2025 جىلعى 1 جەلتوقساندا قازاقستان رەسپۋبليكاسى پرەزيدەنتى جانىنداعى مەملەكەتتىك باسقارۋ اكادەمياسىنىڭ الماتىلىق فيليالى بازاسىندا «مەملەكەتتىك باسقارۋداعى ستراتەگيالىق ويلاۋدىڭ ءرولى» تاقىرىبىندا پراكتيكالىق سەمينار ءوتتى.
ءىس-شاراعا مەگاپوليس مەكتەپتەرىنىڭ 9-11 سىنىپتارىندا وقيتىن جاس سايلاۋشىلار كلۋبىنىڭ 41 مۇشەسى قاتىستى.
سەمينار سپيكەرى – قازاقستان رەسپۋبليكاسى پرەزيدەنتى جانىنداعى مەملەكەتتىك باسقارۋ اكادەمياسىنىڭ الماتىلىق فيليالىنىڭ ديرەكتورى يدريسوۆا اينۇر ماراتوۆنا بولدى.
سەمينار سپيكەردىڭ «ستراتەگيالىق ويلاۋ دەگەنىمىز نە؟» دەگەن سۇراعىنان باستالدى. ديالوگ قازاق جانە ورىس تىلدەرىندە ءوتىپ، ماستەرمايند ەلەمەنتتەرىن قامتىدى. قاتىسۋشىلار ستراتەگيالىق ءتاسىلدىڭ نەگىزىن قۇرايتىن ميسسيانى، قۇندىلىقتاردى، تالداۋدى جانە SWOT مودەلىنىڭ ەلەمەنتتەرىن – ماقساتتاردى، مىندەتتەردى، تاۋەكەلدەردى، رەسۋرستاردى، مەرزىمدەردى جانە جوسپارلاۋدى بىرگە تالقىلادى.
ودان ءارى وقۋشىلار جەكە قۇندىلىقتارىن انىقتاپ، 10 جىلدىق دامۋ جوسپارىن قۇرىپ، تاڭدالعان ماقساتتارعا قول جەتكىزۋ ءۇشىن بەس نەگىزگى قادامدى ايقىندادى. قاتىسۋشىلار جىلعا، ايعا جانە ءبىر كۇنگە ارنالعان ناقتى تاپسىرمالاردى ءبولىپ، ۇلكەن ماقساتتارعا بىرتىندەپ جەتۋگە مۇمكىندىك بەرەتىن «ىسكە اسىرۋ پيراميداسىن» قالىپتاستىردى.
پراكتيكالىق بولىمدە قاتىسۋشىلار ءتيىمدى بىرلەسكەن جۇمىس ءۇشىن ءوزارا ۇيلەسىمدىلىك كريتەرييلەرى بويىنشا كوماندالارعا ءبولىندى. ءار كوماندا ءوز ىشىنەن شارتتى تۇردە «پرەمەر-مينيستر» ءرولىن اتقاراتىن ليدەردى سايلادى. كوماندالىق «ەلدىڭ» دامۋ ستراتەگياسىن ازىرلەۋ جانە ونى ناقتى ءىس-قيمىلدار جوسپارى ارقىلى قورعاۋ – پرەمەر-مينيستردىڭ نەگىزگى مىندەتى بولدى.
سونىمەن قاتار ءار كومانداعا مەملەكەت دامۋىنىڭ جەكە سەنارييى ۇسىنىلدى. تاپسىرمالار كۇردەلى جاعدايلاردى قامتىدى:
– ءبىر كومانداعا – حالىقتىڭ تەك 3% ءبىلىم دەڭگەيى، شاعىن اۋماق، قاتاڭ كليمات، ينفراقۇرىلىمنىڭ تومەندىگى، الايدا تەڭىزگە شىعۋ مۇمكىندىگى جانە 30 جىلعا ترانسۇلتتىق كورپوراسياعا بەرىلگەن مۇناي كەن ورىندارى ەسەبىنەن قالىپتاسقان بيۋدجەت؛
– ەكىنشى كومانداعا – بىرنەشە ۇلت پەن ءدىن، قولايلى كليمات، دامىعان ينفراقۇرىلىم، ءبىراق جوعارى دەڭگەيدەگى سىبايلاس جەمقورلىق ماسەلەسى بەرىلدى.
مۇنداي مودەلدىك جاعدايلار قاتىسۋشىلارعا ستراتەگيالىق ويلاۋدى تاجىريبە جۇزىندە قولدانۋعا جانە شەكتەۋلى رەسۋرستار جاعدايىندا باسقارۋشىلىق شەشىمدەر قابىلداۋعا مۇمكىندىك بەردى.
جاس سايلاۋشىلار پىكىرتالاسقا بەلسەندى قاتىسىپ، سۇراقتار قويىپ، ءوز ويلارىمەن ءبولىسىپ، ازىرلەگەن ستراتەگيالارىن سەنىمدى تۇردە قورعادى.
كۇن قورىتىندىسى بويىنشا بارلىق قاتىسۋشىلارعا سەميناردان وتكەنىن راستايتىن سەرتيفيكاتتار تابىستالدى. ءىس-شارا الماتى قالاسى اۋماقتىق سايلاۋ كوميسسياسىنىڭ جىلدىق جۇمىس جوسپارىنا ەنگىزىلگەن جوسپارلى ءىس-شارالاردىڭ ءبىرى بولدى.