اقش-تا العاش رەت H5N5 شتاممىنداعى قۇس تۇماۋىنان ادامنىڭ قايتىس بولعانى تىركەلدى، دەپ حابارلايدى Aqshamnews.kz ءتىلشىسى. بۇل جاعداي ۆاشينگتون شتاتىندا راستالدى.
دەنساۋلىق ساقتاۋ دەپارتامەنتىنىڭ مالىمەتىنشە، كوز جۇمعان ادام جاسى ۇلكەن جانە اۋىر سوزىلمالى دەرتتەرى بولعان. بۇعان دەيىن H5N5 شتاممى ادامدار اراسىندا كەزدەسپەگەن.
ناۋقاستىڭ ءۇي اۋلاسىندا ءارتۇرلى تۇردەگى ءۇي قۇستارى ۇستالعانى انىقتالدى. قاۋىپسىزدىك ماقساتىندا وتباسى مۇشەلەرىنىڭ دەرەكتەرى جاريالانباي وتىر.
دەنساۋلىق ساقتاۋ ورگاندارى حالىققا ءقاۋىپ دەڭگەيى تومەن ەكەنىن اتاپ ءوتتى. پاسيەنتپەن بايلانىستا بولعان ادامداردىڭ ەشقايسىسىنان ۆيرۋس انىقتالماعان، ادامنان ادامعا جۇعۋ فاكتىلەرى دە تىركەلمەگەن.
سوڭعى جىلدارى قۇس تۇماۋى سۇتكورەكتىلەر اراسىندا دا ءجيى تارالا باستاعان. 2024 جىلى اقش-تىڭ اۋىل شارۋاشىلىعى مينيسترلىگى قۇس تۇماۋىنىڭ كەيبىر جانۋارلاردا دا انىقتالعانىن حابارلاعان ەدى.
CDC دەرەگىنشە، اقش-تا جالپى 70-تەن استام ادامدا جۇقتىرۋ جاعدايى راستالعان (ۆاشينگتونداعى سوڭعى جاعدايدى ەسەپتەمەگەندە). كوپشىلىگى اۋرۋ مالمەن، قۇس فابريكالارىندا نەمەسە جۇقتىرىلعان جانۋارلارمەن جۇمىس كەزىندە ينفەكسيا جۇقتىرعان.
ABC News حابارلاۋىنشا، كوبىنە اۋرۋ جەڭىل سيمپتومدارمەن: كوزدىڭ قىزارۋى، دەنە قىزۋىنىڭ كوتەرىلۋىمەن وتكەن. الايدا كەيبىر ناۋقاستاردا اۋىر بەلگىلەر بايقالعان. بۇعان دەيىن قاڭتار ايىندا اقش-تا قۇس تۇماۋىنان العاشقى ادام ءولىمى تىركەلگەن بولاتىن — ول دا جاسى ۇلكەن، دەنساۋلىعىندا كۇردەلى ماسەلەلەرى بار پاسيەنت ەدى.