تۇركسىب اۋدانىنداعى بيزنەس-سۋبەكتىلەر سانى وتكەن جىلمەن سالىستىرعاندا 2024 جىلى 10،4% - عا ءوستى
بۇگىنگى تاڭدا تۇركسىب اۋدانى الماتىنىڭ ماڭىزدى كولىك تورابى بولىپ تابىلادى جانە قالانىڭ قارقىندى دامىپ كەلە جاتقان اۋداندارىنىڭ ءبىرى، ەكونوميكانىڭ تۇراقتى ءوسۋىن كورسەتەدى. بۇل تۋرالى الماتى اكىمى ەربولات دوسايەۆ اۋدان تۇرعىندارىمەن كەزدەسۋدە حابارلادى.
قالا باسشىسى اۋداننىڭ 2024 جىلعى الەۋمەتتىك-ەكونوميكالىق دامۋى جونىندە مالىمەت بەردى. ەربولات دوسايەۆ وتكەن جىلدىڭ قورىتىندىسى بويىنشا نەگىزگى كاپيتالعا سالىنعان ينۆەستيسيا كولەمى 7%-عا ارتىپ، 218 ملرد تەڭگە بولعانىن، ونىڭ ىشىندە جەكە ينۆەستيسيا 12،3%-عا ءوسىپ، 200 ملرد تەڭگەگە جەتكەنىن ايتتى.
كوتەرمە ساۋدا 2024 جىلى 27% - عا ءوسىپ، 1،4 ترلن تەڭگەنى قۇرادى، بولشەك ساۋدا كولەمى دە 621،7 ملرد تەڭگەگە جەتتى. تۇركسىب اۋدانىندا بارلىعى جۇمىس ىستەپ تۇرعان بيزنەس-سۋبەكتىلەردىڭ سانى 10،4% - عا ءوسىپ، 30 مىڭعا جەتتى. 5،5 مىڭ جاڭا تۇراقتى جۇمىس ورنىن قۇرۋعا ىقپال ەتتى.
«تۇركسىب اۋدانىنىڭ بيۋدجەتى 40% - عا ۇلعايىپ، 22،5 ملرد تەڭگەگە جەتتى، 2025 جىلى بيۋدجەت 31،6 ملرد تەڭگەنى قۇرادى»، - دەپ اتاپ ءوتتى الماتى اكىمى، اۋدان جانە قالا اكىمدىكتەرى ينجەنەرلىك جانە كوممۋنالدىق ينفراقۇرىلىمدى دامىتۋعا ەرەكشە نازار اۋدارادى. تۇركسىب اۋدانى تۇرعىندارىنىڭ ءومىر ءسۇرۋ ساپاسىن ارتتىرۋعا جانە اۋداندى اباتتاندىرۋعا ايرىقشا كوڭىل بولەتىنىن ايتتى. 2025 جىلى دا بۇل باعىتتاعى جۇمىس جالعاساتىن بولادى»، - دەپ قورىتىندىلادى ءسوزىن ەربولات دوسايەۆ.