40-تان استام ەلدىڭ وقۋشىلارى قاتىسقان اعىلشىن ءتىلى بويىنشا حالىقارالىق KGL Contest (Kangaroo Global Linguistics) وليمپياداسىنىڭ فينالى سەنساسيالىق ناتيجەمەن اياقتالدى.
بۇل جارىسقا العاش رەت قاتىسقان قازاقستان كومانداسى 1-ورىندى يەلەندى! التىن مەدال يەگەرى — الماتى قالاسىنداعى №23 مەكتەپ-گيمنازياسىنىڭ وقۋشىسى داريا ناسيمۋللينا بولدى، - دەپ حابارلايدى Aqshamnews.kz.
داريا ناسيمۋللينا شەت ءتىلىن مەڭگەرۋدىڭ ەڭ جوعارى دەڭگەيى – B2 بويىنشا ءبىرىنشى ورىندى يەلەندى.
ىرىكتەۋ ءۇش كەزەڭنەن تۇردى: ەكى ۇلتتىق كەزەڭنەن (Stage I جانە Stage II) جانە ءبىر حالىقارالىق كەزەڭنەن – فينالدان (Global Event). 2025 جىلى فينال 2–4 قازان ارالىعىندا گرەكيانىڭ سالونيكي قالاسىندا ءوتتى.
وليمپيادانىڭ ءبىرىنشى كەزەڭى الەمنىڭ تۇكپىر-تۇكپىرىندە 2025 جىلعى 15 اقپاندا ءوتتى. ايازدى اۋا رايى مەن جۇزدەگەن شاقىرىمدىق قاشىقتىققا قاراماستان، اتا-انالار مەن مۇعالىمدەردىڭ تاباندىلىعىنىڭ ارقاسىندا 2691 وقۋشى تەستىلەۋ وتكىزۋ ءۇشىن بەلگىلەنگەن وبلىس ورتالىقتارى مەن قالالارعا كەلىپ قاتىستى. باستاپقى كەزەڭ قازاقستاننىڭ 12 ءوڭىرىن، سونىڭ ىشىندە رەسپۋبليكالىق ماڭىزى بار ءۇش قالانى قامتىدى.
بارلىق ۇدەرىس قاتاڭ تۇردە تىركەلىپ وتىردى: تاراتپا ماتەريالداردى اشۋ ۋاقىتى، تەست تاپسىرۋ تايمينگى جانە قاتىسۋشىلاردىڭ جاۋاپ پاراقتارىن مورلەۋ ءتارتىبى ناقتى باقىلاندى. ءار وڭىرگە بەكىتىلگەن سۋپەرۆيزورلار مىڭداعان قورىتىندى فايلداردى سيفرلاندىرىپ، دەرەكتەردى باس كەڭسە پلاتفورماسى ارقىلى ۋاقىتىلى جىبەرىپ وتىردى. بۇدان كەيىن KGL Contest ينتەللەكتۋالدى جۇيەسى ءار قاتىسۋشىنىڭ جاۋاپتارىنا سايكەس ۇپايلاردى اۆتوماتتى تۇردە ەسەپتەدى.
ناتيجەسىندە 530 وقۋشى ءبىرىنشى ىرىكتەۋ كەزەڭىنەن ءوتتى. ەكىنشى تۋرعا ءوتۋ ءۇشىن ءوتۋ بالى مۇمكىن بولاتىن ەڭ جوعارى ۇپايدىڭ 90%-ىن قۇرادى.
اعىلشىن ءتىلىن بىلۋگە ارنالعان وليمپيادانىڭ ەكىنشى كەزەڭى 2025 جىلدىڭ 15 ناۋرىزىندا وتكىزىلدى. ەكى ايعا سوزىلعان شەت ءتىلىن مەڭگەرۋ سىناعى ەلگە Pre-A1، A1، A2، B1، B2 دەڭگەيلەرىنىڭ بارلىعى بويىنشا جوعارى ناتيجەلەر اكەلدى.
وسى وليمپياداعا وتاندىق مەكتەپتەردىڭ قاتىسۋ باستاماشىسى بولعان EDU Stream حالىقارالىق ءتىل اكادەمياسى ءتورت دەڭگەي بويىنشا ءبىرىنشى ورىن يەلەرىن سالتاناتتى تۇردە قۇتتىقتاپ، بالالاردىڭ گرەكيادا وتەتىن فينالعا قاتىسۋى ءۇشىن ۇشاق بيلەتتەرىن ءوز ەسەبىنەن قامتاماسىز ەتتى.
Global Event كەزەڭىندە قازاقستاندىق وقۋشىلاردىڭ جەڭىسىن ەشكىم كۇتپەگەن ەدى.
EDU Stream اكادەمياسىمەن جانە ەكىنشى باستاماشى – Express Publishing باسپاسىمەن بىرلەسە وتىرىپ، الماتى قالاسىنىڭ ءبىلىم باسقارماسى مەگاپوليس وقۋشىلارىنىڭ وليمپياداعا قاتىسۋىن ۇيىمداستىردى.
«مەنىڭ دەڭگەيىم — B2 بويىنشا جەڭىمپازداردى جاريالاپ جاتقاندا، ءبىرىنشى ورىندى الامىن دەپ ويلامادىم. ءۇشىنشى، ارى كەتسە ەكىنشى ورىندى يەلەنەرمىن دەپ كۇتتىم. ال 2 جانە 3 ورىن العان قىزداردىڭ ەسىمدەرى اتالعاندا، مەن ىشتەي جەڭىسپەن قوشتاسىپ، كوڭىلىم ءتۇسىپ وتىردىم. ءبىراق ەكراننان ءوز اتىم مەن تەگىمدى ءبىرىنشى ورىندا كورگەن ساتتە، “بۇل ءبىر قالجىڭ شىعار” دەپ ويلادىم! قولدارىم دىرىلدەپ، ساحناعا شىققاندا فينالدا جەڭىسكە جەتكەنىمە شەكسىز قۋاندىم»، – دەپ اسەرىمەن ءبولىستى اعىلشىن ءتىلى بويىنشا حالىقارالىق KGL Contest-2025 وليمپياداسىنىڭ B2 دەڭگەيى بويىنشا جەڭىمپازى داريا ناسيمۋللينا.
«مەن ءوز وقۋشىم — داريانىڭ جەتىستىگىمەن قاتتى ماقتانامىن. ول شەت ءتىلىن مەڭگەرۋدىڭ ەڭ جوعارى دەڭگەيىندە ەڭ جوعارى ۇپاي جينادى. بۇل — بۇكىل ەلىمىزدىڭ جەتىستىگى! وسى ءساتتى پايدالانا وتىرىپ، بارلىق اتا-انالار مەن ارىپتەستەرىمە ايتارىم — بالالارىڭىزعا سەنىڭىزدەر، ولاردى قولداڭىزدار، جۇرەكتەرىنە ءۇمىت پەن سەنىم وتىن جاعايىق! ويتكەنى ەلىمىزدىڭ بولاشاعى — اقىلدى دا ابىرويلى ۇرپاقتىڭ قولىندا»، – دەدى الماتى قالاسىنداعى №23 مەكتەپ-گيمنازياسىنىڭ اعىلشىن ءتىلى ءپانى ءمۇعالىمى ساعىنىش رايبەكوۆا.
قازاقستان اتىنان قاتىسقان تاعى ءبىر الماتىلىق وقۋشى – №39 ليسەيدىڭ شاكىرتى تاڭات تولەنباي اعىلشىن ءتىلى بويىنشا B1 دەڭگەيىندە جوعارى ناتيجە كورسەتىپ، قاتىسۋ سەرتيفيكاتىنا يە بولدى.
داريا مەن تاڭات، سونداي-اق استانا قالاسىنداعى №82 «دارىن» ليسەيىنىڭ وقۋشىسى ءالي الپىسباي (A2 دەڭگەيى) جانە قىزىلوردا قالاسىنداعى №197 ورتا مەكتەپتىڭ وقۋشىسى جاسمينا باقىتجان (A1 دەڭگەيى) ءوز جەتىستىكتەرىمەن شەت تىلدەرى بويىنشا حالىقارالىق وليمپيادانى ۇيىمداستىرۋشى ITA ۇيىمىنىڭ وكىلدەرىن تاڭعالدىردى.
B2 دەڭگەيى بويىنشا فينالدا 1-ورىن العانى ءۇشىن داريا ناسيمۋللينا ITA ۇيىمى تاراپىنان 500 اقش دوللارى كولەمىندە اقشالاي سەرتيفيكاتپەن ماراپاتتالدى. بارلىق قاتىسۋشىلار KGL Contest وليمپياداسىنىڭ مەدالدارىمەن، سىيلىقتارىمەن جانە سەرتيفيكاتتارىمەن ماراپاتتالدى.
«قازاقستاننان كەلگەن وقۋشىلار ءبىزدى قاتتى تاڭعالدىردى، ويتكەنى سىزدەردىڭ ەلىڭىز KGL Contest وليمپياداسىنا العاش رەت قاتىستى. الايدا بىردەن فينالدا جەڭىسكە جەتۋ — مۇنداي جەتىستىككە الەمنىڭ ەشبىر ەلى بۇعان دەيىن قول جەتكىزگەن ەمەس! ءبىز سىزدەردىڭ وليمپياداعا بەلسەندى قاتىسۋلارىڭىز داستۇرگە اينالادى دەپ ۇمىتتەنەمىز»، – دەدى ITA ۇيىمىنىڭ باس ديرەكتورى مايكل كارتي.
KGL Contest – بۇل اعىلشىن ءتىلىن شەت ءتىلى رەتىندە ۇيرەنىپ جۇرگەن 8 بەن 17 جاس ارالىعىنداعى وقۋشىلارعا ارنالعان حالىقارالىق وليمپيادا.
KGL وليمپياداسىنىڭ باستى ەرەكشەلىگى – ونىڭ كۇردەلىلىك دەڭگەيلەرى Pre-A1، A1، A2، B1، B2، ياعني CEFR (Common European Framework of Reference) حالىقارالىق شكالاسىنا سايكەس كەلەدى.
بۇل بايقاۋدى International Testing Authority (ITA) ۇيىمى ۇيىمداستىرادى جانە ونىڭ ماقساتى – وقۋشىلارعا وزدەرىنىڭ تىلدىك داعدىلارىن قىزىقتى ءارى شابىتتاندىراتىن ورتادا كورسەتۋگە مۇمكىندىك بەرۋ.
وليمپيادا 2017 جىلى قۇرىلعان جانە جىل سايىن الەمنىڭ 40-تان استام ەلىندە وتكىزىلەدى. بۇل بايقاۋ الەم وقۋشىلارىنىڭ اعىلشىن ءتىلىن مەڭگەرۋ دەڭگەيىن شىنايى تۇردە كورسەتەتىن بەدەلدى حالىقارالىق جارىس بولىپ تابىلادى.