مەگاپوليس تورىندەگى ىرگەلى ا.پ.چەحوۆ اتىنداعى ورتالىق قالالىق كىتاپحانادا "جۇمىسشى ماماندىعى – مەنىڭ تاڭداۋىم" تاقىرىبىمەن تانىمدىق كەزدەسۋ ءوتتى، دەپ حابارلايدى اqshamnews.kz.
رۋحاني راۋىشتە كورىنىس تاپقان جۇزدەسۋ كەشىنە ءوز ورتاسىندا ابىرويعا بولەنىپ، ءتۇرلى سالادا جۇرگەن ەڭبەك ادامدارى، دالىرەك ايتساق، سلەسار، سانيتار، تروللەيبۋس جۇرگىزۋشىسى جانە ءورت ءسوندىرۋشى مامان قاتىستى. ولار جاستارعا ۇلگى، ونەگە بولارلىق ەڭبەك جولىنان سىر شەرتتى.
"الماتى سۋ" مكك-نىڭ تۇركسىب اۋدانى بويىنشا بولىمشەسىنىڭ سلەسارى، "ەرەن ەڭبەگى ءۇشىن" مەدالىنىڭ يەگەرى دوڭەسباي احانايەۆ:
"جيىرما سەگىز جىل بولدى وسى ءبىر سالادا ەڭبەك ەتىپ جۇرگەنىمە. بيىل ۇلكەن ماراپات الدىم. ءبىزدىڭ دە ەڭبەگىمىز ەلەنەدى ەكەن-اۋ دەپ قۋانعانىم راس. توتەنشە جاعدايلار بولا قالسا، تاڭنان كەشكە دەيىن جەلدىڭ وتىندە، جاڭبىردىڭ استىندا، اق قار-كوك مۇزدا كۇي، باپ تالعاماي جۇرە بەرەمىز عوي. ماقساتىمىز – الماتى سىندى الىپ مەگاپوليستىڭ تۇرعىندارىن ساپالى سۋمەن قامتاماسىز ەتۋ. بالالارىم، نەمەرەلەرىم بار. ۇرپاعىما جۇمىستىڭ جامانى جوق، كەز كەلگەن ەڭبەك ءقادىرلى، كەز كەلگەن ەڭبەككەر قۇرمەتتى ەكەنىن ايتىپ وتىرامىن. ءوزىم سۋ مامانى بولعاسىن، "سۋدىڭ دا سۇراۋى بار" ەكەنىن، ونى دا ۇنەمدەي بىلگەن ابزال بولاتىنىن ەسكە سالۋدان جالىقپايمىن. ءبىر وكىنىشتىسى – بىزگە جاس ماماندار كەلۋگە ىنتالى ەمەس. ءقازىر كاسىپتىك ءبىلىم الۋعا جول اشىق، كەدەرگى جوق. الماتىدا كوللەدج كوپ، وقيمىن دەگەن بالاعا وقۋ تەگىن. جاستار وسى ماسەلەنى دە ەسكەرسە دەيمىن"- دەدى ول.
ءيا، ەڭبەك ادامىن ۇلىقتاۋ ماقساتىندا ۇيىمداستىرىلعان ءىس-شاراعا جاستار كوپ جينالدى. ءبىزدى قۋانتقانى سول. مەملەكەت باسشىسى 2025 جىلدى "جۇمىسشى ماماندىقتارىنىڭ جىلى" دەپ جاريالاعانى ءمالىم.
№9 تروللەيبۋس جۇرگىزۋشىسى، "ەرەن ەڭبەگى ءۇشىن" مەدالىنىڭ يەگەرى ماقپال قوجامسەيىتوۆا:
"تروللەيبۋس تىزگىندەپ جۇرگەنىمە ون ءۇش جىل بولدى. جولداسىممەن وسى سالادا جۇرگەندە تانىسقانمىن. ءقازىر ەكى قىزىمىز بار. جۇمىسىم وزىمە ۇنايدى. قىزىعى كوپ، شىجىعى دا جوق ەمەس. قىزىعى سول، كۇندە ءبىر باعىتپەن ءجۇرىپ جۇرگەن سوڭ، كوپ جولاۋشىنى سونادايدان تانىپ وتىراسىز، ءتىپتى، تۋىسىڭىز سەكىلدى سىزبەن جىلى امانداسادى. حال-جاعداي سۇراسامىز. سەگىزىنشى ناۋرىزدا شوكولاد ۇسىنىپ، كوڭىلىمدى كوتەرىپ تاستايدى. ايالداماسىنان ءتۇسىپ بارا جاتىپ، "شارشاماي جاقسى جەتتىم، راحمەت، قىزىم!" دەپ دورباسىنداعى الما، المۇرتىن ۇسىناتىن اپالار قانداي! ماسەلە بەرگەندە ەمەس، كۇندەلىكتى تروللەيبۋسقا وتىراتىن جولاۋشىلاردىڭ وزىڭە دەگەن ىقىلاسىنا مارقايىپ قالامىن. ال شىجىعى دەيتىنىم، كەي جاستار ۇلكەندەرگە ورىن بەرمەي، سالون ءىشى شۋ بولىپ كەتىپ جاتادى. كەيدە ۇيىنەن كوڭىلسىز شىققاندار اينالاسىنا، ساعان دا ءتيىسىپ وتەتىنى بار، بىرەۋى جەلدەتكىشىڭدى قوس دەسە، ەكىنشىسى ءوشىر، اۋىرىپ وتىرمىن دەيدى. ونداي ساتتەردە سابىر ساقتاۋعا، داۋىس كوتەرمەۋگە، ەشكىممەن رەنجىسپەۋگە تىرىسامىن. سەبەبى تروللەيبۋس تىزگىنىندە وتىرعان مەنىڭ موينىمدا كولىكتەگى جانە جول بويىنداعى جۇزدەگەن ادامنىڭ جاۋاپكەرشىلىگى، اماندىعى تۇرادى"- دەدى.
"جۇمىسشى ماماندىقتارىنىڭ جىلى" – بۇل قوعامنىڭ باستى تىرەگى سانالاتىن ەڭبەك ادامىنا، ولاردىڭ قاجىرلى ەڭبەگىنە نازار اۋدارىپ، جۇمىسشى ماماندىقتارىن دارىپتەۋ.
رەسپۋبليكالىق كارديولوگيا جانە ىشكى اۋرۋلار عزي-نىڭ كلينينگتىك قىزمەت ءبولىمىنىڭ سانيتارى ايناگۇل سيسەنوۆا:
"ءبىز ىرگەلى مەديسينالىق مەكەمەنىڭ تازالىعىنا جاۋاپتىمىز. مەن جۇمىسىمدى جاقسى كورەمىن. تازالىق ۇستەمدىك قۇرعان جەردە ءتارتىپ تە، جايلىلىق تا بولادى. جانساقتاۋ بولىمىندە دە جۇمىس ىستەگەنىم بار. وندا ادامدارعا كۇتىم جاسايمىز. جانى قينالعان ءتۇرلى ناۋقاسپەن، ءتۇرلى تاعدىرمەن بەتپە-بەت كەلەسىز. وتاعا الىپ بارا جاتقاندا جاقسى تىلەك ايتىپ قالامىز. ۋاقىت ۇزاپ بارا جاتسا، الاڭداپ جولىن كۇتەمىز. ورتامىزعا ورالعاندا بالاشا قۋانامىز. ولاردى سوزبەن دەمەپ جىبەرۋ ءۇشىن دە ادامعا ۇلكەن جۇرەك، بيىك ادامگەرشىلىك سەزىمى كەرەك دەپ ويلايمىن. جالپى، جۇمىسىڭىزدى رياسىز جاقسى كورسەڭىز، ادامداردى، اينالانى جاقسى كورسەڭىز، سىزدە ءبارى جاقسى دەگەن ءسوز. جاستارعا ايتارىم، كىشكەنتاي عانا دۇنيەدەن دە جاقسىلىق كورىپ تۇرۋعا ۇمتىلۋ كەرەك. ال جاقسىلىق جاقسىلىقتى شاقىرىپ تۇرادى"- دەدى مامان.
ايتۋلى جىلدىڭ ماقساتى دا سول، جاس ۇرپاقتىڭ ەڭبەك ادامىنا دەگەن قۇرمەتىن ارتتىرۋ، جاستاردى كاسىبي تەحنيكالىق ءبىلىم الۋعا ىنتالاندىرۋ، جۇمىسشى ماماندىقتارىن جاتسىنباۋعا شاقىرۋ.
№12 ءورت ءسوندىرۋ ءبولىمىنىڭ اعا ءورت ءسوندىرۋ قۇتقارۋشىسى، "ازاماتتىق قورعاۋ" سەرجانتى داۋرەن شەرىكباي:
"بالا كۇنىمدە ادامدارعا كومەك كورسەتۋگە، جان-جانۋارلارعا دا قامقور بولۋعا قۇشتار ەدىم. مىنە، بۇگىندە ءورت ءسوندىرۋشى، قۇتقارۋشى قىزمەتىندە ابىرويلى ەڭبەك ەتىپ ءجۇرمىن. ءۇش جىلداي عانا بولسا دا، بۇل سالانىڭ قىر-سىرىنا تەرەڭ بويلاپ كەلەمىن. ءورت سوندىرۋشىگە ءبىرىنشى كەزەكتە جىلدامدىق، ەپتىلىك، جۇرەكتىلىك كەرەك. بىزگە، مىسالى، توتەنشە جاعداي تۋرالى دابىل تۇسەتىن بولسا، ون توعىز-جيىرما التى سەكۋند اراسىندا قورعانىس كيىمدەرىن كيىپ ۇلگەرۋىڭىز كەرەك. سەبەبى ءتىلسىز جاۋ سەكۋندتاردان دا جىلدام بولادى. اپتاپ ىستىقتا دا ۇستىڭىزدەگى قالىڭ كيىممەن وتتىڭ ىشىنە قويىپ كەتەتىن ساتتەرىمىز دە كوپ. ءار ءسات ماڭىزدى. ءتىپتى، الىپ بازار ورتكە ورانىپ جاتسا، ادامدارمەن بىرگە ولاردىڭ كۇنكورىسىنە اينالعان مۇلكىن دە امان الىپ قالۋعا جانتالاسامىز. جالپى، ءبىز 102-گە قانداي حابار تۇسەدى، مىسالى، بالا ىشتە كىلتتەنىپ نەمەسە مىسىق تەمىر ترۋباعا كەپتەلىپ قالۋى مۇمكىن، سول وقيعالاردى ۇلكەن-كىشى دەمەي بارىندە تەڭ جۇرەمىز. ىزگىلىكتى مۇرات ەتكەن قوعامدا ءبىزدىڭ قىزمەتىمىز دە اسا ماڭىزدى دەپ بىلەمىن" دەدى ول.
كەشتى قورىتىندىلاعان ا.پ.چەحوۆ اتىنداعى ورتالىق قالالىق كىتاپحانانىڭ مەڭگەرۋشىسى اينۇر بالاۋبايەۆا ەڭبەك ادامدارىنىڭ ءار قادامى كوپكە، اسىرەسە جاستارعا ۇلگى ەكەنىن ايتا كەلە، جۇمىسشى ماماندىقتارىنىڭ مارتەبەسىن كوتەرۋگە شاقىردى.
ال وتاندىق ساحنا جۇلدىزدارى – جۇبانىش جەكسەن ۇلى مەن بەيبىتگۇل نۇرىمعوجينا جانى ىزگى مەيماندارعا اننەن شاشۋ شاشتى.
