«اقجار» شاعىن اۋدانىنىڭ تۇرعىندارى ءۇشىن «حالىق قاتىساتىن بيۋدجەت» اياسىندا جاڭا قوعامدىق كەڭىستىك اشىلدى
ەربولات دوسايەۆ ناۋرىزباي اۋدانىنداعى قوعامدىق ايماقتاردى اباتتاندىرۋدى تەكسەردى، دەپ حابارلايدى Almaty-akshamy.kz
جۇمىس ساپارى اياسىندا الماتى اكىمى ەربولات دوسايەۆ ناۋرىزباي اۋدانىنىڭ «اقجار» شاعىن اۋدانىندا «حالىق قاتىساتىن بيۋدجەت – 2023» باعدارلاماسى اياسىندا سالىنعان جاڭا قوعامدىق كەڭىستىككە باردى. قۇرىلىس بيىل 15 ماۋسىمدا باستالدى. ءقازىر بارلىق جۇمىس اياقتالدى. وسى جىلدىڭ كۇزىندە 50 دانا قىلقان جاپىراقتى جانە جاپىراقتى ەكپەلەردى وتىرعىزۋ جوسپارلانعان.
قوعامدىق كەڭىستىكتى اباتتاندىرۋ ناتيجەسىن تەكسەرۋ بارىسىندا ەربولات دوسايەۆ جەرگىلىكتى تۇرعىندارمەن اڭگىمەلەستى.
«الماتىدا ۇلكەن ساياباق سالۋ بوس جەردىڭ بولماۋى قيىندىق تۋعىزادى، ءبىراق تۇرعىنداردىڭ جايلىلىعى ءۇشىن ءبىز جەرگىلىكتى دەڭگەيدەگى ساياباقتار مەن سكۆەرلەر سالىپ جاتىرمىز. وسىنداي مىسالداردىڭ ءبىرى – ناۋرىزباي اۋدانىنداعى تۇرعىنداردىڭ دەمالىسى ءۇشىن سالىنعان جاڭا قوعامدىق كەڭىستىك»، - دەدى ەربولات دوسايەۆ.
تۇرعىندار، ءوز كەزەگىندە، اۋداندا ءومىر ءسۇرۋ ساپاسىن ودان ءارى جاقسارتۋ بويىنشا وزەكتى ماسەلەلەردى شەشكەنى ءۇشىن، اتاپ ايتقاندا، «اقجار» شاعىن اۋدانىنىڭ حالقىن اۋىز سۋعا تۇراقتى قولجەتىمدىلىكپەن قامتاماسىز ەتكەنى ءۇشىن العىستارىن ءبىلدىردى.
تۇرعىنداردىڭ ساۋالدارىنا جاۋاپ بەرە وتىرىپ، مەگاپوليس اكىمى «حالىق قاتىساتىن بيۋدجەت» باعدارلاماسىنىڭ تيىمدىلىگىن جانە قالا تۇرعىندارىنىڭ وڭ پىكىرىن ەسكەرە وتىرىپ، باعدارلامانى قارجىلاندىرۋ كولەمى ارتاتىنىن حابارلادى. بيىل ناۋرىزباي اۋدانىنا قوسىمشا 875 ملن تەڭگە ءبولىندى. وسىلايشا، اۋداندا 2،7 ملرد تەڭگەدەن استام سوماعا 67 جوبانى ىسكە اسىرۋ كوزدەلگەن، ونىڭ ىشىندە قوعامدىق كەڭىستىكتەر مەن جاياۋ جۇرگىنشىلەر ايماقتارىن اباتتاندىرۋ، جول ينفراقۇرىلىمى، سىرتقى جارىقتاندىرۋ جەلىسى مەن ارىق سالۋ، سۋارۋدىڭ اۆتوماتتاندىرىلعان جۇيەسىن ورناتۋ بويىنشا جوبالار بار.
«اقجار» شاعىن اۋدانىنداعى قوعامدىق كەڭىستىك بۇرىن قاراۋسىز قالعان، اۋدانى 0،2 گا جەرگە سالىنعان. جەرگىلىكتى تۇرعىندار ءارتۇرلى تۇرمىستىق جانە قۇرىلىس قالدىقتارى جينالعان اۋماقتى بىرنەشە رەت تازارتقان.
«اتالعان قوعامدىق كەڭىستىكتىڭ اشىلۋى «اقجار» شاعىن اۋدانىنىڭ تۇرعىندارى ءۇشىن ماڭىزدى وقيعا بولدى: بۇرىن مۇنداي الاڭدار مەن ساياباقتار بولعان ەمەس. اۋماق ءۇش ايماققا بولىنگەن جانە بالالار ويىن ايماعى، سپورتتىق workout الاڭى، سونىمەن قاتار، قالا تۇرعىندارى ءۇشىن دەمالىس ايماعى ۇسىنىلعان»، - دەدى ناۋرىزباي اۋدانىنىڭ اكىمى ءنازيرا توعىزبايەۆا.