اقش بيلىگى شەتەلدىكتەردەن ەلگە ۆيزاسىز كىرۋ الدىندا ولاردىڭ الەۋمەتتىك جەلىلەردەگى تاريحىن جانە باسقا دا جەكە دەرەكتەرىن سۇراۋدى جوسپارلاپ وتىر، دەپ حابارلايدى aqshamnews.kz
اقش بيلىگى شەتەلدىك تۋريستەردەن سوڭعى بەس جىلداعى ونلاين “ءومىرى” تۋرالى مالىمەتتەردى مىندەتتى تۇردە تالاپ ەتۋ مۇمكىندىگىن قاراستىرىپ جاتىر. بۇل ۇسىنىس كەدەندىك جانە شەكارا قىزمەتى تاراپىنان جاريالانعان. باستاما ۆيزاسىز كىرۋ باعدارلاماسى بويىنشا اقش-قا باراتىن 42 ەلدىڭ ازاماتتارىنا اسەر ەتەدى. تىزىمگە ۇلىبريتانيا، فرانسيا، گەرمانيا، وڭتۇستىك كورەيا جانە باسقا دا مەملەكەتتەر كىرەدى.
قازىرگى ءتارتىپ بويىنشا، باعدارلاما قاتىسۋشىلارى ەكى جىلعا رۇقسات بەرەتىن ESTA جۇيەسىن پايدالانادى. ول ءۇشىن بايلانىس دەرەكتەرى مەن 40 دوللار تولەم جەتكىلىكتى. الايدا كەدەندىك جانە شەكارا قىزمەتى مىندەتتى اقپاراتتار ءتىزىمىن ايتارلىقتاي كەڭەيتۋدى ۇسىنىپ وتىر.
قۇجاتقا سايكەس، ءوتىنىش بەرۋشىلەردەن مىناداي دەرەكتەر سۇرالۋى مۇمكىن: سوڭعى ون جىلداعى ەلەكتروندى پوشتا مەكەنجايلارى؛ وتباسى مۇشەلەرى تۋرالى كولەمدى اقپارات؛ سوڭعى بەس جىل ىشىندەگى الەۋمەتتىك جەلىلەردەگى پاراقشالار ءتىزىمى. قىزمەتتىڭ پىكىرىنشە، مۇنداي تەكسەرىس قاۋىپسىزدىكتى كۇشەيتىپ، شەتەلدىكتەردىڭ ەلگە كىرۋىنە قاتىستى تاۋەكەلدەردى دالىرەك باعالاۋعا مۇمكىندىك بەرەدى.
The New York Times سويلەسكەن تۋريستىك يندۋستريا وكىلدەرىنىڭ ايتۋىنشا، بيلىك بۇل ۇسىنىستى جاريالار الدىندا سالامەن كەڭەسپەگەن. ساراپشىلاردىڭ ءبىرى باستامانى «شەتەلدىك ساياحاتشىلارعا باقىلاۋدى ايتارلىقتاي كۇشەيتەتىن شارا» دەپ اتادى.
زاڭگەرلەر دە ەسكەرتۋ جاساپ وتىر: جينالاتىن دەرەكتەر كولەمىن ارتتىرۋ وتىنىشتەردى قاراۋ مەرزىمىن ۇزارتۋى جانە ەلگە كىرگەن كەزدە قوسىمشا تەكسەرىسكە جىبەرىلەتىن تۋريستەردىڭ كوبەيۋىنە اكەلۋى مۇمكىن.