سينگاپۋرلىق تۋريست قىز ىلە الاتاۋى مەملەكەتتىك ۇلتتىق تابيعي پاركىنىڭ اۋماعىندا ورنالاسقان ساتپايەۆ شىڭىنا كوتەرىلگەن كەزدە زارداپ شەكتى. بۇل تۋرالى الماتى قالالىق قۇتقارۋ قىزمەتىنىڭ رەسمي پاراقشاسىندا @109_almaty جاريالاندى.
ساتپايەۆ شىڭى (بۇرىنعى سوۆەتتەر شىڭى) - جوسالى كەزەڭ اسۋىنان سولتۇستىككە قاراي 4317 مەتر بيىكتىكتە ورنالاسقان، ماڭىندا «كوسموستانسيا» عىلىمي ستانساسى بار. ساتپايەۆ شىڭىنا شىعۋ - كۇردەلىلىگى 1ا ساناتىنا جاتاتىن، الپينيستەر ءجيى باراتىن باعىت.
سينگاپۋرلىق تۋريست قىزدى ىزدەپ-تابۋ جانە العاشقى كومەك كورسەتۋ وپەراسياسىنا الماتى №4 قالالىق كلينيكالىق اۋرۋحاناسىنىڭ تراۆماتولوگ-ورتوپەدى كونستانتين موروزوۆ قاتىستى. قۇتقارۋشىلار وقيعا ورنىنا جەتىپ، الماتى قالالىق الپينيزم فەدەراسياسىنىڭ نۇسقاۋشىلارىمەن بىرگە زارداپ شەككەن ادامعا العاشقى مەديسينالىق كومەك كورسەتىپ، ونى تومەن ءتۇسىرۋدى باستادى. كەيىنىرەك ونى اۋرۋحاناعا جەتكىزۋ ءۇشىن «ايۋساي» ۆيزيت-ورتالىعىنان جوعارى ورنالاسقان وتكەلگە جەدەل جاردەم بريگاداسى شاقىرتىلدى.
— سەنبى كۇنى ساتپايەۆ شىڭىنىڭ ەتەگىندە جۇرگەنىمىزدە، تاۋدىڭ ءبىر قيىن تۇسىندا توتەنشە جاعداي بولعانى تۋرالى حابار ءتۇستى. ءبىز الماتى قالالىق الپينيزم فەدەراسياسىنىڭ نۇسقاۋشىلارىمەن دەرەۋ وقيعا ورنىنا بەت الدىق. زارداپ شەككەن ادام مورەنالىق جارتاستان سىرعىپ قۇلاعان ەكەن. جاعدايىن باعالاپ، قاندى توقتاتىپ، جاراسىن تاڭدىق، سودان سوڭ ونى بازالىق لاگەرگە تۇسىردىك. دياگنوزى: جابىق باس-مي جاراقاتى، ماڭداي-سامايىندا سوعىلعان جارا جانە قولدىڭ كوپتەگەن جارالارى. جاعدايى تۇراقتى بولدى. ونى تجم قىزمەتكەرلەرىنە تاپسىردىق، ولار ءوز كەزەگىندە جەدەل جاردەم بريگاداسىنا جەتكىزدى، - دەيدى الماتى №4 قالالىق اۋرۋحاناسىنىڭ تراۆماتولوگ-دارىگەرى كونستانتين موروزوۆ.
ناۋقاس ورتالىق قالالىق كلينيكالىق اۋرۋحاناعا جەتكىزىلىپ، بارلىق قاجەتتى اسپاپتىق تەكسەرۋدەن ءوتتى. ول شۇعىل گوسپيتاليزاسيانى قاجەت ەتپەدى جانە ۇسىنىستارمەن امبۋلاتورلىق ەمدەۋگە جىبەرىلدى.
كونستانتين راشيدوۆيچ - تراۆماتولوگيا مەن ورتوپەديا سالاسىندا 30 جىلدىق تاجىريبەسى بار مامان. ول تاۋلىك بويى جۇمىس ىستەيتىن قابىلداۋ ءبولىمىنىڭ دارىگەرى رەتىندە ەڭ كۇردەلى ۋچاسكەدە قىزمەت اتقارادى. وسى جىلدار ىشىندە ول مىڭداعان شۇعىل جاعدايعا ارالاسقان.
بوس ۋاقىتىندا كونستانتين راشيدوۆيچ ەرىكتى بولىپ ىستەيدى: تاۋلى ايماقتاردا ەكسپەديسيالارعا قاتىسىپ، الپينيستەرگە سەرىك بولادى، تاۋدا العاشقى كومەك كورسەتۋ بويىنشا ساباق وتكىزەدى.
— الپينيزممەن اينالىسقانىما 20 جىلدان استى. تاۋعا ءجيى شىعامىن، ءتۇرلى ەكسپەديسيالارعا قاتىسامىن. الپينيستەرگە جولسەرىك بولامىن، نۇسقاۋشىلارعا العاشقى كومەك كورسەتۋ بويىنشا ءدارىس وقيمىن. العاشقى كومەك قوبديشاسى ۇنەمى وزىممەن بىرگە: بيىكتىككە ارنالعان، جورىققا ارنالعان جانە كەيدە ستاسيونارلىق جيناق تا بولادى. جاڭا تۋريستەر ەڭ كوپ جىبەرەتىن قاتەلىك - ءوز كۇشىن دۇرىس باعالاماۋ جانە قاۋىپسىزدىك ەرەجەلەرىن ەلەمەۋ، - دەپ باسا ايتادى №4 قالالىق كلينيكالىق اۋرۋحانانىڭ دارىگەرى كونستانتين موروزوۆ.
قالالىق قۇتقارۋ قىزمەتى ونىڭ ىزدەستىرۋ-قۇتقارۋ جۇمىسىنا قوسقان ۇلەسىن ەرەكشە اتاپ ءوتتى.