الماتىدا پوليسيا تۇرمىسى ناشار وتباسىلاردى تۇرعىلىقتى جەرى بويىنشا تەكسەرۋ جۇمىستارىن جۇرگىزۋدە، - دەپ حابارلايدى aqshamnews.kz Polisia.kz-كە سىلتەمە جاساپ.
قازاقستان رەسپۋبليكاسى ىشكى ىستەر ءمينيسترى جاريالاعان "پروفيلاكتيكا جىلى" اياسىندا "پوليسيا زاڭ مەن ءتارتىپ كۇزەتىندە" ۇرانىمەن الماتىدا 16-23 ماۋسىم ارالىعىندا "وتباسى" قالالىق جەدەل-پروفيلاكتيكالىق ءىس-شاراسى وتۋدە. ءىس-شارانىڭ باستى ماقساتى – وتباسى-تۇرمىستىق قاتىناستار سالاسىندا جاسالاتىن قىلمىستار مەن قۇقىق بۇزۋشىلىقتاردىڭ الدىن الۋ، سونىمەن قاتار حالىقتىڭ قۇقىقتىق ساۋاتتىلىعىن ارتتىرۋ. پوليسەيلەر بۇرىن تۇرمىستىق زورلىق-زومبىلىق جاساعانى ءۇشىن ايىپتالعان ازاماتتاردى، سونداي-اق تۇرمىسى ناشار وتباسىلاردى تۇرعىلىقتى جەرى بويىنشا تەكسەرۋ جۇمىستارىن جۇرگىزۋدە. اگرەسسيۆتى وتباسى مۇشەلەرىنە قاتىستى شىعارىلعان قورعانىس نۇسقاۋلىعى مەن ارنايى تالاپتاردىڭ ساقتالۋىن باقىلاۋعا ەرەكشە نازار اۋدارىلۋدا.
- تۇرمىستىق زورلىق-زومبىلىق - جەكە ماسەلە ەمەس، قوعامدىق قاۋىپسىزدىككە قاتەر توندىرەتىن ماسەلە. "وتباسى" ءجاى اياسىندا ءبىز كۇن سايىن بۇرىن جانجالدار تىركەلگەن مەكەنجايلارعا شىعىپ، وتباسىلارمەن سويلەسىپ، زاڭنامانى ءتۇسىندىرىپ وتىرامىز. ءبىز ءۇشىن تۇيتكىلدى ماسەلەنى انىقتاۋ عانا ەمەس، قايعىلى وقيعالاردىڭ الدىن الۋ ماڭىزدى. الدىن الۋ – باستى مىندەت، - دەدى، تۇركسىب اۋداندىق پوليسيا باسقارماسىنىڭ باستىعى دۋمان اۋحادييەۆ.
بايانداماشىنىڭ ايتۋىنشا، شارا بارىسىندا ءبىر عانا تۇركسىب اۋدانى بويىنشا 415 قورعاۋ نۇسقاماسى شىعارىلىپ، الەۋەتتى قۇقىق بۇزۋشىلاردىڭ ىس-ارەكەتىن شەكتەۋ بويىنشا 81 ىسكە قاتىستى ارنايى تالاپتار قولدانىلعان.