ەلىمىزدە اۆتوكولىكتەرىن ساقتاندىرىپ جاتقان جۇرگىزۋشىلەر قاتارى ارتتى.
كوشتى الماتى قالاسىنىڭ تۇرعىندارى باستاپ تۇر، دەپ حابارلايدى aqshamnews.kz
بۇعان سوڭعى جىلدارى جول كولىك وقيعالارىنىڭ كۇرت كوبەيۋى تۇرتكى بولىپ وتىر. بيىلدىڭ وزىندە جول اپاتىنان 9 مىڭعا جۋىق ادام زارداپ شەگىپتى. بۇل وتكەن جىلدىڭ سايكەس كەزەڭىمەن سالىستىرعاندا 65 پايىزعا كوپ.
بىرىككەن ۇلتتار ۇيىمىنىڭ مالىمەتىنشە، قازاقستان – جول اپاتى بويىنشا الەمدىك رەيتينگتە ءۇشىنشى ورىندا تۇر. بيىل نەبارى 3 ايدىڭ ىشىندە 6 مىڭ 200-دەن اسا دەرەك تىركەلىپتى. بۇل وتكەن جىلدىڭ سايكەس كەزەڭىمەن سالىستىرعاندا ءبىر جارىم ەسە كوپ. ال زارداپ شەككەندەر سانى 9 مىڭعا جۋىقتاعان. ونىڭ 8 مىڭنان استامى اۋىر جاراقات العان.
وسىدان تۋرا 10 جىل بۇرىن كورسەتكىش 3 مىڭ مەن 5 مىڭنىڭ اراسىندا، ياعني 2،5 ەسە تومەن بولعان. وقىس جاعدايلاردىڭ كوبەيۋى ازاماتتاردى جەكە كولىك قۇرالىن دا، وزدەرىنىڭ ءومىرىن دە ساقتاندىرۋعا يتەرمەلەگەن سىڭايلى. جول اپاتى – دەنساۋلىققا زيان كەلتىرىپ قانا قويماي، قالتاعا سالماق سالاتىنى بەلگىلى. ال ساقتاندىرۋ ارقىلى تەمىر تۇلپار يەلەرى ەم-دوم شارالارى مەن اۆتوكولىكتى جوندەۋگە كەتكەن شىعىنداردى وتەپ الا الادى. ءقازىر ەلىمىزدە مۇنداي قىزمەت كورسەتەتىن 25 كومپانيا بار.
ەلىمىزدە اۆتوكولىكتى ساقتاندىرۋدىڭ ەكى جولى بار. ءبىرى – مىندەتتى ساقتاندىرۋ بولسا، ەكىنشىسى – ەرىكتى ساقتاندىرۋ، ياعني كاسكو.
مىندەتتى ساقتاندىرۋ
ازاماتتار كوپ جاعدايدا تەك العاشقىسىن تاڭدايدى. ويتكەنى ءاربىر قازاقستاندىق ونى راسىمدەۋگە مىندەتتى، ءارى باعاسى دا ارزان. ەگەر جۇرگىزۋشىدە مۇنداي ساقتاندىرۋ ءپوليسى بولماسا، كولىك ايداۋعا رۇقسات ەتىلمەيدى. ال ۋاقىتى ءوتىپ كەتسە، ايىپپۇل سالىنادى.
الايدا مىندەتتى بۇل ساقتاندىرۋدىڭ وتەماقى مولشەرى دە شەكتەۋلى. ماسەلەن جول اپاتى سالدارىنان ادام دەنساۋلىعىنا زاقىم كەلسە – كومپانيا 300 ايلىق ەسەپتىك كورسەتكىش مولشەرىندە، ياعني، 1 ميلليون 200 مىڭ تەڭگەگە دەيىن عانا تولەيدى. ال قازا تاپسا – 2 مىڭ ايلىق ەسەپتىك كورسەتكىش كولەمىندە اقشا بەرىلەدى. بۇل شامامەن 7،9 ميلليون تەڭگە. اتالعان سوما دەنە جاراقاتتارى مەن كولىكتى جوندەۋگە كەتەتىن قاراجاتتى جابۋعا جەتپەۋى مۇمكىن.
مىندەتتى ساقتاندىرۋ – ءۇشىنشى تۇلعاعا كەلگەن زالالدى عانا وتەيدى. ەگەر ءسىزدىڭ كولىگىڭىز ورتەنسە، ۇرلانسا، بۇزىلسا ەشقانداي كومەك جوق. جول اپاتىنا ءسىز كىنالى بولساڭىز، وتەماقى ءتىپتى بەرىلمەيدى. تەك زارداپ شەككەن تاراپتىڭ ەمىنە جانە مۇلكىنە كەلگەن شىعىن تولەنەدى.
ەرىكتى ساقتاندىرۋ
ساقتاندىرۋدىڭ ەكىنشى ءتۇرى – كولىكتى بارلىق جاعدايدان كەشەندى ساقتاندىرۋ. الايدا كوپشىلىك ونى ەرىكتى بولعاندىقتان ەلەمەيدى. مامانداردىڭ ايتۋىنشا، اۆتوكولىكتى 17 قاۋىپتەن ساقتاندىرۋعا بولادى. اتاپ ايتساق: ءورت، جارىلىس، جول كولىك وقيعاسى، ۇساق بۇزاقىلىق، ۇرلىق، تابيعي اپات، ۆانداليزم، تاعى دا باسقالارى. سوندىقتان دا بۇل ساقتاندىرۋدىڭ قۇنى شامالى قىمباتىراق.
"ەرىكتى ساقتاندىرۋ – تەك جول كولىك وقيعاسىنان عانا قورعاپ قويماي، اۆتوكولىگىڭىزگە بۇرشاق تۇسەتىن بولسا، تال قۇلايتىن بولسا، ءزىلزالا، جەر سىلكىنىسى سياقتى تابيعي فورس-ماجوردىڭ بارىنەن كەلگەن زاقىمداردىڭ ءبارىن تولىقتاي جابادى. 80 پايىزدان استام كولىككە زاقىم كەلەتىن بولسا، تولىقتاي سوماسىن الۋعا مۇمكىنشىلىك بار. ەندى ونىڭ ىشىندە فرانچايزينگتىڭ باعاسى – سىزگە تولەنەتىن تولەمنەن ۇستالىپ قالاتىن اقشاسى بار. ونى ساقتاندىرۋ پوليۋستارىنان ءبىلىپ، ەڭ ءتيىمدى، قولايلى جاعىن تاڭداپ العان ءجون"، – دەدى اۆتوساراپشى ەركەبۇلان قۇلباسوۆ.
ايتا كەتەيىك، ەرىكتى ساقتاندىرۋدى ەڭ كوپ تاڭدايتىندار – الماتىلىق جۇرگىزۋشىلەر. ودان كەيىن – الماتى وبلىسىنىڭ تۇرعىندارى، ءۇشىنشى ورىندا – ەلوردالىقتار تۇر. ال سولتۇستىك ءوڭىر مەن قوستاناي وبلىسىنىڭ جۇرتى بۇل قىزمەتتى سيرەك پايدالاناتىن كورىنەدى.
كاسكو-نى ءاربىر تۇتىنۋشى قوسىمشا ساقتاندىرۋ رەتىندە راسىمدەۋگە قۇقىلى. ءبىراق ول مىندەتتى ساقتاندىرۋدىڭ ورنىنا جۇرمەيدى. الايدا سوڭعى جىلدارى ەكى ءپوليستى دە بىرگە العان ازاماتتاردىڭ قاتارى ارتقان. بۇل - كولىك يەلەرى قانداي جاعدايعا تاپ بولسا دا، كەز كەلگەن شىعىننىڭ وتەلەتىنىنە كەپىلدىك بەرەدى. دەسە دە، جازاتايىم جاعدايدان ساق بولايىق!