الماتى قالالىق قوعامدىق دەنساۋلىق ساقتاۋ باسقارماسىنىڭ باسشىسى مارات پاشيموۆ مەگاپوليستەگى مەديسينالىق ءتۋريزمنىڭ دامۋ پەرسپەكتيۆاسى مەن بۇل سالانى باسەكەگە قابىلەتتى باعىتقا اينالدىرۋ شارالارى تۋرالى ايتتى.
ونىڭ ايتۋىنشا، الماتىدا مەديسينالىق ءتۋريزمدى دامىتۋعا زور مۇمكىندىك بار. قالادا كوپ دەڭگەيلى مەديسينا ۇيىمدارى جۇمىس ىستەيدى، زاماناۋي تەحنولوگيالار قولدانىلىپ، جوعارى ساپا ستاندارتتارى ساقتالادى. سونىمەن قاتار، باعالار قولجەتىمدى، ال تمد ەلدەرىنىڭ ازاماتتارى ءۇشىن تىلدىك كەدەرگى جوق.
«الماتى ءقازىردىڭ وزىندە كورشىلەس ەلدەردەن كەلەتىن ناۋقاستار ءۇشىن تارتىمدى باعىتقا اينالىپ وتىر. اسىرەسە رەسەي، وزبەكستان جانە قىرعىزستاننان كەلەتىن پاسيەنتتەردىڭ سانى تۇراقتى تۇردە ءوسىپ كەلەدى»، - دەدى مارات پاشيموۆ.
مەديسينالىق ءتۋريزمدى دامىتۋ ماقساتىندا قالادا ءاقپاراتتىق-تۇسىندىرۋ جۇمىستارى جۇرگىزىلۋدە، ساقتاندىرۋ جانە اسسيستەنس كومپانيالارىمەن ارىپتەستىك نىعايىپ كەلەدى، ونلاين-كونسۋلتاسيالار ۇيىمداستىرىلىپ، شەتەلدىك ناۋقاستاردى قابىلداۋ جۇيەسى جولعا قويىلعان.
قازىرگى تاڭدا مەگاپوليستەگى 25 مەديسينالىق ۇيىم ونكولوگيا، حيرۋرگيا، اكۋشەرلىك جانە پسيحونيەۆرولوگيا سياقتى ءتۇرلى باعىتتار بويىنشا جوعارى تەحنولوگيالىق كومەك كورسەتەدى.
2025 جىلدىڭ العاشقى جارتىجىلدىعىندا الماتى ستاسيونارلارىندا 178 شەتەلدىك پاسيەنت ەمدەلدى. ولاردىڭ ىشىندە:
– 81 ادام — رەسەيدەن،
– 25 ادام — وزبەكستاننان،
– 24 ادام — قىرعىزستاننان.
كوبىنە كورسەتىلەتىن مەديسينالىق قىزمەت تۇرلەرى: اكۋشەرلىك پەن بوساندىرۋ ءىسى، ونكولوگيا، حيرۋرگيا، تەراپيا، ۋرولوگيا جانە پسيحياتريا.
سونداي-اق، قازاقستان زاڭناماسىنا سايكەس، قانداستار، بوسقىندار، شەتەلدىكتەر جانە ەلدە تۇراقتى تۇراتىن ازاماتتىعى جوق تۇلعالار دا قازاقستاندىقتارمەن تەڭ دارەجەدە مەديسينالىق كومەك الۋعا قۇقىلى. بۇل كومەك كەپىلدەندىرىلگەن تەگىن مەديسينالىق كومەك كولەمى (كتمكك) جانە مىندەتتى الەۋمەتتىك مەديسينالىق ساقتاندىرۋ (ءمامس) جۇيەسى اياسىندا كورسەتىلەدى.
«مەديسينالىق ءتۋريزمدى دامىتۋ - تەك قوسىمشا تابىس كوزى عانا ەمەس، سونىمەن بىرگە مەديسينالىق كومەكتىڭ ساپاسىن ارتتىرۋعا جانە الماتىنىڭ دەنساۋلىق پەن يننوۆاسيالار قالاسى رەتىندەگى حالىقارالىق بەدەلىن نىعايتۋعا مۇمكىندىك بەرەدى»، - دەپ قورىتىندىلادى الماتى قالالىق قوعامدىق دەنساۋلىق ساقتاۋ باسقارماسىنىڭ باسشىسى مارات پاشيموۆ.