اۋەزوۆ اۋدانىندا سوڭعى 5 جىلدا سالىنعان تۇرعىن ءۇي كەشەندەرىندەگى اۋلالارعا كوپتىڭ كوڭىلى تولمايدى
الماتىنىڭ اۋەزوۆ اۋدانىندا 161 اۋلادا كۇردەلى جوندەۋ جۇمىستارى ءجۇرىپ جاتىر. مەردىگەر كومپانيا وكىلدەرى شارۋانى كۇزدىڭ سوڭىنا دەيىن اياقتاماق. ايتا كەتەيىن، قالا اكىمىنىڭ كەزدەسۋى كەزىندە اۋدان تۇرعىندارى اباتتاندىرۋ مەن جارىق باعانالارىنا قاتىستى ماسەلەنى كوپ كوتەرگەن بولاتىن. تولىعىراق Almaty-akshamy.kz Almaty.tv-گە سىلتەمە جاساپ.
اۋەزوۆ اۋدانىندا سوڭعى 5 جىلدا سالىنعان تۇرعىن ءۇي كەشەندەرىندەگى اۋلالارعا كوپتىڭ كوڭىلى تولمايدى. اسىرەسە بالالار الاڭى مەن سكۆەرلەر ساپاسىز ورناتىلعان، اباتتاندىرۋ جۇمىستارى اقساپ تۇر دەيدى حالىق. بۇل ماسەلەنى قالا باسشىسى اۋدان جۇرتىمەن كەزدەسكەندە دە ايتقان.
حالىق شاعىمىن تىڭداعان قالا اكىمى جاۋاپتىلارعا بىردەن تاپسىرما جۇكتەگەن. اۋدان باسشىلىعى مەكەنجايلارعا ارنايى بارىپ تەكسەرۋ جۇرگىزدى. مۇنداعى ويىن الاڭقايلارىن جەكەمەنشىك مەردىگەر كومپانيا سالعان. ەندى ولار ءوز قاراجاتىنا قايتا جوندەۋ جۇرگىزىلەرى كەرەك.
«قالا اكىمىنىڭ كەزدەسۋىنەن كەيىن مەردىگەر كومپانيا وكىلدەرىن شاقىردىق. بالالار الاڭىنداعى ولقىلىقتاردى ءبىر ايدىڭ ىشىندە كەلىپ، دەر كەزىندە جوندەپ كەتتى. جۇمىس تولىق اياقتالدى دەپ ايتۋعا ەرتە. ەندى جارىق باعانالارىن ورناتۋ عانا قالدى. بۇل شارۋا دا ءۇيدى تۇرعىزعان جەكە مەنشىك كومپانيانىڭ جاۋاپكەرشىلىگىندە»، – دەدى «سپۋتنيك» تۇرعىن ءۇي كەشەنىنىڭ باسقارۋشىسى اباي ەرىمبەتوۆ.
«بىزدەر ءوتىنىش جازدىق، تۇرعىندار بولىپ. اكىمشىلىككە، جكح-عا جازدىق. سودان كەيىن قايتادان جاساپ بەردى بۇل جەردى، راقمەتىمىزدى ايتامىز. ءقازىر وتە ىڭعايلى، بالالارىمىز تاڭنان كەشكە دەيىن وسى جەردە وينايدى شىنى كەرەك»، – دەدى اۋەزوۆ اۋدانىنىڭ تۇرعىنى گۇلدانا سافەيەۆا.
سونداي-اق، ءقازىر جەرگىلىكتى بيۋدجەت قاراجاتى ەسەبىنەن 161 اۋلاعا كۇردەلى جوندەۋ جۇرگىزىلىپ جاتىر. جۇمىس 15 قىركۇيەكتە باستالعان.
«ءبىزدىڭ جوسپار بويىنشا 191 اۋلا جوندەلۋى كەرەك بولاتىن. ءقازىر 161 اۋلاعا ءجوندۋ جۇرگىزىلىپ جاتىر. بىزدە قالعان 7 جانە 12 ىقشام اۋداندارى. ءقازىر اۋا رايىنىڭ قۇبىلاۋىنا بايلانىستى بۇل جۇمىستاردى كەيىنگى جىلعا قالدىرامىز دەپ جوسپارلاپ وتىرمىز»، – دەدى اۋەزوۆ اۋداندىق كوممۋنالدىق شارۋاشىلىق ءبولىمىنىڭ باسشىسى ەراسىل باقىتجان ۇلى.
اۋلانى اباتتاندىرۋ مەن بالالار الاڭىن سالۋ جۇمىستارىنىڭ باسىم بولىگى «حالىق قاتىساتىن بيۋدجەت» جوباسى ەسەبىنەن جۇرگىزىلەدى. تۇرعىندار يگىلىگىن كورىپ ۇلگەرگەن قالالىق باعدارلاما الداعى جىلى دا جالعاسادى.