2025 جىلدىڭ 5-9 قازانى ارالىعىندا اقتاۋدا مەملەكەت باسشىسى جاريالاعان بىلىكتىلىك جىلى اياسىندا تۇركىتىلدەس ەلدەر اراسىندا العاشقى كاسىبي شەبەرلىك چەمپيوناتى «TurkicSkills» ءوتىپ جاتىر، - دەپ حابارلايدى Aqshamnews.kz.
بۇل تاريحي وقيعاعا قازاقستان، تۇركيا، ءازىربايجان، ۆەنگريا، وزبەكستان، قىرعىزستان، تۇرىكمەنستان جانە موڭعوليا سياقتى سەگىز ەلدەن 16 مەن 22 جاس ارالىعىنداعى 100-دەن استام جاس مامان مەن 80 جوعارى بىلىكتى ساراپشى قاتىسادى.
ۇلتتىق قۇراما ساپىندا الماتى قۇرىلىس-تەحنيكالىق كوللەدجىنىڭ ستۋدەنتتەرى بار. تىنىشباي دىنمۇحامەد پەن كارىم ءىلمۇرات «سانتەحنيكا جانە جىلۋمەن جابدىقتاۋ» جانە «دانەكەرلەۋ تەحنولوگيالارى» قۇزىرەتتەرى بويىنشا قازاقستان اتىنان قاتىسادى.
بايقاۋ اقپاراتتىق تەحنولوگيالاردى، قۇرىلىس جانە قۇرىلىس تەحنولوگيالارىن، وندىرىستىك جانە ينجەنەرلىك تەحنولوگيالاردى، الەۋمەتتىك جانە جەكە قىزمەتتەردى قامتيتىن 15 نەگىزگى قۇزىرەتتى قامتيدى. ءموبيلدى روبوتوتەحنيكا جانە ۇشقىشسىز ۇشۋ اپپاراتتارىن (درون) باسقارۋ سياقتى پەرسپەكتيۆالى سالالارعا ەرەكشە نازار اۋدارىلادى.
بۇل اۋقىمدى حالىقارالىق جوبا كوگىلدىر جۇمىس ورىندارىنىڭ بەدەلىن نىعايتۋعا، كاسىبي كەڭىستىك قۇرۋعا، تۇركىتىلدەس ەلدەردىڭ جاس ماماندارىنىڭ تاجىريبە الماسۋىن ىنتالاندىرۋعا باعىتتالعان.
چەمپيونات جاستاردىڭ الەۋەتىن اشۋدا، زاماناۋي تەحنولوگيالاردى ىلگەرىلەتۋدە جانە زامان تالابىنا توتەپ بەرە الاتىن بىلىكتى كادرلاردىڭ جاڭا بۋىنىن دامىتۋدا ماڭىزدى الاڭ بولماق.
ۇيىمداستىرۋشى – قازاقستان رەسپۋبليكاسى ءبىلىم مينيسترلىگى. جوبانى قازاقستان رەسپۋبليكاسى ءبىلىم مينيسترلىگىنە قاراستى «تالاپ» ۇبو جانە ماڭعىستاۋ وبلىسىنىڭ اكىمدىگى جۇزەگە اسىرۋدا.