الماتىنىڭ قوس پەرزەنتحاناسى مەن ەمحاناسى جاڭا تۋعان بوبەكتەردىڭ قۇلاعىن تەكسەرەتىن زاماناۋي اپپاراتقا يە بولدى
الماتىداعى №5 قالالىق پەرزەنتحانا، قالالىق پەريتانالدىق ورتالىق، №10 جانە №36 قالالىق ەمحانالار سابيلەردىڭ ەستۋ قابىلەتىن تەرەڭدەتىپ تەكسەرۋگە ارنالعان جاڭا جابدىقتارعا يە بولدى. ول ءۇشىن AYALA قايىرىمدىلىق قورى مەن «مەن ەستيمىن» پيلوتتىق جوباسى شەڭبەرىندە Halyk Bank قولداۋ كورسەتتى.
زاماناۋي قۇرالدار جاڭا تۋعان نارەستەلەردىڭ ەستۋ قابىلەتىنىڭ جاسىرىن بۇزىلۋىن انىقتاۋعا جانە مۇگەدەكتىكتى تومەندەتۋگە مۇمكىندىك بەرەدى. ەكى جىلدا الماتىدا 62 مىڭعا جۋىق ءسابي تەكسەرۋدەن وتەدى دەگەن جوسپار بار.
«ءبىز بۇل جوبانى قۋانا قولدادىق. ويتكەنى ءبىز ءۇشىن ومىرگە ەندى كەلگەن بوبەكتەردىڭ دەنى ساۋ ازامات بولىپ ءوسۋى ماڭىزدى. Halyk Bank AYALA قورىمەن ىنتىماقتاسا وتىرىپ، بالالاردىڭ دەنساۋلىق ساقتاۋ سالاسىنداعى جوبالارىن كوپتەن بەرى بەلسەندى قولداپ كەلەدى. قازىرگى زامانعى دياگنوستيكالىق جابدىق قازاقستاننىڭ كوپتەگەن مەديسينالىق مەكەمەلەرىندە تۇر جانە كۇن سايىن نارەستەلەردىڭ دەنساۋلىعىن ساقتاۋدا ماڭىزدى ءرول اتقارىپ كەلەدى. جاڭا جوبا اياسىندا الماتىلىق دارىگەرلەر بالالاردىڭ ەستۋ قابىلەتىن دەر كەزىندە انىقتاپ، ەمدەي الاتىنىنا سەنىمدىمىز»، – دەپ اتاپ ءوتتى Halyk Bank PR-قىزمەتى باسقارماسىنىڭ باستىعى گۇلميرا اربابايەۆا.
«مەن ەستيمىن» پيلوتتىق جوباسى الماتى قالاسى قوعامدىق دەنساۋلىق ساقتاۋ باسقارماسىنىڭ AYALA قايىرىمدىلىق قورىمەن، «مەيىرىمدىلىك» ەرىكتى قوعامى» قورىمەن جانە «ساتر» ورتالىعىمەن مەموراندۋمى اياسىندا ىسكە اسىرىلۋدا. قالانىڭ بەس مەديسينالىق مەكەمەسىندە تۋا بىتكەن پروبلەمالاردى دەر كەزىندە انىقتاۋ ءۇشىن سابيلەر مەن ءۇش جاسقا دەيىنگى بالالاردىڭ ەستۋ قابىلەتىن تەرەڭدەتىپ سكرينينگتەۋ ۇيىمداستىرىلدى. جاڭا جابدىق بالانىڭ ەستۋىن تۋعاننان كەيىن بىردەن تەكسەرۋگە جانە الدىڭعى بۋىن اسپاپتارى جاساي الماعان مي دىڭىندەگى بۇزىلىستاردى انىقتاۋعا مۇمكىندىك بەرەدى.
سۋردولوگتاردىڭ مالىمەتىنشە، ەلىمىزدە جىل سايىن 1400-گە جۋىق ءسابي ەستۋ قابىلەتى تومەن نەمەسە ساڭىراۋ بولىپ دۇنيەگە كەلەدى. ءقازىر پەرزەنتحانالاردا ەستۋدى تەكسەرۋ كەزىندە الىنعان دەرەكتەر قولمەن تىركەلەدى، بۇل ەستۋ بويىنشا پاتولوگياسى انىقتالعان بالالاردىڭ ودان ارعى تاعدىرىن قاداعالاۋ پروسەسىنە اسەر ەتەدى.
بۇل ماسەلەنى شەشۋ ءۇشىن جاڭا دياگنوستيكالىق اپپاراتتار سيفرلىق ترەككينگ ورتالىعىنا قوسىلعان. پەرزەنتحانالار مەن ەمحانالاردىڭ مەدبيكەلەرى وسى جابدىقپەن جۇمىس ىستەۋ بويىنشا ارنايى وقىتۋدان ءوتتى. ەندى تەست ناتيجەلەرى اۆتوماتتى تۇردە ءبىرىڭعاي بازاعا جىبەرىلەدى. وندا دارىگەرلەر ديناميكانى باقىلاپ، بالا تۋعاننان كەيىنگى ءۇشىنشى ايدا ەمەس، پەرزەنتحاناداعى العاشقى اۋديولوگيالىق سكرينينگتەن كەيىنگى ون ءتورتىنشى كۇنى تەكسەرۋ ساپاسىن باقىلاي الادى. مۇنداي ءتاسىل دەرەكتەردىڭ جوعالۋىن بولدىرمايدى، قاتەلىكتەر ىقتيمالدىعىن تومەندەتەدى جانە دياگنوستيكانىڭ دالدىگىن ارتتىرادى.
«وسى جوبانىڭ ارقاسىندا تاۋەكەل توبىنداعى بالالار قىمبات ۋاقىتتى جوعالتپاي، ۋاقىتىلى كومەك الادى. ەستۋ قابىلەتى بۇزىلعان بالالار قالا بيۋدجەتى ەسەبىنەن تەگىن ەستۋ اپپاراتتارىن الا الادى. بۇل مەملەكەت پەن قوعامنىڭ مىڭداعان بالاعا پايدا اكەلەتىن ىنتىماقتاستىعىنىڭ تاماشا ۇلگىسى»، – دەپ اتاپ ءوتتى الماتى قالالىق قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى نازگۇل يمانعالييەۆا.
AYALA قايىرىمدىلىق قورى ءۇشىن بۇل جوبا – قازاقستانداعى بالالار مۇگەدەكتىگىن ازايتۋعا باعىتتالعان تاعى ءبىر قادام. بۇعان دەيىن بۇل قور مەن ونىڭ سەرىكتەستەرى ءۇش جىل ىشىندە شالا تۋعان سابيلەردىڭ كورۋ قابىلەتى ناشارلىعىن تولىق جويۋعا قول جەتكىزگەن بولاتىن.
«ءقازىر قازاقستاندا 110 مىڭنان استام مۇگەدەك بالا بار. بۇل كورسەتكىش ءبىزدى قاتتى مازالايدى. Halyk Bank قولداۋىنىڭ ارقاسىندا ءبىز 2 پەرزەنتحانا مەن 2 ەمحانانى جاڭا تۋعان بالالاردىڭ ەستۋ قابىلەتى بويىنشا جاسىرىن پروبلەمالاردى ەرتە دياگنوستيكالاۋعا ارنالعان زاماناۋي قۇرالدارمەن جاراقتاندىردىق. بارلىق اتا-انالارعا ايتقىم كەلەتىنى: پەرزەنتحانادا بالاڭىزدىڭ ەستۋ قابىلەتىن تەكسەرىپ الۋ مۇمكىندىگىن جىبەرىپ الماڭىزدار. پروبلەما نەعۇرلىم ەرتە انىقتالسا، سوعۇرلىم مۇگەدەكتىكتى بولدىرماۋ جانە بالاعا تولىققاندى ءومىر بەرۋ مۇمكىندىگى ارتادى»، – دەپ اتاپ ءوتتى AYALA قايىرىمدىلىق قورىنىڭ نەگىزىن قالاۋشى جانە پرەزيدەنتى ايدان سۇلەيمەنوۆا.
تەرەڭدەتىلگەن سكرينينگ بالانىڭ ەستۋ كەمىستىگىن انىقتاعاندا، ونى قوسىمشا تەكسەرۋ ءۇشىن ماماندارعا جىبەرەدى. قاجەت بولعان جاعدايدا ەستۋ اپپاراتتارى «دوم» قورىنىڭ «بالالارعا ءومىر سىيلا» جوباسى شەڭبەرىندە بەرىلەتىن بولادى. ال ەستۋدى پروتەزدەۋ ءمامس ەسەبىنەن الماتى قالاسىنداعى №5 قالالىق كلينيكالىق اۋرۋحانادا جۇرگىزىلەدى.وسى ورايدا ايتا كەتسەك، AYALA قايىرىمدىلىق قورى – نەوناتولوگياعا ماماندانعان قازاقستانداعى جالعىز قايىرىمدىلىق قورى. ءوز جۇمىسىنىڭ 18 جىلى ىشىندە قور ەلىمىزدىڭ 67 پەريناتالدىق ورتالىقتارىن، بالالار اۋرۋحانالارى مەن عىلىمي ورتالىقتارىن زاماناۋي مەديسينالىق جابدىقتارمەن جاراقتاندىرۋعا 2،3 ملرد تەڭگەدەن استام قاراجات تارتتى. بۇل 2007 جىلدان بەرى جۇزدەگەن مىڭ بالانىڭ ءومىرىن ساقتاپ قالۋعا كومەكتەستى.