الداعى جىلىتۋ ماۋسىمىنا دايىندىق اياسىندا الماتىدا ينجەنەرلىك جەلىلەردى جوسپارلى تۇردە قايتا جاڭعىرتۋ جۇمىستارى جالعاسىپ كەلەدى. وسىعان بايلانىستى قالانىڭ ەكى اۋدانىندا ءبىرقاتار كوشەنىڭ كەي جەرىندە اۆتوكولىك قوزعالىسى ۋاقىتشا شەكتەلەدى.
31 مامىردان 20 شىلدەگە دەيىن المالى اۋدانىندا بوگەنباي باتىر كوشەسىنىڭ برۋنو كوشەسىنەن انوسوۆ كوشەسىنە دەيىنگى بولىگىندە ەكى باعىتتا دا كولىك قوزعالىسى شەكتەلەدى.
31 مامىردان 30 ماۋسىمعا دەيىن تۇركسىب اۋدانىندا كوتەلنيكوۆ كوشەسىنىڭ سەيفۋللين داڭعىلىنان اقان سەرى كوشەسىنە دەيىنگى بولىگىندە دە ەكى باعىتتا كولىك قوزعالىسى ۋاقىتشا توقتاتىلادى.
بۇل كوشەلەردە جولدىڭ استىنان وتەتىن ماگيسترالدىق قۇبىرلاردى قايتا جاڭارتۋ جۇمىستارىنىڭ قاۋىپسىزدىگىن قامتاماسىز ەتۋ ماقساتىندا ۋاقىتشا شەكتەۋلەر ەنگىزىلەدى.
اتالعان اۋدانداردا بيىل جالپى ۇزىندىعى 3 شاقىرىم بولاتىن، 1983-1985 جىلدارى پايدالانۋعا بەرىلگەن جىلۋ جەلىلەرى جاڭارتىلادى. بۇل 105 كوپقاباتتى تۇرعىن ءۇيدى، 5 جەكە ءۇيدى، 1 مەكتەپ پەن 3 وزگە دە نىساندى قىس مەزگىلىندە تۇراقتى جىلۋمەن قامتاماسىز ەتۋگە مۇمكىندىك بەرەدى.
سونىمەن قاتار، قايتا جاڭعىرتۋ جۇمىستارى كەزىندە تۇرعىندارعا ىستىق سۋ ۇزدىكسىز بەرىلەدى.
جالپى، بيىل قالا بويىنشا 39 شاقىرىم جىلۋ جەلىسىن قايتا جاڭارتۋ جوسپارلانعان. بۇل جەلىلەردىڭ توزۋ دەڭگەيىن 54%-عا دەيىن تومەندەتۋگە مۇمكىندىك بەرەدى.
ەستەرىڭىزگە سالا كەتەيىك، قوزعالىستى شەكتەۋ تۋرالى بارلىق اقپارات Almaty.kz سايتىندا، @AlmatyJoly Telegram ارناسىندا، اۋدان اكىمدىكتەرى مەن باسقارمالاردىڭ الەۋمەتتىك جەلىلەرىندە، سونداي-اق، 2GIS جانە ياندەكس كارتالار سەرۆيستەرىندە جاريالانعان.
ۋاقىتشا قولايسىزدىققا تۇسىنىستىكپەن قاراۋدى سۇرايمىز.