ناۋرىزباي اۋدانىندا بۋفەرلىك اۋماقتاردى كەشەندى كوركەيتۋ بويىنشا اۋقىمدى جوبا باستالدى. جۇمىس 2025 جىلى قىركۇيەكتە قولعا الىندى. جوبانىڭ ماقساتى – تۇرعىندار ءۇشىن قولايلى، ءقاۋىپسىز جانە ەكولوگيالىق جايلى قالا ورتاسىن قالىپتاستىرۋ. بۇل تۋرالى ناۋرىزباي اۋدانىنىڭ اكىمدىگى حابارلادى.
بيىل نەگىزگى جۇمىس شالياپين كوشەسى مەن اباي داڭعىلىنان تومەن ورنالاسقان بۋلۆار اۋماعىندا باستالعان. مۇندا كوگالداندىرۋ، كوركەيتۋ ەلەمەنتتەرىن ورناتىلىپ جاتىر. سونداي-اق، جوسپارعا قونايەۆ كوشەسى ەنگىزىلگەن. وندا كوگالداندىرۋ، تەحنيكالىق جۇرگىنشى جولىن جاساۋ جانە اۆتوماتتى سۋارۋ جۇيەسىن ورناتۋ كوزدەلىپ وتىر.
جوبا اياسىندا درەناج جانە ارىق جۇيەلەرىن جەتىلدىرۋگە ەرەكشە كوڭىل بولىنگەن. بۇل شارالار تۇرعىن ۇيلەر اۋماعىن سۋ باسۋدان قورعاپ، جاياۋ جۇرگىنشى ايماقتارىنىڭ ۇزاق مەرزىمدى ساقتالۋىن قامتاماسىز ەتەدى. بۇدان بولەك، كوگالدى تاس توسەۋ، ساندىك جارىق شامدارىن ورناتۋ، اعاشتار مەن بۇتالار وتىرعىزۋ جۇمىستارى دا جۇرگىزىلىپ جاتىر.
اباتتاندىرۋ جوباسى اۋداننىڭ كوركىن ارتتىرىپ قانا قويماي، تۇرعىنداردىڭ ءومىر ءسۇرۋ ساپاسىن جاقسارتۋعا دا سەپ بولادى. تۇرعىن الاپتار اراسىنداعى جاسىل دالىزدەر مەن اباتتاندىرىلعان وتپەلى ايماقتاردىڭ قۇرىلۋى شاڭ-توزاڭدى ازايتىپ، اۋانىڭ تازالىعىن جاقسارتادى جانە قالا ورتاسىن سەرۋەن مەن دەمالىسقا بارىنشا قولايلى ەتەدى.
ناۋرىزباي اۋدانى اكىمدىگىنىڭ مالىمەتىنشە، بۋفەرلىك ايماقتاردى اباتتاندىرۋ — قالالىق ينفراقۇرىلىمدى مەن ەكولوگيالىق تەپە-تەڭدىكتى دامىتۋدا ماڭىزدى قادام. جوبانىڭ باستى ماقساتى — تۇرعىن ۇيلەر، ساياباقتار مەن قوعامدىق كەڭىستىكتەردى بىرىكتىرەتىن ۇزدىكسىز جاسىل جەلەك بەلدەۋىن قالىپتاستىرۋ.
2026 جىلى اباتتاندىرۋ جۇمىستارى جالعاسادى. كەلەسى كەزەڭدە تاجييەۆ، اسقاروۆ جانە ارمان كوشەلەرىن جاڭارتۋ كوزدەلىپ وتىر. بۇل جۇمىستار جەكەلەگەن اۋماقتاردى ءبىرتۇتاس اباتتاندىرىلعان جۇيەگە بىرىكتىرىپ، ناۋرىزباي اۋدانىن الماتىنىڭ ەڭ جاسىل ءارى ەڭ جايلى اۋداندارىنىڭ بىرىنە اينالدىرۋعا مۇمكىندىك بەرەدى.