ينۆاتاكسيگە مۇقتاج الماتىلىقتار ونىڭ سانىنىڭ جەتىسپەيتىنىن ايتۋدا.
«ارباعا تاڭىلعاندار ارنايى كولىكتىڭ تاپشىلىعىنان قالادا ءجۇرىپ-تۇرۋىمىز قيىندادى»، - دەيدى. دەگەنمەن اكىمدىك وكىلى الداعى ۋاقىتتا ماسەلە شەشىمىن تابادى دەپ سەندىرگەن. مۇگەدەكتىگى بار ادامدارعا قىزمەت كورسەتەتىن كولىكتەردىڭ سانىن 100-گە جەتكىزۋ كوزدەلىپ وتىر، دەپ حابارلايدى Almaty-akshamy.kz.
24.kz سايتىنىڭ جازۋىنشا، ۇلان ىڭكاربەكوۆ، وزىمەن تاعدىرلاس جانداردىڭ ماسەلەسىن ءبىراز جىلدان بەرى كوتەرىپ كەلەدى. «ينۆاتاكسيگە قاتىستى دا شاعىمدار كوپ»، - دەيدى ول. اسىرەسە، اربادا وتىراتىن جاندارعا ارنالعان ارنايى جابدىقتالعان كولىك جەتىسپەيدى. قولدانىستا جۇرگەندەرى ەسكىرگەن. ينۆەستورلار پايداسى از كاسىپكە قارجى قۇيۋعا قۇلىقسىز.
«ينۆاتاكسيدە قاتەلىكتەر كوپ. بىزدە كۇننەن كۇنگە تۇتىنۋشىلار كوبەيىپ جاتىر. بۇرىنعى ادامدارعا تاعى قوسىمشا ادامدار قوسىلىپ جاتىر. سوندىقتان ماشينا جەتىسپەيدى. ءبىز ينۆەستورلاردى كىرگىزەيىك دەسەك، ولار 1 جىلعا كونتراكتىگە كىرمەيدى. ءبىر جىلدىڭ ىشىندە ول ماشينا ءوزىن-وزى اقتامايدى. تالاي كەزدەسۋلەردە، تالاي جوعارى جاقتا دا وسى ماسەلەنى كوتەرىپ ايتىپ جۇرگەنىم، كونتراكت ەڭ كەمى 3 جىلعا جاساۋ كەرەك»، - دەيدى مۇگەدەكتەر قوعامدىق بىرلەستىگىنىڭ ءتوراعاسى ۇلان ىڭكاربەكوۆ.
ءقازىر قالادا مۇمكىندىگى شەكتەۋلى جانداردى تاسىمالداۋمەن اينالىساتىن ءۇش كومپانيا بار. كۇندەلىكتى 64 كولىك قىزمەتكە شىعادى. ولاردىڭ 24ء-ى عانا اربادا وتىراتىن ەرەسەكتەر مەن بالالاردى قاجەت جەرىنە جەتكىزەدى. ال قالعان كولىكتەر زاعيپ جاندارمەن اۋتيزمگە شالدىققاندارعا قىزمەت كورسەتەدى. الماتىدا اربادا وتىراتىن 1500 ادام بار ەكەنىن ەسكەرسەك، ارنايى كولىكتىڭ جەتپەيتىنى ايدان انىق.
«ءبىز 180 ادامعا قىزمەت كورسەتەمىز. ياعني، كۇنىنە تۇراقتى تۇردە 180 ءوتىنىش تۇسەدى. ولار 12 كولىككە بولىنەدى. ەڭ ازى ءبىر ماشينا كۇنىنە 20 شاقىرىم جۇرەدى. تەحنيكا ەسكىرگەن. جاڭا كولىك الۋعا قارجى جوق، ءتىپتى، ولاردى جوندەۋدەن وتكىزۋگە اقشا قولبايلاۋ»، - دەيدى ينۆاتاكسي قىزمەتىن كورسەتەتىن كومپانيانىڭ ديرەكتورى ەميل ماكسۋموۆ.
اكىمدىك وكىلىنىڭ ايتۋىنشا، 2023 جىلعا ينۆاتاكسي قىزمەتى ءۇشىن بيۋدجەتتەن 765 ملن تەڭگە بولىنگەن. ءبىراق بۇل كونكۋرسقا ەشقانداي قىزمەت كورسەتۋشى كومپانيا قاتىسپاعان. سەبەبى، بۇل قاراجات از.
«قازىرگى تاڭدا 2700 تەڭگە - ول 1 ماشينانىڭ 1 ساعاتىنا ارنالعان سوما. ءبىز اقپان ايىندا قالالىق بيۋدجەتكە شاعىم تۇسىردىك. 2700 تەڭگەدەن كوتەرۋ ءۇشىن جانە حالىق ماسليحاتتارى سول سۇراعىمىزدى قابىلدادى. جانە قوسىمشا قاراجات بەرىلدى. 2700 تەڭگەدەن 3700 تەڭگەگە شەيىن، 1 ساعاتتىق كوتەرىلدى. جانە مامانداندىرىلعان كولىك بويىنشا 2700 تەڭگەدەن 4500 تەڭگەگە دەيىن سول قاراجات كوتەرىلدى. بۇل بىزگە كونكۋرسقا جاڭا كومپانيالاردى تارتۋعا مۇمكىندىك بەرەدى»، - دەيدى جۇمىسپەن قامتۋ جانە ءاب باسقارماسى باسشىسىنىڭ ورىنباسارى قاليبەك اقىلبەك.
قازىرگى ۋاقىتتا جاڭا باعا نەگىزىندە الەۋمەتتىك قىزمەت كورسەتەتىن كومپانيالارعا ارنالعان كونكۋرستىڭ تەحنيكالىق قۇجاتتاماسى ازىرلەنۋدە. الەۋمەتتىك جوباعا ءبىر ميلليارد تەڭگەدەن استام قارجى قاراستىرىلعان. سونداي-اق، الداعى ۋاقىتتا ينۆاتاكسي قىزمەتىندەگى كولىكتەر سانىن 100-گە جەتكىزۋ جوسپاردا بار.