«ادال ازامات» ءبىرتۇتاس تاربيە باعدارلاماسىن جۇزەگە اسىرۋ اياسىندا 2023 جىلدان باستاپ بارلىق مەملەكەتتىك ءبىلىم بەرۋ ۇيىمدارىندا اتا-انالارعا پەداگوگيكالىق قولداۋ كورسەتۋ ورتالىقتارى جۇمىس ىستەي باستادى جانە ول وتباسى مەن مەكتەپتىڭ ءوزارا ىنتىماقتاستىعىن نىعايتۋ، سونداي-اق ءپوزيتيۆتى اتا-انا مادەنيەتىن قالىپتاستىرۋ الاڭىنا اينالدى.
بۇل ورتالىقتاردىڭ نەگىزگى ماقساتى اتا-انالاردى بالالاردى تاربيەلەۋ مەن وقىتۋ ۇدەرىسىنە تارتۋ عانا ەمەس، ولارعا قاجەتتى پەداگوگيكالىق جانە پسيحولوگيالىق قولداۋ كورسەتۋ بولىپ تابىلادى، دەپ حابارلايدى aqshamnews.kz.
جىل باسىنان بەرى بۇل ورتالىقتارعا 1،4 ميلليوننان استام اتا-انا تىركەلىپ، ولار 108 مىڭنان استام دارىسكە بەلسەنە قاتىسقان. ءدارىس تاقىرىپتارى مەكتەپ جاسىنا دەيىنگى بالالاردى تاربيەلەۋدەن باستاپ جاسوسپىرىمدەر اراسىنداعى داۋ-جانجالداردى شەشۋگە دەيىنگى كوپتەگەن وزەكتى ماسەلەلەردى قامتىدى.
PIRLS جانە TIMSS سياقتى حالىقارالىق زەرتتەۋلەرىنەن-اق اتا-انالاردىڭ ءبىلىم بەرۋ ۇدەرىسىنە قاتىسۋىنىڭ ماڭىزدىلىعىن ناقتى كورۋگە بولادى. مىسالى، اتا-انالارى بالالارىمەن جۇيەلى تۇردە اينالىساتىن وقۋشىلاردىڭ باللى اتا-انالارى بالاعا سيرەك كوڭىل بولەتىن وقۋشىلارعا قاراعاندا 16-37 باللعا، ونىڭ وقۋىنا قاتىسپاعاندارعا قاراعاندا 110 باللعا جوعارى بولدى
«ءبىرتۇتاس ءبىلىم بەرۋ باعدارلاماسىن ەنگىزۋ اتا-انالاردىڭ قاتىسىمىن 42%-دان 82%-عا دەيىن ايتارلىقتاي ارتتىردى. پەداگوگتەر اراسىندا جۇرگىزىلگەن ساۋالناما ناتيجەسىنە سۇيەنسەك، ولاردىڭ 82 پايىزى باعدارلامانىڭ سىنىپ جەتەكشىلەرىنىڭ كاسىبي دامۋىنا وڭ اسەرىن، 84 پايىزى وقۋشى بەلسەندىلىگىنىڭ ارتقانىن، 71 پايىزى مەكتەپ پەن وتباسىنىڭ ءوزارا ارەكەتتەسۋىنىڭ جاقسارعانىن اتاپ كورسەتكەن. بۇل رەتتە اتا-انالاردىڭ 89 پايىزى باعدارلامانىڭ بالالاردىڭ مىنەز-قۇلقىنا وڭ اسەر ەتكەنىن راستادى»، – دەيدى ى.التىنسارين اتىنداعى ۇبا ۆيسە-پرەزيدەنتى انار تاڭىربەرگەنوۆا.
بۇگىندە وقۋ-اعارتۋ مينيسترلىگى باعدارلامانى جەتىلدىرۋدە. وسى ماقساتتا اتا-انالارعا پەداگوگيكالىق قولداۋ كورسەتۋ ورتالىقتارى جۇمىسىنىڭ ساپاسىن ارتتىرۋعا باعىتتالعان ادىستەمەلىك ۇسىنىستار ازىرلەنىپ جاتىر. بۇل ۇسىنىستار مۇعالىمدەرگە، اتا-انالارعا جانە وقۋشىلارعا وقۋ-تاربيە پروسەسىنىڭ ماقساتتارى تۋرالى ورتاق تۇسىنىك قالىپتاستىرۋعا، تاجىريبە الماسۋعا جانە بالالاردىڭ جان-جاقتى دامۋىنا قولايلى جاعداي جاساۋعا سەپتىگىن تيگىزەدى.