كولىكتەگى پوليسيا دەپارتامەنتىنىڭ كينولوگيالىق قىزمەت ورتالىعى 2006 جىلدان بەرى جۇمىس ىستەپ كەلەدى.
بۇگىندە كولىك پوليسەيلەرى ادال سەرىكتەرى – قىزمەتتىك يتتەرمەن بىرگە ەلىمىزدىڭ تەمىرجول ۆوكزالدارىندا، جولاۋشىلار پويىزدارىندا جانە اۋەجايلاردا قوعامدىق ءتارتىپتى ساقتاۋ، ازاماتتاردىڭ قاۋىپسىزدىگىن قامتاماسىز ەتۋ، ەسىرتكىنىڭ زاڭسىز اينالىمىنىڭ الدىن الۋ جانە قىلمىستىق قول سۇعۋشىلىقتىڭ جولىن كەسۋ باعىتىندا قىزمەت اتقارىپ كەلەدى، - دەپ حابارلايدى Aqshamnews.kz.
قازىرگى ۋاقىتتا ورتالىقتا ورىس سپانيەلدەرى مەن لابرادورلاردان باستاپ، نەمىس جانە بەلگيالىق وۆچاركالارعا دەيىن ءارتۇرلى تۇقىمداعى 33 قىزمەتتىك يت بار. بارلىعى دا ارنايى دايىندىقتان ءوتىپ، كۇندەلىكتى قىزمەتتە ەسىرتكى قۇرالدارى مەن جارىلعىش زاتتاردى انىقتاۋ سەكىلدى جاۋاپتى مىندەتتەردى ورىنداۋعا كومەكتەسەدى. قىزمەتتىك يتتەردىڭ ەرەكشە ءيىس سەزۋ قابىلەتىنىڭ ارقاسىندا ادام بايقامايتىن جەرلەردەن دە تىيىم سالىنعان زاتتار تابىلىپ جاتادى. 2025 جىلدىڭ باسىنان بەرى كينولوگتار قىزمەتتىك يتتەردى 4 مىڭنان استام رەت قولدانعان. سونىڭ ناتيجەسىندە 150-گە جۋىق ەسىرتكى قىلمىسى اشكەرەلەنىپ، 150 كەلىدەن استام ەسىرتكى زاتى تاركىلەندى. ماسەلەن، سالادا توعىز جىل قىزمەت ەتىپ جۇرگەن بەلگيالىق وۆچاركا شەرليدىڭ ەڭبەگى ەرەكشە. ونىڭ كومەگىمەن تاركىلەنگەن ەسىرتكىنىڭ جارتىسىنا جۋىعى تابىلدى.
سولاردىڭ ءبىرى – الماتى – قوستاناي باعىتىنداعى پويىز جولاۋشىسىنان 3 كەلىدەن استام گاشيشتى انىقتاۋ وقيعاسى. سونداي-اق نەمىس وۆچاركاسى يرگا دا تالاي قىراعىلىعىمەن تانىلدى. ول قىزىلوردا – سەمەي پويىزىندا جولاۋشى سومكەسىنەن ەسىرتكى ءيىسىن سەزىپ، قوجايىنىنا بەلگى بەرگەن. سونىڭ ناتيجەسىندە كۇدىكتىدەن 2 كەلى كەپتىرىلگەن قاراسورا الىندى. ينسپەكتور-كينولوگ قۋانىش بايپاقبايدىڭ ايتۋىنشا، قىزمەتتىك يتتەردى وقىتۋ اۆستريالىق ادىستەمە – كليكەر ءتاسىلى بويىنشا جۇرگىزىلەدى. بۇل – شارتتى بەلگىلەر جۇيەسىنە نەگىزدەلگەن ءادىس، مۇندا باستى بەلگى – شەرتپە دىبىس. وسى ءتاسىلدىڭ ارقاسىندا يت تىيىم سالىنعان زاتتى تاپقان كەزدە ۇرمەي، ءوز جەتەكشىسىنە ناقتى بەلگى بەرەدى. ماسەلەن، اۆستريادان اكەلىنگەن وۆچاركا دوددي ءدال وسى ادىسپەن دايىندالىپ، جارىلعىش زاتتاردى ىزدەۋگە بەيىمدەلگەن.
ورتالىق باستىعى قانات ابدراحمانوۆتىڭ ايتۋىنشا، ءبىر جاسقا دەيىنگى كۇشىكتەر الماتى قالاسىنداعى ق ر ءىىم كينولوگيالىق ورتالىعىندا باستاپقى دايىندىقتان وتەدى، سودان كەيىن ايماقتىق بولىنىستەرگە جىبەرىلەدى. ورتا ەسەپپەن قىزمەتتىك يتتەردىڭ جۇمىس كەزەڭى 8–10 جىلعا سوزىلادى. وسى ۋاقىت ىشىندە ولار پوليسەيلەر ءۇشىن تەك سەنىمدى سەرىكتەس قانا ەمەس، ناعىز ادال دوسىنا اينالادى. قىزمەتتىك يتتەردى پايدالانۋ – كولىك پوليسەيلەرى جۇمىسىنىڭ اجىراماس بولىگى. كينولوگتار مەن ولاردىڭ ءتورت اياقتى كومەكشىلەرىنىڭ قۇقىقتىق ءتارتىپتى قامتاماسىز ەتۋدەگى جانە قىلمىسپەن كۇرەستەگى ەڭبەگى ولشەۋسىز ەكەندىگىن تاجىريبە ايقىن كورسەتىپ وتىر.