بوريس جاپاروۆ، پروفەسسور، تەحنيكا عىلىمىنىڭ دوكتورى:
قازاقستان مەن جۇڭگو اراسىندا مەملەكەتارالىق وتىز كۇندىك ۆيزاسىز ءتارتىپ ەنگىزىلەتىنىنە بايلانىستى قوعامدا نەشە ءتۇرلى اڭگىمە وربۋدە. ءبىرجاقتى پىكىر باسىم بولىپ بارادى. وسى رەتتە مەن دە ءوز پىكىرىمدى ءبىلدىرىپ كەتسەم دەيمىن.
كەزىندە ەلىمىزدىڭ تۇركياداعى ەلشىسىنىڭ كەڭەسشىسى بولعانىمدا، حالىقارالىق قاتىناستا ءبىراز تاجىريبە جيناقتاعانىم بار. وسى كۇنى ءومىر وزگەرىپ، دۇنيە جاڭارۋدا. ماسەلەن، بۇكىل ەۋروپا بىر-بىرىمەن تاۋار اينالىمىن جاساۋدا. وسىنداي شاقتا شەكارانى تاستاي قىپ قىمتاپ، تىم-تىرس وتىراتىن نە ءجونىمىز بار؟ مۇنىڭ ءوزى «حالىقارالىق قۇقىق» دەگەن ۇعىمعا قايشى كەلەر ەدى.
ءبىزدىڭ ءداۋىرىمىزدىڭ باسىندا عۇن بابالارىمىزدان ساقتانعان قىتايلار ءۇش مىڭ شاقىرىمدىق «جۇڭگو قورعانىن» تۇرعىزسا، بۇل قامالدار بۇگىنگى كۇنى تاريحي ەسكەرتكىش رەتىندە عانا باعالانادى. ايتارىم، تاريحقا وتكەن كۇننىڭ ولشەمىمەن قاراماۋ قاجەت، بۇگىنگىنىڭ تالابى ەسكەرىلۋى كەرەك. ەگەر، وسىنداي ۆيزاسىز ءتارتىپ ەنگىزىلسە، ونىڭ دا تەجەۋىشى، رەتتەگىشى بار دەگەن ءسوز. بولاشاققا ۇمىتپەن قاراعان ءجون.
«جۇڭگو ازاماتتارى قاپتايدى» دەپ دۇرلىگۋدىڭ نە ءمانىسى بار؟ ءال-اۋقاتى وركەندەگەن الەمدىك ەڭ ءىرى ەكى مەملەكەت بولسا، سونىڭ ءبىرى – جۇڭگو. ونى ەسكەرمەسكە بولمايدى. ال، تاۋەلسىزدىگىمىزدى قورعاۋ دەگەنىمىز – ەكونوميكامىزدى نىعايتۋ. ويلاپ قاراساق، ەكونوميكانى جاسايتىن حالىق. مۇندايدا ءونىمدى ەڭبەك ەتۋگە جۇيە جاسالىپ، ەكونوميكالىق ساياسات باستى ءرول اتقارۋى ءتيىس.