قازاقستاندا بالا اسىراپ الۋ، قورعانشىلىق جانە قامقورشىلىق ءتارتىبىن جەتىلدىرۋگە باعىتتالعان جاڭا زاڭ نورمالارى قابىلداندى، - دەپ حابارلايدى Aqshamnews.kz.
جاڭاشىلدىقتار بويىنشا، بالا اسىراپ الۋ كەزىندە ەڭ الدىمەن بالانىڭ تۋىستارىنا باسىمدىق بەرىلەدى. ەگەر جاقىن تۋىستارى بولماسا نەمەسە بالا تاربيەسىنە الا المايتىن جاعدايدا، اسىراپ الۋ قۇقىعى نەكەدە تۇرعان ازاماتتارعا بەرىلەدى.
قامقورشىلار ءتىزىمى كەڭەيتىلەدى
زاڭدا قامقورشى رەتىندە تاعايىندالۋى مۇمكىن تۇلعالار قاتارى دا كەڭەيتىلدى. ەندى پاتروناتتىق تاربيەشىلەر، اسىراپ الۋشىلار،كاسىبي پاتروناتتىق تاربيەشىلەر قامقورشى رەتىندە تانىلۋى مۇمكىن.
بۇل رەتتە قورعانشىلىق جانە قامقورشىلىق ورگاندارى ۇمىتكەر تۇلعالاردىڭ زاڭمەن بەلگىلەنگەن تالاپتارعا سايكەستىگىن مىندەتتى تۇردە تەكسەرۋگە ءتيىس.
سونداي-اق، قامقورشىنىڭ وتباسىندا بىرگە تۇراتىن ادامدارعا قاتىستى قوسىمشا تالاپتار ەنگىزىلەدى. بۇل بالالاردىڭ قاۋىپسىزدىگى مەن قۇقىعىن قامتاماسىز ەتۋ ماقساتىندا جۇزەگە اسىرىلىپ وتىر.
جاڭا نورمالار جەتىم جانە اتا-اناسىنىڭ قامقورلىعىنسىز قالعان بالالاردىڭ مۇددەسىن قورعاۋعا، ولاردىڭ وتباسىندا تاربيەلەنۋىنە جاعداي جاساۋعا باعىتتالعان.