سوڭعى ءۇش جىلدا ەلىمىزدە ۆولونتەرلىك ۇيىمدار سانى 3 ەسەگە ارتتى.
ق ر اقپارات جانە قوعامدىق دامۋ ۆيسە-مينيسترى دانيار قادىروۆتىڭ ايتۋىنشا، ەلدە ۆولونتەرلىك قىزمەتكە قاتىسىپ جۇرگەن ازاماتتار مەن ۇيىمدار قاتارى ارتىپ، باعدارلامالار مەن جوبالار اۋقىمى ايتارلىقتاي كەڭەيە تۇسكەن، دەپ حابارلايدى Almaty-akshamy.kz
«سوڭعى ءۇش جىلدىڭ وزىندە ۆولونتەرلىك ۇيىمدار سانى 3 ەسەگە ارتتى. ماسەلەن، 2019 جىلى 224 بولسا، 2023 جىلى 680-گە جاقىنداپ قالدى. بەلسەندى ۆولونتەرلەر قاتارى 4 ەسەگە كوبەيدى، 2019 جىلى 50 مىڭ ادام بولسا، 2023 جىلى 200 مىڭنان اسقان. ەلىمىزدە زاڭنامالىق دەڭگەيدە ۆولونتەرلەردى قولداۋ شارالارى ەنگىزىلدى. ونىڭ اياسىندا، وقۋعا تاپسىرۋ مەن جۇمىسقا ورنالاسۋ كەزىندە جەڭىلدىكتەر قاراستىرۋ، ۆولونتەرلىك ۇيىمدارعا مەملەكەتتىك مۇلىكتى اقىسىز نەگىزدە جالعا بەرۋ قاراستىرىلعان»، - دەدى دانيار قادىروۆ ورتالىق كوممۋنيكاسيالار قىزمەتىندەگى باسپا ءسوز ءماسليحاتىندا.
ۆولونتەرلىك ينفراقۇرىلىمدى دامىتۋ باعىتىندا ەرىكتىلەردىڭ رەسپۋبليكالىق جانە 20 وڭىرلىك فرونت-وفيستەرى ءوز جۇمىسىن جالعاستىرۋدا. ولار جىل سايىن 113 مىڭنان استام ۆولونتەردىڭ قاتىسۋىمەن 6 مىڭنان استام شارا وتكىزەدى.
«مينيسترلىك حالىقارالىق ۆولونتەرلىكتى دامىتۋ سالاسىندا ءبىرقاتار جۇمىس جۇرگىزۋدە. ۇكىمەتتىڭ تىكەلەي قولداۋىمەن 7 قازاقستاندىق ۆولونتەر بۇۇ ەرىكتىلەر باعدارلاماسىندا جۇمىس اتقارۋدا. مۇنداي مۇمكىندىك الەم بويىنشا 16 مەملەكەتتىڭ ۆولونتەرلەرىنە عانا قولجەتىمدى. قازاقستان ورتالىق ازيا ەلدەرى ىشىندە مۇنداي تاجىريبەنى قولدانعان العاشقى ەل بولدى»، - دەپ اتاپ ءوتتى سپيكەر.