سايلاۋعا 16 ملن-نان استام ادام قاتىسقان
وزبەكستاندا وتكەن پرەزيدەنتتىك سايلاۋدىڭ العاشقى قورىتىندىسى بۇگىن تۇستەن كەيىن جاريالانادى. بۇل جونىندە كورشى ەلدىڭ ورتالىق سايلاۋ كوميسسياسىنىڭ ءتوراعاسى مالىمدەدى، دەپ حابارلايدى Almaty-akshamy.kz «حابار 24» تەلەارناسىنا سىلتەمە جاساپ.
جالپى، كەشە وتكەن ساياسي ناۋقاندا 16 ملن-نان استام سايلاۋشى كونستيتۋسيالىق قۇقىعىن پايدالانعان. بۇل – بارلىق داۋىس بەرۋشىنىڭ شامامەن 80،8 پايىزى. بۇگىن بۇلاردىڭ قاتارىنا اقش-تا جۇرگەن وزبەكستان ازاماتتارى دا قوسىلادى. مۇحيتتىڭ ارعى جاعىنداعى سايلاۋ ۋچاسكەلەرى ەڭ سوڭعى بولىپ جابىلدى. جالپى ورتالىق سايلاۋ كوميسسياسىنىڭ مالىمەتىنشە وزبەكستانداعى سايلاۋ دەموكراتيالىق تالاپتارعا ساي ءوتتى. ساياسي ناۋقانعا دەگەن قىزىعۋشىلىق جوعارى بولدى.
«سايلاۋ بارىسىن باقىلاۋ ءۇشىن ۋچاسكەلەرگە 414 كامەرا ورناتىلعان بولاتىن. بۇل ناۋقاننان 1672 ب ا ق وكىلى حابار تاراتتى. تاعى 54 مەملەكەتتەن كەلگەن 1 مىڭعا جۋىق بايقاۋشى داۋىس بەرۋ ءۇردىسىن قاداعالادى. تاعى وزبەكستان تاريحىندا العاش رەت سوتتالعاندار دا ەل پرەزيدەنتىن تاڭداۋ مۇمكىندىگىنە يە بولدى»، - دەيدى وزبەكستان ورتالىق سايلاۋ كوميسسياسىنىڭ ءتوراعاسى زاينيددين نيزامحودجايەۆ.