ۇلتتىق ستاتيستيكا بيۋروسى قازاقستاندىقتاردىڭ ۇيقىعا، جۇمىسقا، تاماققا جانە دەمالىسقا قانشا ۋاقىت جۇمسايتىنىن ەسەپتەدى، دەپ حابارلايدى aqshamnews.kz
2024 جىل ىشىندە (قاڭتاردان جەلتوقسانعا دەيىن) ۇلتتىق ستاتيستيكا بيۋروسى "حالىقتىڭ ۋاقىت بيۋدجەتىن پايدالانۋى" ءبىرجولعى مودۋلدىك زەرتتەۋىن جۇرگىزدى. ساۋالنامانىڭ ماقساتى – حالىقتىڭ ءوز ۋاقىتىن پايدالانۋى تۋرالى اقپارات الۋ، جۇمىس پەن جەكە ءومىر اراسىنداعى تەپە-تەڭدىكتى، ءومىر سالتىنداعى وزگەرىستەردى انىقتاۋ. 2024 جىلى وعان 10 جانە ودان جوعارى جاستاعى 11 914 رەسپوندەنت قاتىستى.
زەرتتەۋ ناتيجەلەرى بويىنشا قازاقستاندىقتاردىڭ (10 جاستان اسقان) ورتاشا العاندا تاۋلىكتىڭ 54،2% (13 ساعات) جەكە كۇتىمگە (ۇيقى – 9 ساعات 26 مينۋت)، تاماق پەن سۋسىنعا – 1 ساعات 57 مينۋت، جەكە گيگيەنا جانە كۇتىم – 1 ساعات 27 مينۋتىن جۇمسايدى. ال قالعان ۋاقىتىنىڭ:
12،2% (2 ساعات 56 مينۋت) ۋاقىتىن جۇمىسقا (جۇمىسپەن قامتۋعا)،
13،5% (3 ساعات 14 مينۋت) – ءۇي شارۋاشىلىعىن جۇرگىزۋگە،
2% (28 مينۋت) - وقۋعا،
0،8% (12 مينۋت) – جەكە پايدالانۋ ءۇشىن تاۋارلار وندىرۋگە جۇمسايدى،
ال قالعان 17،3% (4 ساعات 9 مينۋت) – بوس ۋاقىت.
15 جاستان اسقان ەر ادامدار كۇنىنە ورتا ەسەپپەن 5 ساعات 13 مينۋت جۇمىس ىستەيدى، ايەلدەر ءۇشىن بۇل كورسەتكىش 4 ساعات 18 مينۋتتى قۇرايدى. الايدا، ايەلدەردە ءۇي شارۋاشىلىعىن جۇرگىزۋ ەر ادامدارعا قاراعاندا (1 ساعات 51 مينۋت) ۇزاعىراق ۋاقىت الادى (4 ساعات 5 مينۋت). ەر ادامداردىڭ ايەلدەرگە قاراعاندا بوس ۋاقىتى شامامەن 2 ەسە كوپ - سايكەسىنشە 4 ساعات 4 مينۋت جانە 2 ساعات 56 مينۋت.
جۇمىسپەن قامتىلعان ەر ادامدار جۇمىسقا ورتا ەسەپپەن 9 ساعات 7 مينۋت، ايەلدەر 7 ساعات 57 مينۋت جۇمسايدى، بوس ۋاقىتقا سايكەسىنشە 2 ساعات 31 مينۋت جانە 1 ساعات 50 مينۋت قالادى.
زەرتتەۋ 6 جىلدا ءبىر رەت جۇرگىزىلەدى.
ايتا كەتسەك، 2024 جىلى قالدىقتار كولەمى 11،4% ءوستى. بۇل جايلى بۇگىن، 2025 جىلعى 6 مامىردا ق ر ۇلتتىق ستاتيستيكا بيۋروسىنىڭ باسپا ءسوز قىزمەتى مالىمدەدى.