ءال-فارابي اتىنداعى قازاق ۇلتتىق ۋنيۆەرسيتەتىندە قازاقستانداعى «جىبەك جولى» ادەبيەت اپتالىعىنىڭ سالتاناتتى اشىلۋ ءراسىمى ءوتتى.
اپتالىقتىڭ باستى ماقساتى – جىبەك جولى بويىنداعى كورشى مەملەكەتتەردىڭ مادەني بايلانىسىن نىعايتۋ، ەكى ەل اراسىنداعى اعارتۋشىلىق جانە ونەر سالاسىنداعى قارىم-قاتىناسىن جاڭا دەڭگەيگە كوتەرۋ.
حالىقارالىق ءىس-شاراعا الماتى قالاسى اكىمىنىڭ ورىنباسارى ازامات قالدىبەكوۆ، جۇڭگو كوممۋنيستىك پارتيا ورتالىعى ناسيحاتتاۋ ءبولىمىنىڭ جاۋاپتى ورىنباسارى حۋ حەپين، قازۇۋ-دىڭ باسقارما ءتوراعاسى – رەكتور جانسەيىت تۇيمەبايەۆ، الماتىداعى قحر باس كونسۋلى سزيان ۆەي، جۇڭگو كىتاپ يمپورتى جانە ەكسپورتى كورپوراسياسىنىڭ اتقارۋشى ديرەكتورى لي حۋنۆەن، وقىتۋشى-پروفەسسورلار قۇرامى مەن بەلگىلى عالىمدار، ءبىلىم الۋشى جاستار قاتىستى.
اپتالىقتىڭ اشىلۋ سالتاناتىندا قازۇۋ رەكتورى جانسەيىت تۇيمەبايەۆ ءسوز سويلەپ، اۋقىمدى جيىننىڭ ماڭىزىنا توقتالدى. رەكتور ءوز سوزىندە قازاقستان مەن جۇڭگو ىنتىماقتاستىقتىڭ «التىن داۋىرىنە» قادام باسقانىنا باسا ءمان بەردى.
«جۇڭگو مەن قازاقستان ادەبيەتى اراسىنداعى بايلانىس تەرەڭدە جاتىر. ۇلى جىبەك جولى تەك ساۋدا باعىتى عانا ەمەس، سونىمەن قاتار مادەنيەت، ەكى ەلدىڭ ادەبي ءداستۇرىن بايىتۋعا، وركەنيەتتىڭ دامۋىنا ايرىقشا ۇلەس قوستى. بۇگىنگى تاڭدا قوس مەملەكەتتىڭ ادەبي بايلانىسى جوعارى سيپاتقا يە، كوركەم شىعارمالاردى اۋدارۋ مەن عىلىمي الماسۋدى دامىتۋدىڭ ارقاسىندا كۇشەيە تۇسۋدە. جۇڭگو داستۇرىندە ادەبيەت ءبىلىم بەرۋدىڭ، ءوزىن-وزى تانۋدىڭ جانە فيلوسوفيالىق يدەيالاردى ءبىلدىرۋدىڭ قۋاتتى قۇرالى رەتىندە قابىلدانادى. قازاق مادەنيەتىندەگى ادەبي شىعارمالار – حالقىمىزدىڭ شىنايى قازىناسى، ونىڭ تامىرى مىڭداعان جىلداردان باستاۋ الادى. سوندىقتان مادەني بايلانىستى جانداندىرۋدا قوس تاراپتىڭ دا مۇمكىنشىلىگى جوعارى»، – دەدى رەكتور.
سونداي-اق جانسەيىت تۇيمەبايەۆ جوعارى ءبىلىم مەن عىلىم سالاسىنداعى قازۇۋ-دىڭ جۇڭگو جوو-لارىمەن بىرلەسىپ جۇزەگە اسىرىپ جاتقان جۇمىستارىنا توقتالدى. قازىرگى تاڭدا ۋنيۆەرسيتەت قىتايدىڭ 65 ۋنيۆەرسيتەتىمەن كەلىسىم جاساسقان. ناتيجەسىندە وقۋ ورداسىنىڭ بازاسىندا جۇڭگو تاراپىمەن بىرلەسكەن عىلىمي ورتالىقتار مەن زەرتحانالار ىسكە قوسىلدى. 2023 جىلى قازۇۋ-دا قىتايدىڭ سولتۇستىك-باتىس پوليتەحنيكالىق ۋنيۆەرسيتەتىنىڭ فيليالى اشىلدى. بۇدان بولەك، كونفۋسيي ينستيتۋتى مەن قىتايتانۋ كافەدراسى تابىستى جۇمىس ىستەيدى.
شارادا الماتى قالاسى اكىمىنىڭ ورىنباسارى ازامات قالدىبەكوۆ: «الماتى – قازاقستاننىڭ مادەني جانە ءبىلىم بەرۋ ورتالىعى عانا ەمەس، ەجەلدەن ۇلى جىبەك جولىنىڭ ماڭىزدى تورابى بولعان قالا. بۇگىنگى ءىس-شارا ادەبيەت، تاريح، حالىقارالىق ىنتىماقتاستىق جانە ادامگەرشىلىك قۇندىلىقتارعا دەگەن ۇمتىلىستى بىرىكتىرگەن سيمۆولدىق وقيعا»، – دەپ اتاپ ءوتتى.
الماتىداعى قحر باس كونسۋلى سزيان ۆەي قازاقستانداعى «جىبەك جولى» ادەبيەت اپتالىعى اياسىندا مادەنيەت پەن ادەبيەت باعىتىندا ورتاق جوبالار مەن جاڭا باستامالار ىسكە اسىرىلاتىنىن جەتكىزدى. «قازاقستان مەن جۇڭگو –تاتۋ كورشى، ماڭىزدى ستراتەگيالىق سەرىكتەس ءارى باستى وداقتاس مەملەكەت. بۇگىندە ەكى ەل گۋمانيتارلىق سالادا ۇلكەن جەتىستىكتەرگە قول جەتكىزىپ كەلەدى. حالىقتاردىڭ جۇرەگىن جاقىنداستىراتىن التىن كوپىر – ادەبيەت. سوڭعى جىلدارى جۇڭگو مەن قازاقستان اراسىنداعى بايلانىس نىعايا تۇسكەن سايىن، قازاق حالقىنىڭ قىتايدى تانۋعا دەگەن ىنتاسى ارتىپ كەلەدى. سول سياقتى جۇڭگو حالقىنىڭ دا قازاق تاريحىنا دەگەن قىزىعۋشىلىعى باسىم»، – دەدى باس كونسۋل.
اپتالىق اياسىندا قۇرمەتتى قوناقتار ءال-فارابي اتىنداعى قازاق ۇلتتىق ۋنيۆەرسيتەتى فارابي كىتاپحاناسىنىڭ قورىنا قىتايدىڭ 100 ۇزدىك كىتابىن تارتۋ ەتتى.
پلەنارلىق وتىرىس ءتۇرلى تاقىرىپتارعا ارنالعان سەكسيالاردا جالعاستى.