيىمدى سپورتتى دامىتۋ مەن ەرەكشە قاجەتتىلىگى بار ادامداردىڭ دەنە شىنىقتىرۋمەن اينالىسۋىنا جاعداي جاساۋ تۋرالى باياندادى.
الماتىدا بەيىمدى سپورت «الماتى» سپورت كلۋبىنىڭ بازاسىندا دامىپ جاتىر. بۇل قالاداعى وسىنداي جالعىز مەملەكەتتىك مامانداندىرىلعان كلۋب. ءقازىر مۇندا دەنساۋلىعىندا كىناراتى بار 756 سپورتشى جاتتىعادى ەكەن.
8 بولىمشە جۇمىس ىستەيتىن كلۋبتا پاراليمپيادالىق، سۋردليمپيادالىق، ۇلتتىق جانە ينكليۋزيۆتى باعىتتاردى قوسا العاندا، سپورتتىڭ 23 ءتۇرى بار. بارلىعىن بىلىكتى ماماندار جاتتىقتىرادى، ساباقتارى دا تەگىن وتەدى.
2025 جىلدىڭ قورىتىندىسى بويىنشا «الماتى» كلۋبىنىڭ سپورتشىلارى جوعارى ناتيجە كورسەتتى. ولارعا 438 سپورتتىق اتاق بەرىلىپ، ءارتۇرلى دەڭگەيدەگى 48 جارىستا 462 مەدال جەڭىپ العان. جالپى مەدال قورجىنىندا 180 التىن، 142 كۇمىس پەن 140 قولا جۇلدە بار. بۇل جۇيەلى جۇمىستىڭ ارقاسى.
ماڭىزدى وقيعانىڭ ءبىرى – كلۋبتىڭ 12 وكىلىنىڭ توكيودا وتكەن XXV جازعى سۋردليمپيادا ويىندارىنا قاتىسۋى بولدى. بۇل جارىستا الماتىلىق سپورتشىلار 2 كۇمىس پەن 2 قولا مەدال جەڭىپ الىپ، قالامىز بەن ەلىمىزدى حالىقارالىق ارەنادا الەمگە ايگىلەپ، لايىقتى تۇردە تانىتىپ قايتتى.
الماتىدا بەيىمدى سپورتتى ودان ءارى دامىتۋ ماقساتىندا الماتى قالاسىنىڭ اكىمىنىڭ تاپسىرماسىمەن رايىمبەك داڭعىلى، 312 مەكەنجايىندا ينكليۋزيۆتى سپورت ورتالىعى دا سالىنا باستادى. 21 سپورت تۇرىنە ارنالعان سپورت كەشەنى ءبىر اۋىسىمدا 100 ادامعا دەيىن قابىلدايدى.
جوبانىڭ جۇزەگە اسۋى پاراليمپيادالىق، سۋردليمپيادالىق جانە ينكليۋزيۆتى سپورتپەن اينالىسۋ مۇمكىندىكتەرىن ەداۋىر كەڭەيتىپ، بارلىق ساناتتاعى سپورتشىلارعا جاعداي جاساپ، تەڭ مۇمكىندىك بەرەدى.
سونداي-اق 2017 جىلدان بەرى الماتىدا ءاۋتيزمنىڭ بەلگىسى بار بالالارعا ارنالعان تاۋ شاڭعىسىمەن بەيىمدى سىرعاناۋ جوباسى دا جۇزەگە اسىپ كەلە جاتقانى ايتىلدى. بۇل جوبا ءقازىر تۇراقتى سۇرانىسقا يە بولىپ وتىر.
ساباقتار بالالاردىڭ قيمىل-قوزعالىس ۇيلەسىمدىلىگىن، الەۋمەتتەنۋ داعدىلارىن جانە وزىنە دەگەن سەنىمدىلىگىن دامىتۋعا كومەكتەسىپ، ولاردىڭ جان-جاقتى دامۋى ءۇشىن ءقاۋىپسىز ءارى قولداۋشى ورتا قالىپتاستىرادى.
ءسوز سوڭىندا دارحان نۇرحان ۇلى بەيىمدى سپورتتى دامىتۋ الماتىنىڭ ينكليۋزيۆتى جانە قولجەتىمدى سپورتتىق كەڭىستىگىن قالىپتاستىرۋعا باعىتتالعان سپورت ساياساتىنداعى باسىم باعىت بولىپ قالا بەرەتىنىن اتاپ ءوتتى.