الماتى قالالىق كارديولوگيالىق ورتالىعىندا العاش رەت جۇرەك ترانسپلانتاسياسى جۇرگىزىلدى. 34 جاستاعى تەرمينالدىق جۇرەك جەتكىلىكسىزدىگى بار ەر ادامعا دونور جۇرەگى ءساتتى جاسالدى، - دەپ حابارلايدى aqshamnews.kz ءتىلشىسى.
دەنساۋلىق ساقتاۋ مينيسترلىگىنىڭ مالىمەتىنشە، الماتى قالاسىنىڭ قالالىق كارديولوگيالىق ورتالىعىندا العاش رەت جۇرەكتى ترانسپلانتاتتاۋ جۇرگىزىلدى. پاسيەنت – تەرمينالدىق سوزىلمالى جۇرەك جەتكىلىكسىزدىگى دياگنوزى قويىلعان 34 جاستاعى ەر ادام رەسيپيەنت بولدى. اۋرۋىنىڭ ۇدەۋىمەن بايلانىستى وعان جۇرەكتى اۋىستىرىپ قوندىرۋ قاجەت بولدى جانە ول رەسپۋبليكالىق جۇرەكتى ترانسپلانتاتتاۋدىڭ كۇتۋ پاراعىنا ەنگىزىلگەن بولاتىن.
دونور – ارتەريالىق گيپەرتەنزيانىڭ اۋىر تۇرىمەن اۋىرىپ، ينسۋلت العان 50 جاستاعى ايەل. ول الماتى قالاسىنىڭ ورتالىق قالالىق كلينيكالىق اۋرۋحاناسىنا شۇعىل جەتكىزىلدى.
كەيىن دارىگەرلەر كونسيليۋمى ونىڭ مي ءولىمىن انىقتاپ، ولىمنەن كەيىن دونور بولۋ مۇمكىندىگىن راستادى. تۋىستارى كەلىسىم بەرگەن سوڭ، دونورلىق ۇدەرىس ۇيىمداستىرىلدى.
بارلىق كەزەڭدەردىڭ ۇيلەستىرۋى مەن ۇيىمداستىرىلۋىن ق ر دسم رەسپۋبليكالىق ترانسپلانتاتتاۋ جانە جوعارى تەحنولوگيالىق مەديسينالىق قىزمەتتەردى ۇيلەستىرۋ ورتالىعى قامتاماسىز ەتتى.
جۇرەكتى ترانسپلانتاتتاۋ بويىنشا وپەراسيا بەس ساعاتتان استام ۋاقىتقا سوزىلىپ، ءساتتى اياقتالدى. جۇرەكتى ترانسپلانتاتتاۋدى قكو ديرەكتورى ەرماعامبەت قۋاتبايەۆ پەن كف UMC كق باسقارما ءتوراعاسى، پروفەسسور يۋ.ۆ. پيانىڭ باسقارۋىمەن الماتى قالالىق كارديولوگيالىق ورتالىق پەن UMC كق (استانا) مۋلتيديسيپلينارلىق كومانداسى ورىندادى. University Medical Center (UMC) كورپوراتيۆتىك قورىنىڭ كومانداسى اقپارات العان بويدا الماتىعا ارىپتەستەرىن قولداۋ ءۇشىن دەرەۋ ۇشىپ كەلدى.
وسى ايدا الماتى قالاسىنىڭ قالالىق كارديولوگيالىق ورتالىعى جۇرەكتى ترانسپلانتاتتاۋدى جۇرگىزۋگە ۋاكىلەتتى مەديسينالىق ۇيىمداردىڭ تىزبەسىنە رەسمي تۇردە ەنگىزىلگەنىن ەسكەرە كەتەيىك.
يۋريي ۆلاديميروۆيچ پيا بۇل ماڭىزدى وقيعامەن ورتالىقتىڭ ۇجىمىن قۇتتىقتاپ، ونىڭ الماتىداعى كارديوحيرۋرگيانىڭ دامۋى ءۇشىن ماڭىزدىلىعىن اتاپ ءوتتى. سونداي-اق ول دونوردىڭ تۋعان-تۋىستارىنا شىنايى كوڭىل ايتىپ، قابىلداعان شەشىمدەرى ءۇشىن العىس ءبىلدىردى. بۇل شەشىم باسقا ادامداردىڭ ءومىرىن ساقتاپ قالۋعا مۇمكىندىك بەردى.
"ترانسپلانتولوگيا باعدارلاماسىنا قاتىسۋ بىزگە پاسيەنتتەرىمىزدىڭ ءومىر ساپاسى مەن ۇزاقتىعىن جاقسارتۋعا قاجەتتى وپەراسيالاردى جۇرگىزۋگە مۇمكىندىك بەرەدى. بۇل باعىت – مەديسينانىڭ دامۋىنىڭ دا، قوعامنىڭ اعزانى ترانسپلانتاتتاۋعا مۇقتاج جاندارعا كومەكتەسۋگە دايىندىعىنىڭ دا كورسەتكىشى"، – دەدى ەرماعامبەت قۋاتبايەۆ.
بۇل – بيىل الماتى قالاسىنىڭ ورتالىق قالالىق كلينيكالىق اۋرۋحاناسىنىڭ بازاسىندا تىركەلگەن ءتورتىنشى مۋلتياعزالىق دونور.