الاتاۋ اۋدانىنىڭ اعىمداعى جىلدىڭ 11 ايىنداعى ەكونوميكالىق ناتيجەلەرى تۋرالى ونىڭ اكىمى ازامات قالدىبەكوۆ وڭىرلىك كوممۋنيكاسيالار قىزمەتىندە وتكەن بريفينگتە ايتىپ بەردى دەپ حابارلايدى almaty-akshamy.kz
الاتاۋ اۋدانى باسشىسىنىڭ ايتۋىنشا، 2021 جىلدىڭ 11 ايىندا مەملەكەتتىك بيۋدجەتكە 49 ملرد 153 ملن تەڭگە تۇسكەن. ونىڭ ىشىندە رەسپۋبليكالىق بيۋدجەتكە 26 ملرد 803 ملن تەڭگە، جەرگىلىكتى بيۋدجەتكە 22 ملرد 350 ملن تەڭگە ءتۇستى.
- ونەركاسىپتىك ءونىم ءوندىرىسىنىڭ كولەمى 11 ايدا 259،6 ملرد تەڭگەنى قۇرادى، - دەدى ازامات قالدىبەكوۆ. – 11 ايدا نەگىزگى كاپيتالعا ينۆەستيسيالار – 105 ملرد 400 ملن تەڭگە.
ونىڭ ايتۋىنشا، بيىل جۇمىس ورىندارىن قۇرۋ جوسپارى 104،2%-عا ورىندالدى – جىل باسىنان بەرى 3 960 جۇمىس ورنى اشىلدى.
بيىلعى جىلى اۋدان كاسىپورىندارىنا بەرىلەتىن سۋبسيديانىڭ جالپى سوماسى 182 ملن 448 مىڭ تەڭگەنى قۇراپ، 145 جاڭا جۇمىس ورنىن اشتى.
- «قاراپايىم زاتتار ەكونوميكاسى» باعدارلاماسى بويىنشا بيىل ءوندىرىستى كەڭەيتۋ ءۇشىن «ماسلو-دەل» ج ش س سۋبسيديالاندى. نەسيەلەۋدىڭ جالپى سوماسى – 7،8 ملرد تەڭگە، سۋبسيديا سوماسى – 585 ملن تەڭگە. «بيزنەستىڭ جول كارتاسى – 2025» باعدارلاماسى بويىنشا ءبىرىنشى باعىت بويىنشا جالپى سوماسى 373،3 ملن تەڭگەگە 63 جوبا نەسيە قاراجاتىن الدى. اتالعان باعدارلامانىڭ ەكىنشى باعىتى بويىنشا-جالپى سوماسى 4 ملرد 34 ملن تەڭگەدەن اساتىن 31 جوبا. Almaty business – 2025 وڭىرلىك باعدارلاماسى اياسىندا 24 جوبا جالپى سوماسى 332،1 ملن تەڭگەگە نەسيە الدى، 69 جاڭا جۇمىس ورنى اشىلدى، - دەدى الاتاۋ اۋدانىنىڭ اكىمى.
بۇگىندە اۋدان ونەركاسىبى ەكى ءىرى كومپانيادان («ماسلو-دەل» ج ش س جانە «HyundaiTransKazakhstan» ج ش س)، ءتورت ورتا كومپانيادان («الماتى ەلەكتر قالقاندارى زاۋىتى» ج ش س، «ليبەللابوتلەرس الماتى» ج ش س، «بيجان» ج ش س جانە «تەحنوۆيد پليۋس» ج ش س) تۇرادى