الماتى قالالىق پسيحيكالىق ساۋىقتىرۋ ورتالىعىنىڭ ەمدەلۋشىلەرى «بالالىق شاق قايدا كەتتى؟» دەگەن قويىلىمدى ساحنالاپ، كورەرمەنگە ونەرىن پاش ەتتى. ولار بۇل كورىنىسكە 4 اي بويى دايىندالىپ، حالىقارالىق بالالاردى قورعاۋ كۇنى قارساڭىندا كىشكەنتاي پاسيەنتتەرگە جانە مەديسينا قىزمەتكەرلەرىنە ۇسىندى.
ناۋقاس جاسوسپىرىمدەردى تەاتر ونەرىنە باۋلىپ، ساحنا تورىندە ءوز بويىنداعى قورقىنىشپەن كۇرەسۋگە جانە كوپشىلىك الدىندا سويلەۋگە جىگەرلەندىرىپ جۇرگەن ارت- تەراپيەۆت دارياش قاسىموۆا بۇل قويىلىمدا جاسوسپىرىمدەر بالالىق شاقپەن قوشتاسىپ، اتا-اناعا پەرزەنتىنە كوڭىل ءبولۋدىڭ ماڭىزدى ەكەنىن، جۇرەگىندەگى تىلەگىن ەستىرتۋگە تىرىسادى دەيدى.
”ولار ەرەسەكتەردى كامەلەت جاسقا تولماعانداردىڭ پىكىرىن قۇرمەتتەۋگە شاقىرادى. ءاربىر كورىنىستىڭ استارىندا شىناي ومىردە ۇل-قىزدار ايتا الماي جۇرگەن جانە ءاربىر كەزەڭدە ولاردىڭ ءوزىن-وزى كورسەتۋگە ۇمتىلىسى، قايناپ جاتقان تىرشىلىكتىڭ ءبىر مۇشەسى بولىپ قالىپتاسۋعا ارەكەتى، قورشاعان ورتانىڭ قۇپياسىن بىلۋگە تالپىنىسى بايقالادى. سەناريي اۆتورلارى دا، كەيىپكەرلەرى دە — ورتالىقتىڭ پاسيەنتتەرى. بالالار وزدەرى ويلاپ تاپتى،” - دەيدى دارياش قاسىموۆا.
سونداي-اق، ورتالىقتىڭ بالالار ءبولىمىنىڭ دالىزىندە سۋرەتشىلەر كورمەسى ءوتتى. ەمدەلۋشىلەر بالالىق شاققا ساياحات جاساپ، جارقىن ءساتتى، جاقىن ادامدى نەمەسە ومىرىندەگى ۇمىتىلماس كۇن، وقيعانى قىلقالاممەن اق قاعازعا بەينەلەدى. كورمەگە قويىلعان شىعارمالاردىڭ باسىم بولىگى — جانۋارلار مەن ويىنشىقتاردىڭ سۋرەتى. ەكى اۆتور-بالا عانا اتا-اناسىن ەسكە تۇسىرگەن. ال ءبىر ەمدەلۋشى اق شاشتى اجەسىن ساعىنعان سەكىلدى. ساياباقتا بىرەۋدى كۇتىپ وتىرعان قاريانىڭ بەينەسى كورمەگە كەلگەن قوناقتاردىڭ قىزىعۋشىلىعىن وياتتى. ءار تۋىندىنىڭ استارىندا بالالاردىڭ بالالىق شاققا ساعىنىشى مەنمۇندالاپ جاتقانداي.
ءارى قاراي مەرەكەلىك ءىس-شارا اسحانادا جالعاستى. ەمدەلۋشىلەر شەبەرلىك دارىسكە قاتىسىپ، تۇزدى سۋعا قامىر يلەپ، وعان بوياۋ قوسىپ، مىسىقتىڭ ءمۇسىنىن جاسادى. شىعارماشىلىققا باۋلۋ ارقىلى ولاردىڭ ويلاۋ قابىلەتىن دامىتۋ، كۇيزەلىستەن ارىلۋعا كومەكتەسۋ دەيدى ماماندار.
الماتى قالاسىندا 3 مىڭعا جۋىق بالا، ءجاسوسپىرىم پسيحيكالىق ديناميكالىق باقىلاۋدا تۇر.
ءيا، الماتى قالالىق پسيحيكالىق ورتالىقتىڭ عيماراتى ەرەكشە بالالاردىڭ شىعارماشىلىق الاڭىنا اينالدى. ورتالىقتىڭ دارىگەرلەرى، مەديسينا قىزمەتكەرلەرى قوعامنان وقشاۋ ءومىر سۇرەتىن كىشكەنتاي ناۋقاستاردى مەرەكە قارساڭىندا وسىلاي قۋانتتى
ەلىمىزدە باستالعان «دارىگەر – بالالاردىڭ جاناشىرى» اكسياسى اياسىندا ولار باقشا ونىمدەرىن ەگۋ، باپتاۋدىڭ قىر-سىرىن ۇيرەتەتىن شەبەرلىك دارىسىنە قاتىستى.
پسيحيكالىق اۋرۋعا شالدىققان بالالار ءۇشىن ارت-تەراپيا، ەڭبەك تەراپياسىنىڭ پايداسى زور. قىلقالامنىڭ قۇدىرەتى ەمدەلۋشىگە ەموسياسىن بىلدىرۋگە، ىشىندەگى قورقىنىش پەن ۋايىمىن بۇكپەي اقتارىپ، مازالاعان كەسەلمەن كۇرەسۋگە مۇمكىندىك بەرەدى. ءارى ناۋقاستىڭ شىعارماشىلىق داعدىلارىن دامىتۋ ارقىلى ءوزىن-وزى باعالاۋدى جەتىلدىرۋگە پايداسى زور دەيدى بالالار ءبولىمىنىڭ مەڭگەرۋشىسى ولگا الەكساندروۆا.