ءماجىلىس دەپۋتاتى رينات زايىت باس پروكۋرور بەرىك اسىلوۆقا دەپۋتاتتىق ساۋال جولداپ، وليگارحيالىق توپتاردان قايتارىلىپ جاتقان اكتيۆتەردىڭ حالىققا پايداسى مەن ولاردىڭ بولاشاقتاعى تاعدىرىنا قاتىستى اشىق اقپارات تالاپ ەتتى، - دەپ حابارلايدى اqshamnews.kz ءتىلشىسى.
دەپۋتات رينات ريفحات ۇلى زايىت مەملەكەت باسشىسى قاسىم-جومارت توقايەۆ جاريالاعان "ادىلەتتى قازاقستان" تۇجىرىمداماسىنان كەيىن ادىلەتتىلىك ۇعىمى قوعامدا كەڭ قولدانىسقا ەنگەنىمەن، ونىڭ تولىق جۇزەگە اسۋى ءۇشىن ءالى دە باتىل قادامدار قاجەت ەكەنىن اتاپ ءوتتى. ونىڭ ايتۋىنشا، قارجى مينيسترلىگىنىڭ جانىنداعى اكتيۆتەردى قايتارۋ كوميتەتى سوڭعى ۋاقىتتا ىقپالدى تۇلعالاردىڭ كۇماندى بايلىعىنا قاتىستى تەرگەۋدى كۇشەيتىپ، ناقتى ناتيجەلەرگە قول جەتكىزە باستاعان.
ماسەلەن، جۋىردا بولات نازاربايەۆتىڭ ۇلى نۇربول نازاربايەۆ سوت شەشىمىمەن 57 ملرد تەڭگە كولەمىندەگى اكتيۆىنەن ايىرىلىپ، مەملەكەتكە قايتارىلدى. سونىمەن قاتار وعان 925 ملن تەڭگە ايىپپۇل جانە 230،4 ملن تەڭگە ايىپاقى سالىنعان. دەپۋتات بۇل ۇدەرىستى وڭ باعالاي وتىرىپ، قوعامدا اسىرەسە "التىن وردا" بازارى مەن الماتى قالاسى مەن وبلىسىنداعى زاڭسىز جەر تەلىمدەرى جايلى سۇراقتار كوپ ەكەنىن ايتتى.
"بۇل نىسانداردىڭ تاركىلەنگەن اكتيۆتەردىڭ قاتارىندا بار-جوعى بەلگىسىز. سوت پروسەستەرى جابىق وتكەندىكتەن، حالىق ولاردىڭ تاعدىرى جايىندا ناقتى اقپارات الا الماي وتىر"، – دەدى ول.
زايىتتىڭ ايتۋىنشا، قايتارىلعان اكتيۆتەردىڭ قانشالىقتى حالىق يگىلىگىنە جاراتىنى، جۇمىس ورىندارىنىڭ ساقتالۋى سياقتى ماسەلەلەر تۇسىنىكسىز كۇيدە قالىپ وتىر.
سوندىقتان دەپۋتات باس پروكۋرورعا مىناداي ۇسىنىستارىن جەتكىزدى:
- نۇربول نازاربايەۆتىڭ بارلىق اكتيۆتەرىنە تولىق تۇگەندەۋ جۇرگىزىپ، زاڭسىزدارىن مەملەكەت مەنشىگىنە قايتارۋ؛
- زاڭسىز اكتيۆتەردىڭ قايتارىلعاننان كەيىنگى پايدالانىلۋى تۋرالى تولىق اقپاراتتى اشىق جاريالاۋ؛
- "التىن وردا" بازارى مەن الماتى قالاسى جانە وبلىسىنداعى زاڭسىز جەر تەلىمدەرىنە قاتىستى تەرگەۋدى باستاۋ.
"ادىلەتتى قازاقستان" قاعيداتىن جۇزەگە اسىرۋ ءۇشىن بۇل ماسەلەلەر قوعامعا اشىق ءارى ايقىن ءتۇسىندىرىلىپ، حالىققا ناقتى پايداسىن تيگىزۋى ءتيىس"، – دەپ تۇيىندەدى دەپۋتات رينات زايىت.