12-23 مامىرى ارالىعىندا مۇحتار اۋەزوۆ اتىنداعى قازاق ۇلتتىق دراما تەاترى تۇركىستان، شىمكەنت، تاراز قالالارىندا گاسترولدىك ساپارمەن ونەر كورسەتەدى، دەپ حابارلايدى aqshamnews.kz
قازاق ونەرىنىڭ قاراشاڭىراعى مۇحتار اۋەزوۆ اتىنداعى قازاق ۇلتتىق دراما تەاترى ەڭ تاڭداۋلى قويىلىمدارىن تۇركىستان، شىمكەنت، تاراز كورەرمەنىنىڭ نازارىنا ۇسىنادى.
مەملەكەت باسشىسى قاسىم-جومارت توقايەۆ 2024 جىلى «مادەنيەت جانە ونەر قىزمەتكەرلەرى كۇنىنە» وراي وتكەن سالتاناتتى جيىندا مۇحتار اۋەزوۆ اتىنداعى قازاق ۇلتتىق دراما تەاترى عيماراتىنىڭ تولىعىمەن قايتا جوندەۋدەن وتەتىنى تۋرالى مالىمدەگەن بولاتىن. بۇل جۇمىس اتالعان ونەر ورداسىنىڭ 100 جىلدىق مەرەيتوي سالتاناتىنا وراي، ياعني 2026 جىلى اياقتالادى.
تەاتر عيماراتى كۇردەلى جوندەۋگە تاپسىرىلعاننان كەيىن م. اۋەزوۆ اتىنداعى قازاق ۇلتتىق دراما تەاترىنىڭ شىعارماشىلىق ۇجىمى رەسپۋبليكا ايماقتارى مەن الىس-جاقىن شەتەلدەرگە گاسترولدىك ساپارلارمەن بارىپ، ءوزىنىڭ بىرەگەي جۇمىستارى – سپەكتاكلدەرىمەن قالىڭ جۇرتشىلىقتى قۋانتۋدا.
عاسىرلىق بەلەس الدىندا جاسالعان ونەر ساپارىندا الىس-جاقىن شەت ايماقتار مەن ەل قالالارىندا ۇلت تەاترىنىڭ ەڭ تاڭداۋلى قويىلىمدارى ساحنالانىپ كەلەدى. ناقتى ايتقاندا، وزبەكستان، قاراقالپاقستان، قىرعىزستان مەملەكەتتەرى مەن اقتوبە، قوستاناي، قاراعاندى، جەزقازعان سىندى قالالاردا گاسترولدىك ساپارمەن بولدى. تەاتر ۇجىمىنىڭ كەزەكتى ايالداماسى – تۇركىستان، شىمكەنت، تاراز شاھارلارى بولماق.