90 جىلدىق تاريحى بار №5 قالالىق كلينيكالىق اۋرۋحانا - ەلىمىزدەگى باس مەديسينالىق مەكەمە.
الماتىداعى №5 قالالىق كلينيكالىق اۋرۋحاناسىندا ءبىر جىل ىشىندە قۇلاق، مۇرىن، جاققا 22 مىڭنان اسا وتا جاسالىپتى، دەپ حابارلايدى Almaty-akshamy.kz.
كۇنى-تۇنى تىنباي ەڭبەك ەتەتىن جاندار اۋىر جاعدايداعى ناۋقاستاردى دا ەمدەيدى. جان اۋىرىپ، سۇيەك سىزداعاندا عانا ءقادىرىن بىلەتىن ماماندىققا قۇرمەت پاندەميادان كەيىن ءتىپتى ەرەكشە بولدى، دەپ جازادى Almaty.tv.
90 جىلدىق تاريحى بار №5 قالالىق كلينيكالىق اۋرۋحانا - ەلىمىزدەگى باس مەديسينالىق مەكەمە. وندا دارىگەرلەر الماتى جانە رەسپۋبليكا بويىنشا ەرەسەكتەر جانە بالالارعا مەديسينالىق شۇعىل كومەك كورسەتىپ، ءتۇرلى دەڭگەيدەگى وتا جاسايدى. اپتانىڭ جەتى كۇنى تاۋلىك بويى تىنباي جۇمىس ىستەيتىن اۋرۋحانانىڭ قابىلداۋ ءبولىمى كۇنىنە 800-دەن اسا ناۋقاس تۇسەدى. دارىگەرلەر بەت-جاق ايماعىنداعى جاراقاتتى، ءىرىڭدى قابىنۋ پروسەستەرىن ەمدەيدى.
«ءار سالانىڭ ءوزىنىڭ قيىندىعى بولادى. ءارتۇرلى جاعداي بولادى. ادامنىڭ ءومىرىن امان الىپ قالۋ ءۇشىن ءبىز بارىمىزدى سالامىز. ول - ءبىزدىڭ باستى پارىزىمىز»، – دەدى №5 قالالىق كلينيكالىق اۋرۋحاناسى قابىلداۋ ءبولىمىنىڭ بەت-جاق حيرۋرگى ايدوس ايمۇحانبەتوۆ.
25 جىلدىق تاجىريبەسى بار ناتاليا گليەۆسكايا دارىگەرلىك ماماندىقتى ەرلىككە بالايدى. ويتكەنى، اق حالاتتى ابزال جان اتانۋ بىلىمدىلىكتى، ىسكەرلىكتى جانە مول تاجىريبەنى تالاپ ەتەدى دەيدى. قوعامداعى ورنى ەرەكشە سانالاتىن، ۇنەمى ىزدەنىستە جۇرەتىن ماماندىق يەسى جۇمىسىن شىن جاقسى كورەتىنىن ايتادى.
«شىنى كەرەك، دارىگەر بولۋدى بالا كەزدەن ارماندادىم. ءقازىر وسى اۋرۋحانادا ەڭبەك ەتەمىن. ءبىز الماتى قالاسى بويىنشا "جەدەل جاردەممەن" جەتكىزىلگەن ناۋقاستاردى قابىلداپ، سونداي-اق جوسپارلى ەم دە جۇرگىزەمىز. وعان قوسا، قازاقستاننىڭ تۇكپىر-تۇكپىرىنەن دە ناۋقاستار ەم ىزدەپ كەلەدى. تاۋلىگىنە 200-دەن اسا بالالارعا شۇعىل كومەك كورسەتەمىز»، – دەدى №5 قالالىق كلينيكالىق اۋرۋحاناسى بالالار قابىلداۋ ءبولىمىنىڭ دارىگەرى ناتاليا گليەۆسكايا.
جاڭاشىلدىققا قاشاندا جانىمىز قۇشتار دەگەن دارىگەرلەر رەسەي، اۆستريا، گەرمانيا، يزرايل جانە اقش كلينيكالارىندا يننوۆاسيالىق تەحنولوگيالاردى مەڭگەرگەن. №5 قالالىق كلينيكالىق اۋرۋحانادا 130 دارىگەر قىزمەت ەتەدى. ولاردىڭ اراسىندا مەديسينا عىلىمدارىنىڭ دوكتورى، "التىن دارىگەر" جانە "دەنساۋلىق ساقتاۋ ۇزدىگى" اتاعىمەن ماراپاتتالعان اق حالاتتى ابزال جاندار بار.