2025 جىلعى 27 قاراشادا حالىقارالىق ينجەنەرلىك-تەحنولوگيالىق ۋنيۆەرسيتەتىندە (ميتۋ) جاساندى ينتەللەكتتىڭ قازىرگى قوعامداعى ءرولى مەن گۋمانيتارلىق عىلىمدارمەن ءوزارا ىقپالداستىعىنا ارنالعان «قازاقستان جاساندى ينتەللەكت داۋىرىندە: تاريح، مادەنيەت، ءتىل جانە تەحنولوگيالار ديالوگى» اتتى حالىقارالىق عىلىمي-تاجىريبەلىك كونفەرەنسيا ءوتتى. شاراعا قازاقستان، تۇركيا، وزبەكستان، پاكىستان جانە ءبىرقاتار شەتەلدىك عىلىمي ورتالىقتاردىڭ وكىلدەرى قاتىسىپ، وفلاين جانە ونلاين فورماتتا 200-دەن استام قاتىسۋشىنى بىرىكتىردى.
كونفەرەنسيانىڭ اشىلۋىندا ۋنيۆەرسيتەت رەكتورى دارحان بەرىك ۇلى اقپانبەتوۆ جاساندى ينتەللەكت دامۋىنىڭ جوعارى قارقىنى ءبىلىم بەرۋ، عىلىمي زەرتتەۋلەر، ءتىل ساياساتى مەن مادەنيەت سالالارىنا جاڭا تالاپتار قوياتىنىن اتاپ ءوتتى. ول جي تەحنولوگيالارىنىڭ قوعامنىڭ الەۋمەتتىك-مادەني قۇرىلىمىنا اسەرىن تالدايتىن عىلىمي الاڭدارعا سۇرانىس ارتىپ وتىرعانىن، سيفرلىق ترانسفورماسيا جاعدايىندا ءبىلىم بەرۋ جۇيەسىنىڭ ءادىسنامالىق نەگىزدەرىن قايتا قاراۋدىڭ وزەكتىلىگىن اتاپ ءوتتى.
پلەنارلىق ماجىلىستە ۇسىنىلعان باياندامالار جاساندى ينتەللەكتتىڭ ءپانارالىق سيپاتىن، ونىڭ الەۋمەتتىك-مادەني دامۋعا ىقپالىن جانە گۋمانيتارلىق عىلىمدارداعى جاڭا ءادىسنامالاردى قالىپتاستىرۋداعى ءرولىن ءار قىرىنان قاراستىردى. ق ر ۇعا اكادەميگى، پروفەسسور ماقتاعالي ءابدىماجيت ۇلى بەكتەمىسوۆ جي-دىڭ عىلىم مەن ءبىلىم سالاسىنداعى جۇيەلىك وزگەرىستەرگە ىقپالىن عىلىمي مودەلدەر ارقىلى تالقىلادى. PhD دوكتور زافارۋللاح ساحيتو زاماناۋي STEAM وقىتۋ قۇرىلىمىندا ءتىلدىڭ ينتەگراسيالىق ءرولىن كورسەتتى.
Kazakh-American University پرەزيدەنتى، اكادەميك اسىلبەك ابدياشيموۆيچ يساحوۆ جاساندى ينتەللەكتتىڭ ادامزات دامۋىنا اسەرىن، سيفرلىق قوعامداعى ەتيكالىق ولشەمدەر مەن الەۋمەتتىك جاۋاپكەرشىلىك ماسەلەلەرىن سارالادى. شاروف راشيدوۆ اتىنداعى سامارقاند مەملەكەتتىك ۋنيۆەرسيتەتىنىڭ پروفەسسورى باحتيار ەرگاشيەۆيچ ەرگاشيەۆ تۇركىستان گەنەرال-گۋبەرناتورلىعى داۋىرىندەگى ءىس جۇرگىزۋ قۇجاتتارىنا دەرەكتانۋلىق تالداۋ جاسادى.
سونىمەن قاتار، پروفەسسور جومارت قۇدايبەرگەن ۇلى سيمتيكوۆ گۋمانيتارلىق عىلىمداردىڭ سيفرلىق ترانسفورماسياعا بەيىمدەلۋىن، جي قۇرالدارى ارقىلى جاڭا زەرتتەۋ مۇمكىندىكتەرىن قاراستىردى. ميتۋ پروفەسسورى التىناي بۋرحاتوۆنا ابۋوۆا تۇيە ءسۇتىن سۋبليماسيالىق كەپتىرۋدىڭ عىلىمي-تەحنولوگيالىق پارامەترلەرىن تانىستىردى. تۇركيالىق زەرتتەۋشى يبراحيم كالقان قازاق شەجىرەسىن سيفرلاندىرۋ باعىتىنداعى جي قولدانبالارىن تالدادى.
كونفەرەنسيا اياسىندا ءۇش عىلىمي باعىتتىڭ جۇمىسى ۇيىمداستىرىلدى. تاريح جانە مادەني مۇرا باعىتىندا ارحيۆتىك ماتەريالداردى سيفرلاندىرۋ، تاريحي دەرەكتەردى جي ارقىلى تالداۋ، ۆيرتۋالدى مۋزەيلەر قۇرۋ ماسەلەلەرى قارالدى. ءتىل ساياساتىنا ارنالعان باعىتتا كوپتىلدى ءبىلىم بەرۋ، سيفرلىق لينگۆيستيكا جانە تىلدىك كونتەنتتى اۆتوماتتاندىرۋ سياقتى تاقىرىپتار تالداندى. ءۇشىنشى باعىت جاساندى ينتەللەكتىڭ ەكونوميكا، تەحنولوگيا جانە قوعامداعى ورنىقتى دامۋ پروسەستەرىنە اسەرىن زەرتتەۋگە ارنالدى.
فورۋم قورىتىندىسىندا سيفرلىق گۋمانيتاريستيكانىڭ بولاشاعى مەن جي تەحنولوگيالارىن عىلىمي پروسەستەرگە ينتەگراسيالاۋ جونىندە جاڭا عىلىمي تۇجىرىمدار جاسالدى. كونفەرەنسيا حالىقارالىق اكادەميالىق قاۋىمداستىق اراسىنداعى سەرىكتەستىكتى نىعايتۋدىڭ ماڭىزدى الاڭىنا اينالدى.
كونفەرەنسيا ميتۋ-دىڭ سيفرلىق ءداۋىر جاعدايىندا عىلىم مەن ءبىلىمنىڭ ساپالى دامۋىنا باعىتتالعان ستراتەگيالىق باستامالاردى قولدايتىنىن ايقىن كورسەتتى.