امەريكاندىق دارىگەرلەر بىرەگەي وپەراسيا جاسادى.
وپەراسيا توسەك تارتىپ جاتقان ناۋقاستىڭ قوزعالۋىنا مۇمكىندىك بەردى. بۇل ءۇشىن ماماندار ميعا بىرنەشە چيپ ورناتقان، دەپ حابارلايدى Almaty-akshamy.kz 24.kz-كە سىلتەمە جاساپ.
اق حالاتتىلار، بولاشاقتا مۇنداي ءادىستىڭ كومەگىمەن سال اۋرۋى، ساڭىراۋلىق سەكىلدى دەرتتى ەمدەپ، مىڭداعان ادامعا، ءۇمىت سىيلاۋعا بولاتىنىن ايتادى. بۇل نيۋ-يورك شتاتىنىڭ تۇرعىنى كيت توماس. ءقازىر ول قولىن قوزعالتا الادى. سيپاپ-سەزىنە الادى. مۇنىڭ ءوزى ءبىر عانيبەت دەيدى كيت. ويتكەنى 3 جىل بويى توسەك تارتىپ جاتقان ول بۇرىن مۇلدە قوزعالا المايتىن. سوندىقتان كوپشىلىك الدىندا ءسوز سويلەگەندە قۋانىشىن جاسىرا الماي، كوزىنە جاس الىپ جاتىر.
2020 جىلى كيت باسسەينگە سەكىرگەن كەزدە ومىرتقاسىن زاقىمداپ العان. سول ۋاقىتتان بەرى توسەك تارتىپ جاتىپ قالعان. ءبىراق جۋىردا امەريكالىق دارىگەرلەر وعان بىرەگەي وپەراسيا جاسادى. ولار ەر ادامنىڭ ميىنا 5 شاعىن چيپ ورناتقان. ءسويتىپ ميكروەلەكترودتى يمپلانتاتتىڭ كومەگىمەن باس ميى مەن جۇلىنىن بايلانىستىردى دەسەك بولادى. سونىڭ ناتيجەسىندە جاساندى ينتەللەكت كيتتىڭ ويلارىن ەلەكتر سيگنالدارىنا اينالدىرىپ، ونى بۇلشىقەتى مەن جۇلىنعا باعىتتاپ وتىرادى.
كيت توماس، ناۋقاس: "مەن بۇرىن نيۋ-يوركتىڭ مانحەتتەن اۋدانىندا تۇراتىنمىن. قارجى كومپانياسىندا جۇمىس ىستەگەم. 18-شىلدە ءومىرىمدى وزگەرتكەن كۇن بولدى. ول كوروناۆيرۋس پاندەمياسىنىڭ كەزى ەدى. دوستارىما قوناققا بارعام. سۋعا تۇسەمىن دەپ، وسىنداي جاعدايعا تاپ بولدى. 8 اي بويى اۋرۋحانادا جاتتىم. 3 جىل بۇرىن جاراقات العاننان كەيىن دارىگەرلەر ماعان ەندى ەشقاشان قوزعالا المايتىنىمدى ايتقان. ماعان مىناداي مۇمكىندىك بەرگەن دارىگەرلەر مىڭ العىس."
مۇنداي ناتيجەگە قول جەتكىزۋ ءۇشىن 45 جاستاعى ەر ادامعا كۇردەلى وپەراسيا جاسالدى. ول 15 ساعاتقا جالعاسقان. بۇل ۋاقىت ىشىندە دارىگەرلەر بىرنەشە رەت كيتتى ناركوزدان وياتىپ وتىرعان. وسىلايشا ناۋقاسپەن سويلەسىپ وتىرىپ، وپەراسيانىڭ دۇرىس ءوتىپ جاتقانىن قاداعالاپ وتىرعان.
چاد بۋتون، فاينشتەين اتىنداعى بيوەلەكتروندى مەديسينا ينستيتۋتىنىڭ پروفەسسورى: "بۇل ءادىستى كوپ جەردە قولدانۋعا بولادى. مىسالى، ادامنىڭ جۇلىنى زاقىمدانعاندا عانا ەمەس، ينسۋلتكە ۇشىراعان ناۋقاستارعا كوپ كومەگى ءتيۋى مۇمكىن."
بۇكىل الەم دارىگەرلەرى مۇنى بىرەگەي وپەراسيا دەپ وتىر. ەندى بولاشاقتا "اقىلدى چيپتەردىڭ" كومەگىمەن ساڭىراۋلىق، سكلەروز، سال اۋرۋى سەكىلدى دەرتى ەمدەۋگە بولاتىنىن ايتادى.