شاھارعا توعىزقۇمالاقتان الەم چەمپيوناتىنا كەلگەن شەتەلدىك دەلەگاسياعا رۋحاني، مادەني-تانىمدىق ساپار ۇيىمداستىرىلعان بولاتىن. ولار قالاداعى كارديولوگيالىق ورتالىققا دا بارىپ، زاماناۋي مەديسينا مەكەمەسىنىڭ تىنىس-تىرشىلىگىمەن تانىستى.
دارىگەرلەر مەيماندارعا يننوۆاسيالىق جاڭا قوندىرعىلاردى، جۇرەك اۋرۋلارىن ەرتە انىقتاۋعا ارنالعان تەحنولوگيالاردى كورسەتتى. شەتەلدىك قوناقتار ورتالىقتىڭ مەديسينالىق مۇمكىندىگىنە جوعارى باعا بەرىپ، قازاقستانداعى، ونىڭ ىشىندە مەديسينالىق ءتۋريزمى ىلگەرىلەپ كەلە جاتقان الماتىنىڭ دەنساۋلىق ساقتاۋ سالاسىنىڭ تىڭ قادامدارىنا ءتانتى بولعانىن جەتكىزدى.
«سىزدەردىڭ تەحنولوگيالىق دامۋ جولىنا ەرەكشە كوڭىل ءبولىپ وتىرعاندارىڭىز قۋانتادى. ورتالىقتاعى كارديولوگيا سالاسىنىڭ ءتۇرلى باعىتقا ءبولىنىپ، مامانداندىرىلعان بولىمدەرمەن جۇمىس ىستەۋى – وتە ماڭىزدى اسپەكت»، – دەدى رۋمىنيا دەلەگاسياسىنىڭ باسشىسى كلاۋديا بالينت.
تاقىرىپقا وراي ايتا كەتسەك، الماتى قالالىق كارديولوگيالىق ورتالىقتا بۇگىندە 585 جوعارى بىلىكتى مامان قىزمەت اتقارادى. ونىڭ 120-عا جۋىعى كارديوحيرۋرگ. سوناۋ 2007 جىلدان بەرى ۇزدىكسىز قىزمەت كورسەتىپ كەلە جاتقان ىرگەلى مەكەمەدە جىل سايىن 550-گە جۋىق اشىق كارديوحيرۋرگيالىق وپەراسيا جاسالادى. سونداي-اق، ورتالىق بيىل رەسمي تۇردە جۇرەك ترانسپلانتاسياسىن جۇرگىزۋ بويىنشا ۋاكىلەتتى مەديسينالىق ۇيىمدار تىزىمىنە ەندى.
«ءبىزدىڭ ورتالىق ناۋقاستاردى جەدەل تۇردە قابىلدايدى. الماتىدا جۇمىس ىستەيتىن، قىدىرىپ كەلگەن جانە باسقا مەملەكەتتەردەن تۋريستىك باعدارلاما بويىنشا كەلگەن ادام ناۋقاستانىپ قالعان جاعدايدا جەدەل تۇردە بىزگە كەلۋىنە، ەمدەلۋىنە بارلىق جاعداي جاسالعانىن ايتىپ ءوتۋ كەرەك. بىزگە وزبەكستان، قىرعىزستان، جۇڭگو جانە رەسەي مەملەكەتتەرىنەن ناۋقاستار ءجيى كەلەدى»، – دەدى قالالىق كارديولوگيالىق ورتالىقتىڭ ديرەكتورى ەرماعامبەت قۋاتبايەۆ