الماتى ءسان جانە قىزمەت كورسەتۋ سالاسى كوللەدجىنىڭ ستۋدەنتتەرى ءۇشىن «زاڭ جانە ءتارتىپ» يدەولوگياسىن ءتۇسىندىرۋ ماقساتىندا تەلەكوپىر فورماتىندا كەزدەسۋ ءوتتى.
جاستارمەن كەزدەسۋگە الماتى قالاسى بويىنشا قاج دەپارتامەنتىنە قاراستى №11 مەكەمەنىڭ سوتتالعاندار اراسىنداعى الەۋمەتتىك پسيحولوگيالىق تاربيە جۇمىسى ءبولىمىنىڭ جاساق باستىعى ادىلەت مايورى ميات قاناتوۆ، وسى مەكەمەنىڭ الەۋمەتتىك-پسيحولوگيالىق تاربيە جۇمىسىنىڭ قىزمەتكەرى ەركەگۇل جەڭىسحان، المالى اۋدانىنىڭ ءبولىم پروكۋرورى ەرنازار سايماساي، المالى اۋدانى پب ققب يۋپب اعا ينسپەكتورى پوليسيا مايورى مەرۋەرت سيموۆا جانە پوليسيا اعا لەيتەنانتى جۇمابەك التىنبەك قاتىستى.
ولار زاڭ پەن ءتارتىپ كەز كەلگەن مەملەكەتتىڭ تۇراقتى دامۋىنىڭ نەگىزى ەكەنىن، مەملەكەتتىك ينستيتۋتتاردىڭ ءتيىمدى جۇمىس ىستەۋى مەملەكەتتىك ورگانداردىڭ دا، ازاماتتىق قوعامنىڭ دا زاڭ نورمالارىن قاتاڭ ساقتاۋىمەن عانا مۇمكىن ەكەنىن اتاپ ءوتتى. جاستار مەيماندارعا زاڭ مەن ءتارتىپ توڭىرەگىندەگى ساۋالدارىن قويىپ، ءوزارا پىكىر الماستى.
تەلەكوپىرگە №11 مەكەمەدە، ياعني بالالار كولونياسىنىندا جازاسىن وتەپ جاتقان باقداۋلەت ەسىمدى ءجاسوسپىرىم دە ونلاين قوسىلىپ، ول دا ءسوز الدى. باس بوستاندىعىنان ايىرىلعان بوزبالا بۇل جولعا قالاي تۇسكەنىن، قانداي جازا ارقالاعانىن جانە زاڭعا باعىنباي ءتارتىپ بۇزعانىنا وكىنەتىنىن دە تىلگە تيەك ەتتى. كوللەدج ستۋدەنتتەرىن، ياعني زامانداستارىن سونداي قاتەلىكتەرگە ۇرىنباۋعا، بوستاندىقتاعى ءومىردىڭ ءقادىرىن بىلۋگە شاقىردى.
«ءبىز جاستاردىڭ بويىندا زاڭعا باعىناتىن مىنەز-قۇلىقتى قالىپتاستىرۋعا باعىتتالعان وسىنداي ءىس-شارالاردى ءجيى ۇيىمداستىرىپ وتىرامىز. كەز كەلگەن بالانىڭ جولدان تايىپ كەتپەۋىن، جاقسى ازامات بولىپ ءوسۋىن قالايمىز. وسىناۋ ەگەمەن ەلىمىزدىڭ بولاشاعى بۇگىنگى جاستاردىڭ قولىندا ەكەنىن ۇنەمى ايتىپ جۇرەمىز. قوعامنىڭ، اينالانىڭ، ادامداردىڭ، ۇلكەن-كىشىنىڭ قاۋىپسىزدىگى بىزگە دە بايلانىستى، ول ءۇشىن ءبىلىمدى، ءتارتىپتى، پاتريوت بولۋ شارت ەكەنىن دە قايتالاۋدان جالىقپايمىز. سوندا عانا قۇقىقتىق مەملەكەتتى نىعايتا الامىز. مىنە، ءقازىر عانا تەلەكوپىردە سوتتى بولعان جەتكىنشەك سويلەدى. ونىڭ ىس-ارەكەتى بىزگە ساباق بولۋعا ءتيىس. جاستار وسىنداي كەزدەسۋلەر ارقىلى زاڭ تالاپتارىن بۇزۋدىڭ قۇقىقتىق سالدارىن ءتۇسىنۋى، زاڭ نورمالارىن ساقتاۋدىڭ ماڭىزدىلىعىن ءبىلىپ ءجۇرۋى كەرەك دەپ ويلايمىن»، – دەيدى الماتى ءسان جانە قىزمەت كورسەتۋ سالاسى كوللەدجى ديرەكتورىنىڭ تاربيە ءىسى جونىندەگى ورىنباسارى كۇنىماي وماروۆا.