سوتتى بولىپ، باس بوستاندىعىنان ايىرىلعان جاسوسپىرىمدەر جازاسىن وتەپ جاتقان №11 مەكەمە اۋماعىنداعى №3 جالپى ءبىلىم بەرەتىن مەكتەپتى بىتىرگەن بيىلعى تۇلەكتەر دە اتتەستات الدى.
سالتاناتتى جيىن ەلىمىزدىڭ انۇرانىمەن باستالدى. ورتاعا 9 جانە 11- سىنىپتى ءبىتىرۋشى تۇلەكتەر سىنىپ جەتەكشىلەرىمەن شىقتى. №11 مەكەمەنىڭ تاربيە ءبولىمىنىڭ باستىعى، ادىلەت پودپولكوۆنيگى الما بازىلبايەۆا جازالى جاسوسپىرىمدەردى مەرەكەمەن قۇتتىقتاپ، بولاشاقتا جاقسى ازامات بولىپ شىعاتىندىقتارىنا سەنىم ءبىلدىردى.
مەكتەپتىڭ وقۋ جانە تاربيە جونىندەگى ورىنباسارلارى ليۋدميلا ۆاسيليەۆنا مەن ايزادا ءابدىمادي قىزى دا جىلى لەبىزدەرىن جەتكىزىپ، 11-سىنىپتى بىتىرگەن 17 وقۋشىعا، 9-سىنىپ بىترگەن 4 وقۋشىعا اتتەستات تابىستادى.
جالپى، 21 ءجاسوسپىرىم جالپى جانە نەگىزگى ورتا ءبىلىم تۋرالى اتتەستات الىپ، قۋانىشقا بولەندى. 11-سىنىپتى بىتىرگەن 5 ەكپىندى وقۋشى «ماقتاۋ قاعازىمەن» جانە قوعامدىق جۇمىستارعا بەلسەنە قاتىسقان وقۋشىلار «العىس حاتپەن» ماراپاتتالدى. ءىس-شارا كونسەرتتىك باعدارلامامەن جالعاستى.
بۇل ءسات تە ەستە قالسىن دەگەن نيەتپەن، مەكتەپ بىتىرۋشىلەر تىلەكتەر جازىلعان ءتۇرلى-تۇستى شارلاردى كوككە ۇشىردى. بالالاردىڭ وزدەرى تەمىر تورلى قورشاۋدا جۇرسە دە، ولاردىڭ اسقاق ارمانى جازىلعان شارلار ەش كەدەرگىسىز اسپان الەمىنە جول تارتتى.