2026 جىلى 23 قاڭتاردا الماتى قالاسىندا Satbayev University بازاسىندا گەنەرال-لەيتەنانت ءادىل شاياحمەتوۆ اتىنداعى عارىشتىق بايلانىس زەرتحاناسىنىڭ سالتاناتتى اشىلۋ ءراسىمى وتەدى. ءىس-شارا ۋنيۆەرسيتەتتىڭ «ەلەكترونيكا، تەلەكوممۋنيكاسيا جانە عارىشتىق تەحنولوگيالار» كافەدراسىندا ۇيىمداستىرىلادى.
زەرتحانانىڭ اشىلۋى الماتى قالاسىنىڭ جاستار ساياساتى باسقارماسىنىڭ قولداۋىمەن ىسكە اسىپ، مەگاپوليستىڭ ينجەنەرلىك جانە عىلىمي الەۋەتىن دامىتۋداعى ماڭىزدى قادام بولماق.
جاڭا زەرتحانا ۋنيۆەرسيتەتتىڭ تاريحي تاۋ-كەن مەتاللۋرگيا كورپۋسى عيماراتىندا ورنالاسقان جانە سپۋتنيكتىك تەحنولوگيالار، ناۆيگاسيالىق جۇيەلەر مەن جەردى قاشىقتان زوندتاۋ سالاسى بويىنشا مامان دايارلاۋعا باعىتتالعان. زەرتحانا زاماناۋي VSAT سپۋتنيكتىك انتەننالىق جۇيەسىمەن، جوعارى جىلدامدىقتى دەرەك الماسۋعا ارنالعان HT2300 مودەمىمەن، سونداي-اق MATLAB جانە ArcGIS Pro باعدارلامالىق كەشەندەرىمەن جابدىقتالعان. بۇل ستۋدەنتتەر مەن جاس زەرتتەۋشىلەرگە بايلانىس جۇيەلەرىن مودەلدەۋگە جانە سپۋتنيكتىك دەرەكپەن ناقتى ۋاقىت رەجيمىندە جۇمىس ىستەۋگە مۇمكىندىك بەرەدى.
زەرتحانا Satbayev Universityء-دىڭ 1978 جىلعى تۇلەگى، گەنەرال-لەيتەنانت ءادىل شاياحمەتوۆتىڭ قۇرمەتىنە اتالدى جانە 2024-2029 جىلدارعا ارنالعان ينجەنەرلىك ءبىلىم بەرۋدى دامىتۋ جونىندەگى مەملەكەتتىك تۇجىرىمداما اياسىندا جۇزەگە اسىرىلدى. جوبا ناقتى ەكونوميكا سەكتورىندا سۇرانىسقا يە جوعارى بىلىكتى ينجەنەرلىك ماماندار دايارلاۋعا جانە جوعارى ءبىلىم بەرۋدەگى تاجىريبەلىك باعىتتى كۇشەيتۋگە باعىتتالعان.
اشىلۋ راسىمىنە Satbayev University باسشىلىعى، الماتى قالاسى اكىمىنىڭ ورىنباسارى ابزال نۇكەنوۆ، «حالىق قاھارمانى» اتاعىنىڭ يەگەرى، گەنەرال-پولكوۆنيك ءسات توقپاقبايەۆ، ق ر ۇعا اكادەميگى بايان راقىشيەۆ، سونداي-اق عىلىمي قاۋىمداستىق وكىلدەرى، سالالىق ساراپشىلار مەن قۇرمەتتى قوناقتار قاتىسپاق.
ءىس-شاراعا بۇقارالىق اقپارات قۇرالدارىنىڭ وكىلدەرى شاقىرىلادى.