مۇرات وتكەن جىلدىڭ سوڭىندا جاڭاوزەندە بولعان ۇلكەن ءورتتى ءسوندىرۋ كەزىندە اۋىر جاراقات العان.
10 كۇن بويى ونىڭ جاعدايى تۇراقتاندىرىلىپ، سودان كەيىن ماڭعىستاۋلىق مۇرات الماتىداعى ءتورتىنشى قالالىق اۋرۋحانانىڭ تراۆماتولوگ دارىگەرلەرىنە جەتكىزىلدى. بەس ايدان استام ۋاقىت بويى №4 قالالىق كلينيكالىق اۋرۋحانانىڭ كۇردەلى تراۆماتولوگيا جانە ءىرىڭدى حيرۋرگيا ءبولىمىنىڭ دارىگەرلەرى ونىڭ دەنساۋلىعى ءۇشىن كۇرەستى، دەپ حابارلايدى Almaty-akshamy.kz.
«سۇيەك سىنىقتارىنىڭ ىعىسۋىمەن سول جاق وكشە سۇيەگىنىڭ اشىق ۇساقتالعان سىنۋى، سول جاق تاباننىڭ اسىق سۇيەگىنىڭ سىنۋى، سۇيەك سىنىقتارىنىڭ ىعىسۋىمەن 2، 3، 4، 5 سول جاق تابان سۇيەكتەرىنىڭ جابىق سىنىعى. سۇيەك سىنىقتارىنىڭ ىعىسۋىنسىز وڭ جاق تابان بۋىنىنىڭ لاتەرالدى توبىعىنىڭ جابىق جيەكتىك سىنۋى - كۇردەلى كلينيكالىق جاعداي. ناۋقاس ءبىزدىڭ اۋرۋحاناعا تۇسكەندە وندا تەرى مەن جۇمساق تىندەردىڭ نەكروزى جانە اقاۋىمەن سول جاق تابانىنىڭ جىرتىلعان جاراسى بولدى. بىلايشا ايتقاندا، 10 كۇن وتكەننەن كەيىن ءتىن ولە باستادى. حيرۋرگيالىق ەمدەۋ ءۇش كەزەڭدە جۇرگىزىلدى. ءبىزدىڭ بار تاكتيكامىز ءبىر ماقساتقا – ناۋقاستىڭ اياعىن ساقتاپ قالۋعا باعىتتالدى»، - دەپ اتاپ ءوتتى №4 قالالىق كلينيكالىق اۋرۋحانانىڭ كۇردەلى تراۆماتولوگيا ءبولىمىنىڭ مەڭگەرۋشىسى اندرەي فەدوتوۆ.
دارىگەرلەر ءومىر سۇرۋگە جارامسىز فراگمەنتتەردى الىپ تاستاعان العاشقى وتادان كەيىن وكشە سۇيەگى اشىلدى. ناۋقاس امپۋتاسيانىڭ ار جاق بەر جاعىندا بولدى، ءبىراق حيرۋرگتار تەرى اقاۋىنا پلاستيكالىق وتا جاساۋدى ۇيعاردى.
ەكىنشى وتا: نەكروەكتوميا، تەرى اقاۋىن سۋرالدى كەسىندىمەن ۆاسكۋليارلى تەرى پلاستيكاسى، يليزاروۆ اپپاراتىندا تابان سۇيەكتەرىنىڭ تەرى ارقىلى وستەوسينتەزى.
جارانى ەكى كەزەڭدىك دايىندىقتان كەيىن دارىگەرلەر تەرىنى اۋىستىرىپ ورنالاستىردى.
ءتورت اي بويى تاباننىڭ سىنعان سۇيەكتەرىن ەمدەۋ يليزاروۆ اپپاراتىندا جالعاستى. 1 ساۋىردە اپپارات دەمونتاجتالدى - ءبارى ءساتتى ءوتتى، ماڭعىستاۋلىق قۇتقارۋشىنىڭ اياعى امان قالدى.
«مەنىڭ بولاشاعىم ءۇشىن كۇرەسىپ، اياعىمدى امان الىپ قالعان الماتىداعى ءتورتىنشى اۋرۋحانانىڭ تراۆماتولوگتارىنا، حيرۋرگتارىنا، رەانيماتولوگتارىنا جانە بارشا ۇجىمىنا شىن جۇرەكتەن العىس بىلدىرەمىن»، - دەيدى جاڭاوزەندىك ءورت ءسوندىرۋشى مۇرات جاقسىلىق.