سوت پروسەسى شيەلەنىسە ءتۇستى.
ءبىر كۇن بۇرىن سوتتالۋشى انتيكور قىزمەتكەرلەرىن ادىلەتسىز ارەكەت جاسادى دەپ ايىپتاسا، بۇگىن ءوزىن قورقىتىپ، "ديپلومات" قوناق ءۇيىن باسقا ادامدارعا اتىنا جازىپ بەرۋدى تالاپ ەتكەن ءۇش ادامنىڭ اتىن اتادى، دەپ حابارلايدى Almaty-akshamy.kz.
Ulysmedia.kz اقپاراتىنا جۇگىنسەك، سوت وتىرىسىندا مۇحامەدي ۇلى وزىنە كورسەتىلگەن قوقان-لوقى مەن پسيحولوگيالىق قىسىمعا سىبايلاس جەمقورلىققا قارسى قىزمەتتىڭ قىزمەتكەرى ايدوس تىلەندييەۆ، سونداي-اق تەرگەۋشىلەر رەنات يۋسۋپوۆ پەن ينديرا مامينبايەۆانىڭ قاتىسى بار ەكەنىن مالىمدەدى.
«مەن كەشە ءىس "ديپلومات" قوناق ءۇيىنىڭ مۇددەلەرى بويىنشا قوزعالدى دەگەن مالىمدەمە جاسادىم. مەن ناقتى ايتقىم كەلەدى. رەنات يۋسۋپوۆ ءبىرىنشى كەزدەسۋدە ءبىر عانا سۇراقتى شەشسەڭىز، مۇراجايلار مەن شەرۋگە قاتىستى بارلىق باسقا سۇراقتار الىنىپ تاستالاتىنىن ايتتى»، – دەدى سوتتالۋشى.
ەكس-مينيستردىڭ تىزىمىندە ەكىنشى تەرگەۋشى ينديرا مامينبايەۆا، ءۇشىنشى – سىبايلاس جەمقورلىققا قارسى قىزمەتتىڭ جەدەل قىزمەتكەرى ايدوس تىلەندييەۆ بولدى.
مۇحامەدي ۇلى "ديپلومات" قوناق ءۇيى بويىنشا ءىستى اتالعان ازاماتتار جۇرگىزگەنىن ايتىپ، 111 ميلليون تەڭگە بەرۋگە كوندىرگەن دە سولار ەكەنىن جەتكىزدى.
قورعاۋشىنىڭ ءسوزىن ادۆوكات ايگەرىم انۋاربەك راستادى. ول سىبايلاس جەمقورلىققا قارسى قىزمەت سوتتالۋشىعا قىسىم كورسەتۋدى جالعاستىرىپ جاتقانىن ايتتى.
«ءبىز، ياعني قورعاۋشى تاراپ، بۇگىن ەسەڭگىرەپ قالدىق، ويتكەنى سىبايلاس جەمقورلىققا قارسى قىزمەت ءالى كۇنگە دەيىن مەنىڭ قورعاۋشىما قىسىم كورسەتىپ كەلەدى جانە جالا جابۋ فاكتىسى بويىنشا قىلمىستىق ءىس قوزعايمىز دەپ قورقىتۋدا»، — دەپ اتاپ ءوتتى ول.
ەسكە سالايىق، بۇدان بۇرىن سوت وتىرىسىندا جاۋاپ الۋ كەزىندە ەكس-مينيستر وزىنە قارسى ءىستىڭ ويدان شىعارىلعانىن جانە تەك قارجىلىق مۇددە ءۇشىن، ەڭ الدىمەن، «ديپلومات» قوناق ۇيىنە بايلانىستى قوزعالعانىن ايتقان ەدى.
«انتيكور قىزمەتكەرلەرى مەنىڭ تۋىستارىم «ديپلومات» قوناق ءۇيىن باسقا ادامداردىڭ اتىنا اۋدارسىن دەگەن بىرنەشە ۇسىنىس بەرىلدى» - دەدى ول.
انتيكور "بۇل اقپاراتتىڭ شىندىققا جاناسپايتىنىن" مالىمدەدى.
“مۇحامەديۇلىنا 221 ميلليون تەڭگە جىمقىردى دەگەن ايىپ تاعىلىپ وتىر، ونىڭ قىلمىسقا قاتىسى جينالعان دالەلدەمەلەرمەن راستالدى، ىس-ارەكەتتەردىڭ بىلىكتىلىگى پروكۋراتۋرا ورگاندارىمەن كەلىسىلدى. ونىڭ ارەكەتتەرىنە قورىتىندى باعا سوت ارقىلى بەرىلەدى"، – دەلىنگەن ۆەدومستۆو مالىمدەمەسىندە.