اقش-تىڭ لۋيسۆيلل قالاسىندا UPS-تىڭ جۇك ۇشاعى اۋەجايدان كوتەرىلگەن سوڭ قۇلاپ، بورتتاعى ءۇش ەكيپاج مۇشەسى مەن جەردەگى ءتورت ادام قازا تاپتى. ون ءبىر ادام اۋىر جارالانعان، - دەپ حابارلايدى Aqshamnews.kz ءتىلشىسى.
اقش-تىڭ كەنتۋككي شتاتى، لۋيسۆيلل قالاسىنداعى مۇحاممەد ءالي اتىنداعى حالىقارالىق اۋەجايدان ۇشىپ شىققان UPS Airlines كومپانياسىنا تيەسىلى McDonnell Douglas MD-11F ۇشاعى اپاتقا ۇشىرادى. اۋە كەمەسى 5X2976 (UPS2976) رەيسىمەن گونولۋلۋ باعىتىنا بەت العان.
العاشقى مالىمەتكە ساي، بورتتاعى ءۇش ەكيپاج مۇشەسىنىڭ بارلىعى قازا تاپقان، جەردە بولعان تاعى ءتورت ادامنىڭ قازاسى راستالدى؛ كەمىندە 11 ادام اۋىر جاراقات العان. وقيعا 2025 جىلعى 4 قاراشادا كەشكى ۋاقىتتا تىركەلدى.
جەرگىلىكتى بيلىك اپات بولعان ايماقتىڭ ماڭىندا ۋلى ءتۇتىن مەن جانارماي توگىلۋ قاۋپىنە بايلانىستى اۋەجايدان شامامەن 8 شاقىرىم راديۋستا shelter-in-place (ورنىندا قالۋ) رەجيمىن ەنگىزدى. كۋاگەرلەر قۋاتتى جارىلىس پەن ونداعان مەترگە كوتەرىلگەن قالىڭ قارا ءتۇتىندى بايقاعانىن ايتادى. اۋەجاي جۇمىسى ۋاقىتشا توقتاتىلدى.
UPS كومپانياسى وقيعانى راستادى جانە تەرگەۋدى اقش-تىڭ كولىك قاۋىپسىزدىگى بويىنشا ۇلتتىق كەڭەسى (NTSB) جەتەكشىلىك ەتەتىنىن حابارلادى. فەدەرالدىق اۆياسيا اكىمشىلىگىنىڭ (FAA) وكىلدەرى اپات ورنىنا كەلىپ، تەكسەرىس جۇرگىزىپ جاتىر. العاشقى دەرەكتەر بويىنشا، ۇشاق ۇشىپ كوتەرىلۋ كەزىندە تەحنيكالىق اقاۋ بولۋى مۇمكىن دەگەن نۇسقا قاراستىرىلىپ جاتىر. تولىق قورىتىندى NTSB تەرگەۋىنەن كەيىن جاريالانادى.