قازاقستان رەسپۋبليكاسىنىڭ تاۋەلسىزدىگى كۇنى مەرەكەسى قارساڭىندا الماتى قالاسى الاتاۋ اۋدانىنداعى گۇلنارا احمەتوۆا باسشىلىق ەتەتىن №210 مەكتەپ-ليسەيدە «جاس سارباز» اسكەري-پاتريوتتىق جانە ۇلتتىق ۇلان باتىرلارى اتىنداعى «ەرلىك سىنىبىنىڭ» اشىلۋ سالتاناتى ءوتتى. بۇل يگى شارا قازاقستان رەسپۋبليكاسىنىڭ ۇلتتىق ۇلانىمەن بىرلەسە وتىرىپ، الماتى قالالىق ءبىلىم باسقارماسىنىڭ قولداۋىمەن ۇيىمداستىرىلدى.
اسكەري-پاتريوتتىق باعىتتاعى ءىس-شارانىڭ نەگىزگى ماقساتى – وقۋشىلاردىڭ بويىندا وتانعا دەگەن سۇيىسپەنشىلىكتى، تۋعان جەرگە دەگەن قۇرمەتتى، قازاقستاندىق ءپاتريوتيزمدى قالىپتاستىرۋ. باتىر بابالارىمىزدىڭ جانە قازىرگى زامان باتىرلارىنىڭ ەرلىكتەرىن ۇلگى ەتە وتىرىپ، وقۋشىلاردى باتىلدىققا، توزىمدىلىككە، تارتىپكە جانە جاۋاپكەرشىلىككە تاربيەلەۋ. سونداي-اق، سپورتتىق شارالار، وقۋ-جاتتىعۋلار ارقىلى جاستاردىڭ دەنەسىن شىڭداپ، سالاۋاتتى ءومىر سالتىن ۇستانۋعا باۋلۋ. كاسىبي باعدار بەرە وتىرىپ، بولاشاقتا قازاقستان قارۋلى كۇشتەرىنىڭ قاتارىن تولىقتىرۋعا دايىنداۋ، اسكەري ماماندىقتارعا دەگەن قىزىعۋشىلىعىن ارتتىرۋ.
وقۋشىلار سالتاناتتى تۇردە انت قابىلداعان سوڭ، «جاس سارباز» قاتارىنا رەسمي قابىلدانىپ،«جاس سارباز» گيمنىن ورىندادى. 5571 اسكەري ءبولىمىنىڭ اسكەري وركەسترى پاتريوتتىق اندەردى ورىنداپ، وقۋشىلاردى رۋحتاندىرا ءتۇستى. بۇدان ءارى مەرەكەلىك كوڭىل كۇيمەن ۇلتتىق ۇلان باتىرلارى اتىنداعى «ەرلىك سىنىبىنىڭ» سالتاناتتى اشىلۋ ءراسىمى بولدى. زاماناۋي تالاپتارعا ساي جابدىقتالعان جاڭا سىنىپتىڭ لەنتاسىن ۇلتتىق ۇلان ارداگەرى وتستاۆكاداعى پولكوۆنيك ءسابيت ايماعامبەتوۆ، مەكتەپ-ليسەي ديرەكتورىنىڭ وقۋ ءىسى جونىندەگى ورىنباسارى سالتانات اشيمبايەۆا جانە الماتى قالالىق دەنە شىنىقتىرۋ جانە سپورت عىلىمي-زەرتتەۋ ورتالىعى العاشقى اسكەري جانە تەحنولوگيالىق دايىندىق ءبولىمىنىڭ جەتەكشىسى مارات قاناتوۆ قيدى.
ءىس-شارا قوناقتارى وتانعا ادال بولۋعا انت بەرگەن جاس ساربازدارعا ساتتىلىك تىلەپ، وسىنداي ءىس-شارالاردىڭ وسكەلەڭ ۇرپاق تاربيەسى ءۇشىن ماڭىزىن اتاپ ءوتتى.
وسى مەكتەپتىڭ العاشقى اسكەري دايىندىق ءپانىنىڭ ءمۇعالىمى زاپاستاعى پولكوۆنيك نيازتاي الكەشيەۆ:
- بۇگىن 5 سىنىپ وقۋشىلارىن «جاس سارباز» اسكەري-پاتريوتتىق سىنىبىنا قابىلدادىق. ولار جاس ساربازداردىڭ انتىن قابىلدادى. وقۋشىلارعا اسكەري-پاتريوتتىق تاربيە جانە كاسىپتىك باعدار بەرۋ جۇمىستارى توقتامايدى. ارنايى باعدارلاما بويىنشا ءىس-شارالار جۇرگىزىلىپ تۇرادى. «جاس سارباز» سىنىبىنىڭ وقۋشىلارى مەكتەپ بىتىرگەن سوڭ، كۇشتىك قۇرىلىم ماماندارىن دايىندايتىن وقۋ ورىندارىنا تۇسۋگە جولداما الادى، - دەدى.