الماتىنىڭ مۋلتيمەديالىق ءداستۇرلى مۋزىكا ورتالىعىندا «ءتاڭىر سىيى – تاۋەلسىزدىك» تاقىرىبىندا كەزدەسۋ ءوتتى.
«دوڭگەلەك ۇستەل» باسىنداعى اڭگىمەگە جەلتوقسانشى قاراكوزدەر – نەسىپكۇل ەڭسەبايەۆا، اقكۇمىس ىقىلاسوۆا جانە باعيلا اعمانوۆا شاقىرىلعان بولاتىن. ولار جاستار الدىندا 1986 جىلعى جەلتوقسان وقيعاسىنىڭ ءمان-ماعىناسى تۋرالى، سول كەزەڭدەگى قازاق جاستارىنىڭ پاتريوتتىق سەزىمى، ۇلتتىق نامىسى، ەرىك-جىگەرى قانداي بولعاندىعى حاقىندا اڭگىمە ءوربىتتى. ومىدان 39 جىل بۇرىنعى جەلتوقسان قوزعالىسىنىڭ تاريحي ساباعى مەن ەل بولاشاعىنا اسەرى جونىندە تارقاتتى. جاستار ءوز كەزەگىندە مەيماندارعا ساۋالدارىن قويىپ، ءوزارا پىكىر الماستى.
بۇل كەزدەسۋدىڭ بۇگىنگى ۇرپاقتىڭ ەلگە، جەرگە دەگەن سۇيىسپەنشىلىگىن وياتۋعا ىقپال ەتكەنى ءسوزسىز.
«مەن دە جەلتوقساننىڭ ىزعارلى كۇنى الاڭعا بارعان قىزداردىڭ ءبىرىمىن. «قازاقتاردى جاپپاي ۇرىپ-سوعىپ جاتىر ەكەن» دەگەن حاباردى ەستىگەندە جۇرەگىم كەۋدەمە سىيماي اتقاقتاپ كەتتى. مەن دە ولاردىڭ جانىندا بولۋىم كەرەك قوي دەپ الاڭعا شىعىپ كەتتىم. زامانداستارىمنىڭ سول كۇنگى تولقۋىن، ءاربىر جاستىڭ جانارىنداعى وت-جالىندى، اسىرەسە قازاق قىزدارىنىڭ قايسارلىعىن سوزبەن سۋرەتتەپ جەتكىزۋ مۇمكىن ەمەس. سۋىققا دا، كۇشتىك قۇرىلىمنىڭ تاياعىنا دا قاراماي، ەلىم، جەرىم، ءتىلىم دەپ رۋحتانا تۇسكەن جاستاردىڭ بەينەسى ءالى كۇنگە كوز الدىمدا. الاڭعا شىققانداردىڭ تالايى قۋدالاندى، دەنساۋلىعىنان دا ايىرىلعانى دا از ەمەس. تاۋەلسىزدىك بىزگە وسىلاي جەتكەن. ەگەمەن ەلدىڭ ەرتەڭى – وزدەرىڭە امانات!»، – دەدى جەلتوقسانشى باعيلا بايباق قىزى.