23 جاسىندا الەمنىڭ ەڭ ۇزدىك ۋنيۆەرسيتەتتەرىنىڭ ءبىرى - وكسفوردتان شاقىرتۋ العان قازاقستاندىق قىز جايلى بىلەسىز بە؟ كىشكەنتايىنان عىلىم جولىندا ەڭبەك ەتۋدى ارمانداعان مەرۋەرت ەسىمدى اقتاۋلىق ارۋ ءوزىنىڭ ءبىلىم جولىنداعى قىزىقتى وقيعالارىن اڭگىمەلەپ بەردى. تولىعىراق اqshamnews.kz دايىنداعان ماتەريالدا.
سۋرەت: كەيىپكەردىڭ جەكە ارحيۆىنەن
مەرۋەرت بيجانوۆا - The Ivy League (سەگىز جەكە امەريكاندىق ۋنيۆەرسيتەتتەردىڭ قاۋىمداستىعى - ەسك.) تىزىمىندەگى پەنسيلۆانيا ۋنيۆەرسيتەتىن ءتامامداپ، جاقىندا انگلياداعى وكسفورد ۋنيۆەرسيتەتىنەن شاقىرتۋ الدى. سونداي-اق، ول پەنسيلۆانيا ۋنيۆەرسيتەتىنىڭ ەڭ جوعارى ماراپاتى – Penn Global Student Citizenship Award 2025 سىيلىعىنىڭ يەگەرى دەپ تانىلدى. بۇل سىيلىق – حالىقارالىق ستۋدەنتتەردىڭ اراسىندا جاھاندىق ازاماتتىققا ايرىقشا ۇلەس قوسقان جاستارعا عانا بەرىلەتىن ەرەكشە ماراپات.
"اتا-انام بىلىمىمىزگە كوپ كوڭىل ءبولدى"
مەرۋەرت بالا كەزىنەن اتا-اناسى بىلىمگە ەرەكشە ءمان بەرگەنىن ايتتى. ولار دۇرىس ينۆەستيسيانىڭ قاشان دا بىلىمگە قۇيىلۋ كەرەكتىگىن تۇسىنگەن.
"مەن - اقتاۋ قالاسىنىڭ تۋماسىمىن. اكەم - ينجەنەر-ماشينيست، انام - پسيحولوگ. ءبىر جاس ۇلكەن اپكەم جانە وزىمنەن التى جاس كىشى ءىنىم بار. بىزگە اتا-انامىز ۇنەمى ءبىلىمنىڭ قۇنىن ءتۇسىندىردى. بۇكىل ينۆەستيسيانى ءبىزدىڭ وقۋىمىزعا جۇمسادى. اپكەم ەكەۋمىز جارىسىپ ساباق وقيتىنبىز جانە اتا-انامىز ءۇي تاپسىرماسىن ورىنداۋعا ۇنەمى قولداۋ كورسەتەتىن. سول تاربيە مەنى قاناتتاندىردى. كىشكەتايىمنان عىلىمعا، بىلىمگە قۇشتار بولدىم. اتا-انام ماعان "ءمۇعالىم بول" دەيتىن. مەن جوعارى وقۋ ورنىندا ساباق بەرسەم دەپ ارماندايتىنمىن"، - دەيدى ول.
سۋرەت: كەيىپكەردىڭ جەكە ارحيۆىنەن
نازاربايەۆ ۋنيۆەرسيتەتىنەن پەنسيلۆانياعا دەيىنگى جول
مەرۋەرتتىڭ ايتۋىنشا، ارمانعا اپارار جول اقتاۋداعى "دارىن" مەكتەبىنەن باستالىپ، نازاربايەۆ زياتكەرلىك مەكتەبىندە جالعاسقان.
"ءنزم-نىڭ حيميا-بيولوگيا باعىتىندا وقىدىم. ول مەكتەپ ماعان اسقاق ارمان قويۋدى، جاھاندىق دەڭگەيدە ويلاۋدى ۇيرەتتى. ال كەيىن نزم-نەن كەيىن نازاربايەۆ ۋنيۆەرسيتەتىنە وقۋعا ءتۇستىم. نۋ-دا پروفەسسورلارىمىز ءبىزدى عالىم رەتىندە قالىپتاستىرۋعا تىرىستى. عىلىمعا قىزىعۋشىلىعىم تەرەڭدەي بەردى. ءۇشىنشى كۋرستا ءجۇرىپ مەن شەتەلدە وقۋ مۇمكىندىكتەرىن قاراستىردىم. وقىتۋشىلارىم بۇل نيەتىمە قولداۋ ءبىلدىردى. وقۋعا تاپسىرىپ، اقش-تىڭ، كانادانىڭ، ۇلىبريتانيانىڭ بىرنەشە جوو-لارىنا قابىلداندىم. ءبىراق The Ivy League ۋنيۆەرسيتەتتەرىنىڭ قاتارىنداعى پەنسيلۆانياعا قۇجات تاپسىرۋدى ۇيعاردىم. ماعان ونداعى اكادەميالىق ەركىندىك، مىقتى ورتا ۇنادى"، - دەيدى مەرۋەرت.
پەنسيلۆانيادا مەرۋەرت ءوزىن تولىق دالەلدەۋ ءۇشىن كوپ ەڭبەكتەنگەنىن ايتادى. ول جەتى مارتە پرەميا الىپ، حالىقارالىق ستۋدەنتتەر ءىسى جونىندەگى كوميتەتتىڭ پرەزيدەنتى بولىپ سايلاندى.
"ءبىر ساتتە 20 مىڭعا جۋىق ماگيسترانت، دوكتورانت ستۋدەنتتەردىڭ اراسىنان مەنى پرەزيدەنت ەتىپ سايلادى. بۇل - ەڭ الدىمەن زور ەڭبەك پەن ماسەلەلەردى جان-جاقتى قاراستىرا الاتىن قاسيەتىمنىڭ ارقاسى دەپ ويلايمىن"، - دەيدى ول.
سۋرەت: كەيىپكەردىڭ جەكە ارحيۆىنەن
"مەنىڭ ارتىمدا ەلىم تۇر" دەگەن ۇستانىم بولدى"
مەرۋەرت قانداي قادامعا بارسا دا ءبىرىنشى كەزەكتە قازاقستاننىڭ اتىنا كىر كەلتىرمەۋدى ويلاپ تۇراتىنىن جاسىرمادى. ول ءوزىن بارىنشا دالەلدەۋگە تىرىسىپ، شەتەلدىكتەر اراسىندا قازاقستاندىق جاستار جايلى ءپوزيتيۆتى پىكىر قالىپتاستىرۋدى ماقسات ەتكەن.
"مەن قايدا جۇرسەم دە "مەنىڭ ارتىمدا ەلىم تۇر" دەگەن ۇستانىم بولدى. نە ىستەسەم دە، جاقسىلىق جاساسام دا، جاماندىق جاساسام دا، ول ەرتەڭ مەنىڭ ەلىمنىڭ اتىنا جازىلادى دەپ تۇسىنەمىن. سول سەبەپتى بار كۇشىم قازاقتىڭ ابىرويىن كوتەرۋگە باعىتتالدى. پەنسيلۆانيادا قازاقستاندىق ستۋدەنتتەر از. مەنەن كەيىن قازاق جاستارى قۇجات تاپسىرسا، "وو، ءبىز قازاقتاردى بىلەمىز، ولار ءبىلىمدى" دەگەن تۇسىنىك قالىپتاسسا، بۇل – مەن ءۇشىن ۇلكەن جەڭىس"، - دەيدى مەرۋەرت.
سۋرەت: كەيىپكەردىڭ جەكە ارحيۆىنەن
"وكسفوردقا تۇسەتىنىمە سەنبەدىم"
مەرۋەرت وكسفورد ۋنيۆەرسيتەتىنەن شاقىرتۋ العان ءساتىن ەرەكشە تولقىنىسپەن ەسكە الدى.
"عالىم بولعىم كەلدى. سول ارماننىڭ جولىندا تىنىمسىز ەڭبەك ەتتىم. حالىقارالىق جوعارى ءبىلىمدى دامىتۋ ماماندىعى بويىنشا وكسفوردتان شاقىرتۋ الدىم. عىلىمي جەتەكشىلەرىم، مىقتى پروفەسسورلار مەنىڭ ءبىلىمىمدى بارلىق جاعىنان سىنادى. ەمتيحان كەزىندە وتە كۇردەلى عىلىمي سۇراقتار قويىلدى. مەن تۋرالى الدىن الا ىزدەپ وقىپ تا شىققان ەكەن. ناتيجەسىندە شاقىرتۋ العانىما ءوزىم دە ءبىرازعا دەيىن سەنبەدىم. ەندى وكسفوردتا دوكتورانتۋرادا ىزدەنىسىمدى جالعاستىرامىن"، - دەيدى مەرۋەرت.
ايتا كەتەيىك، وكسفورد ۋنيۆەرسيتەتى – الەمدەگى ەڭ ەجەلگى جانە ەڭ بەدەلدى وقۋ ورىندارىنىڭ ءبىرى. ول XII عاسىردا قۇرىلعان. QS World University Rankings جانە Times Higher Education سياقتى حالىقارالىق رەيتينگتەردە وكسفورد ۇزدىك ۇشتىكتەن تۇسپەيدى. مۇندا الەمنىڭ تۇكپىر-تۇكپىرىنەن ەڭ ۇزدىك عالىمدار مەن ستۋدەنتتەر ءبىلىم الادى. عىلىم مەن ءبىلىمدى دامىتۋعا قوسقان ۇلەسى ءۇشىن وكسفورد تۇلەكتەرى اراسىندا نوبەل سىيلىعىنىڭ لاۋرەاتتارى مەن الەمدىك دەڭگەيدەگى ساياساتكەرلەر، جازۋشىلار مەن زەرتتەۋشىلەر وتە كوپ.