كولىك تۇگەلدەي جانىپ كەتتى
اقتاۋ قالاسى ماڭىندا ماس جۇرگىزۋشى گاز قۇبىرىنا سوعىلىپ، اۆتوكولىك جانىپ كەتتى، دەپ حابارلايدى Almaty-akshamy.kz قازاقپارات اگەنتتىگىنە سىلتەمە جاساپ.
پوليسيا دەپارتامەنتىنەن تۇسكەن مالىمەتكە قاراعاندا، وقيعا 23 قازان كۇنى بولعان.
ساعات 22.00-دە مۇنايلى اۋدانى پوليسيا بولىمىنە باسقۇدىق اۋىلىندا جول-كولىك وقيعاسىنىڭ بولعانى جونىندە حابار تۇسكەن. كەيىن انىقتالعانىنداي، ۋاز «Patriot» اۆتوكولىگىنىڭ جۇرگىزۋشىسى ماس كۇيىندە گاز قۇبىرىنا سوعىلعان. سونىڭ سالدارىنان اۆتوكولىك پەن گاز قۇبىرى جاندى.
ءورت قۇتقارۋشىلار مەن گاز قىزمەتى قىزمەتكەرلەرىنىڭ كۇشىمەن ءسوندىرىلدى. زارداپ شەككەندەر جوق.
جۇرگىزۋشىگە قاتىستى ق ر اكىمشىلىك قۇقىقبۇزۋشىلىق كودەكسى 608-بابى 3-بولىگىنە سايكەس حاتتاما تولتىرىلدى. بۇل باپ بويىنشا قۇقىق بۇزۋشىعا 20 تاۋلىك مەرزىمگە اكىمشىلىك قاماققا الۋ جانە جەتى جىلعا كولىك قۇرالىن باسقارۋ قۇقىعىنان ايىرۋ جازاسى قاراستىرىلعان.
ەسكە سالا كەتەيىك، بۇدان بۇرىن بقو-دا جول اپاتىنان اۆتوكولىك ىشىندە ەكى ادامنىڭ جانىپ كەتكەنىن جازعان بولاتىنبىز.