وڭتۇستىك استاناداعى №2 بالالار قالالىق كلينيكالىق اۋرۋحاناسىنىڭ نەيروحيرۋرگتەرى رەسەيلىك ارىپتەستەرىمەن تاجىريبە الماستى.
شەبەرلىك كلاسى بارىسىندا ءبىزدىڭ دارىگەرلەر رەسەيلىكتەردى ەپيلەپسياعا دەلالاندە يننوۆاسيالىق ادىسىمەن حيرۋرگيالىق وتا جاساۋ تاجىريبەسىمەن تانىستىردى، دەپ حابارلايدى اۋرۋحانانىڭ باسپا ءسوز قىزمەتى.
شەبەرلىك كلاسى بارىسىندا وتا جاسالعان ناۋقاستىڭ ءبىرى 11 جاستا. ونىڭ ەپيلەپسيا دەرتىنە شالدىققانىنا بىرنەشە جىل بولعان. كىشكەنتاي كۇنىندە العان ينسۋلتتەن ميدا كيستا مەن اتروفيالىق وزگەرىستەر پايدا بولىپتى. سالدارىنان ەپيلەپسياعا قارسى دارىلەردى ىشكەنىنە قاراماستان كۇن سايىن قىرىققا دەيىن تالماسى ۇستايتىن. ەكىنشى اۋرۋحانا دارىگەرلەرىنە جۇگىنگەن اتا-اناسى تالما سانىن قىسقارتۋ ءۇشىن وعان شۋنت ورناتۋدى سۇراپتى. الايدا ماماندار ەمنىڭ باسقا تيىمدىرەك ءتاسىلىن تاڭداپ الىپتى.
«ءبىز ەەگ مەن وزگە دە زەرتتەۋلەر قورىتىندىسىن قاراپ شىعىپ رەزەكتيۆتىك وپەراسيا جاساپ، پاسيەنتتىڭ تالماسىن 75 پروسەنتكە دەيىن قىسقارتۋعا بولادى دەگەن شەشىم قابىلدادىق. بۇل تۇجىرىمىمىزدى ەپيلەپتولوگتار دا ماقۇلدادى. «تىك گەميسفەروتوميا» دەپ اتالاتىن وتا ءساتتى شىقتى. ءقازىر بالا بولىمشەگە اۋىستىرىلدى، وپەراسيادان كەيىنگى ەم-دومىن قابىلداپ جاتىر»، - دەيدى №2 قبكا نەيروحيرۋرگى ازامات جايىلعانوۆ.
ايتۋىنشا، بۇل تەحنيكا اناتوميالىق جاعىنان قولجەتىمدى وتانىڭ ءبىرى ءارى ونىڭ وزگە حيرۋرگيالىق تاسىلدەرگە قاراعاندا وپەراسيادان كەيىنگى اسقىنۋ ىقتيمالدىعى تومەن. وتا كىشىگىرىم تىلىك ارقىلى جاسالاتىندىقتان قان كەتۋ ءقاۋپىن تومەندەتەدى. حيرۋرگ مامان ناۆيگاسيالىق جۇيەنىڭ كومەگىمەن ارەكەت ەتە وتىرىپ، ميدى زاقىمدانعان قابىقشالاداىن اجىراتىپ الا الادى.
ايتۋىنشا، وسىدان ءبىر اي بۇرىن 2-اۋرۋحانا نەيروحيرۋرگتەرى سانكت-پەتەربۋرگ قالاسىندا ەپيلەپسيانىڭ ەشبىر ءدارى كومەكتەسپەيتىن رەزيستەنتتى تۇرىمەن اۋىراتىن 14 جاستاعى جاسوسپىرىمگە وتا جاساعان. سول كەزدە رەسەيلىك ماماندار وسى ءادىستى ۇيرەنۋگە قىزىعۋشىلىق ءبىلدىرىپتى. وسى تاجىريبەنى مەڭگەرىپ، تەحنيكانى پىسىقتاۋ ماقساتىندا رەسەيلىك نەيروحيرۋرگ الەكساندر كيم الماتىعا ارنايى ۇشىپ كەلىپ، بىرلەسكەن وپەراسيالارعا قاتىستى.
«ەپيلەپسيانى حيرۋرگيالىق ەمدەۋ سالاسى ۇنەمى دامۋ ۇستىندە. ۋاقىت وتكەن سايىن وپەراسيانىڭ جاڭا تۇرلەرى، تاسىلدەرى كوبەيىپ كەلەدى. سوندىقتان ءبىر ۋاقىت كوشىنەن قالماي، ءوزارا تاجىريبە الماسىپ وتىرۋىمىز كەرەك. قازاقستاندىق نەيروحيرۋرگيا دا قارقىندى دامىپ جاتىر. تمد ەلدەرى اراسىندا الماتىداعى №2 قبكا دارىگەرلەرىنىڭ كلينيكالىق تاجىريبەسى وتە مول دەپ ايتا الامىن. سوندىقتان ءبىز بۇعان دەيىن دە قازاقستاندىق ارىپتەستەرىمىزدى شاقىرىپ، ولارمەن تاجىريبە الماستىق، وسى ءادىستى ۇيرەندىك. ءقازىر وتاعا قاتىسىپ، كلينيكالىق تاجىريبەمدى بايىتۋعا مۇمكىندىك الدىم. ءبىز دە مۇنداي وتانىڭ ءتۇر-تۇرىن جاسايمىز، ءبىراق وزگەلەردەن ۇيرەنەرىمىز دە از ەمەس»، - دەدى الەكساندر كيم.
ايتۋىنشا، بيىل باسىلىپ شىققان رەسەي فەدەراسياسىنىڭ ۇلتتىق نۇسقاۋلىعىنا بالالار نەيروحيرۋرگياسىنا ارنالعان باپ ەنگەن. ونىڭ اۆتورى قازاقستاندىق نەيروحيرۋرگتەر مارات راباندياروۆ پەن ازامات جايىلعانوۆ.
وتاندىق نەيروحيرۋرگتەر ەپيلەپسيانى حيرۋرگيالىق ەمدەۋ بارىسىندا ەۋروپانىڭ مەديسينا سالاسىنداعى وزىق تاجىريبەسىن باسشىلىققا الادى. ەكىنشى اۋرۋحانا دارىگەرلەرى 2023 جىلدىڭ قاڭتارىندا قازاقستاندا عانا ەمەس، كۇللى ورتالىق ازيادا العاش رەت ەپيلەپسيانىڭ اۋىر تۇرىمەن اۋىراتىن بالاعا تىك گەميسفەروتوميا ادىسىمەن وتا جاسادى. نەمىس نەيروحيرۋرگى، پروفەسسور ۋلريح تومالەنىڭ قاتىسۋىمەن وتكەن وپەراسيادان كەيىن ءبىزدىڭ دارىگەرلەر تاعى قازاقستاندىق 10 بالاعا وتا جاسادى. وپەراسيالاردىڭ ءبارى مىندەتتى الەۋمەتتىك مەديسينالىق ساقتاندىرۋ ەسەبىنەن جاسالدى. ەستەرىڭىزگە سالا كەتسەك، 18 جاسقا دەيىنگى بالالار مەملەكەت تاراپىنان ساقتاندىرىلادى. بالالار ءمامس پاكەتىندەگى مەدكومەكتى تولىققاندى پايدالانا الادى.