مەكتەپتەردە وقۋشىلارعا كاسىپتىك باعدار بەرەتىن ءمۇعالىم بولادى – ەرالى توعجانوۆ

ماماندىق تاڭداۋ – كۇردەلى ماسەلە

بيىلدان باستاپ مەكتەپ وقۋشىلارىنا كاسىپتىك باعدار بەرەتىن ءمۇعالىم جۇمىس ىستەيدى. بۇل تۋرالى الماتىدا AMANAT پارتياسى «جاستار رۋحىنىڭ» كەزەكتەن تىس VI سەزى اياسىندا Jas Talks اشىق ديالوگ الاڭىنىڭ جۇمىسىنا قاتىسقان پرەمەر-مينيستردىڭ ورىنباسارى ەرالى توعجانوۆ ايتتى، دەپ حابارلايدى Almaty-akshamy.kz قازاقپارات-قا سىلتەمە جاساپ.
ادام ءۇشىن ەڭ باستىسى – ءبىلىم. سەبەبى، ءبىلىمدى ازامات ءوزىن ەركىن سەزىنەدى، بولاشاققا سەنىممەن قارايدى جانە قاي باعىتتا قوزعالۋ كەرەكتىگىن بىلەدى. ءاربىر جاس قازاقستاندىق وسىعان ۇمتىلۋى ءتيىس. ارينە، ماماندىق تاڭداۋ – بۇل كۇردەلى ماسەلە. سوندىقتان، بيىل مەكتەپتەردە 7-سىنىپتان باستاپ وقۋشىلارعا كاسىپتىك باعدار بەرەتىن ءمۇعالىم جۇمىس ىستەيدى. ول وقۋشىلارعا دۇرىس باعىت تاڭداۋعا كومەكتەسەدى»، - دەدى ەرالى توعجانوۆ. ۆيسە-پرەمەردىڭ ايتۋىنشا، ەلىمىزدە جاستار اراسىنداعى جۇمىسسىزدىق دەڭگەيى – 3،4%، ال ەش جەردە جۇمىس ىستەمەيتىن جانە وقىمايتىن جاستار – 7،2%. قىزۋ پىكىرتالاس بارىسىندا ۆيسە-پرەمەر قاتىسۋشىلاردىڭ سۇراقتارىنا جاۋاپ بەردى. ۇكىمەتتىڭ جاس بۋىن اراسىنداعى جۇمىسسىزدىق دەڭگەيىن تومەندەتۋ، NEET ساناتىنداعى جاستاردى الەۋمەتتەندىرۋ جانە باسقا دا وزەكتى ماسەلەلەردى شەشۋ بويىنشا جۇرگىزىلىپ جاتقان جۇمىستار تۋرالى ايتتى. 
ەسكە سالساق، AMANAT پارتياسىنىڭ جاستار قاناتى «جاستار رۋحى» دەپ اتالاتىن بولدى.