الماتىدا مىڭنان استام جول جۇمىسشىسى مەن 425 تەحنيكا قار تازالاۋعا جۇمىلدىرىلدى
«قازگيدرومەت» رمك دەرەكتەرى بويىنشا، 16 قاڭتار كۇنى ساعات 22:30-دان 17 قاڭتار كۇنى تاڭعى ساعات 08:30-عا دەيىن الماتى قالاسىندا 19 سم قار جاۋدى. قار تازالاۋ جۇمىستارى تاۋلىك بويى جۇرگىزىلەدى، دەپ حابارلايدى almaty-akshamy.kz كوممۋنالدىق ينفراقۇرىلىمدى دامىتۋ باسقارماسىنا سىلتەمە جاساپ.
تۇندە 421 بىرلىك ارنايى تەحنيكا جۇمىس ىستەدى، تاڭەرتەڭ 425 بىرلىك ارنايى تەحنيكا جۇمىلدىرىلدى، ونىڭ ىشىندە 146 قۇم تاراتقىش جانە 1143 جول جۇمىسشىسى. ساعات تۇنگى 02:30-دان باستاپ جول پوليسياسىنىڭ پاترۋلدىك ماشينالارىنىڭ ەرىپ جۇرۋىمەن 13 كولوننا قار كۇرەۋمەن اينالىستى.
تاڭعى ساعات 05.00-دەن باستاپ 168 بىرلىك شاعىن كولەمدى جيناۋ تەحنيكاسىنىڭ كۇشىمەن تروتۋارلار قاردان تازارتىلۋدا، بۇل جۇمىس قازىرگى ۋاقىتقا دەيىن جالعاسۋدا. ايالدامالاردى، جەر ءۇستى وتكەلدەرىنىڭ تۇراق «قالتالارىن»، الەۋمەتتىك ماڭىزى بار وبەكتىلەرگە وتەتىن جولداردى تازارتۋ جۇمىستارى كۇشەيتىلدى.
قالالىق ترافيككە جۇكتەمەنى ازايتۋ ماقساتىندا ساعات 07.00-دەن باستاپ تەحنيكاعا جانارماي قۇيۋ جانە قۇم تاراتقىشتاردى كوكتايعاققا قارسى ماتەريالمەن تولتىرۋ جۇزەگە اسىرىلادى. ساعات 10.30-دان باستاپ جولداردىڭ ءجۇرىس بولىكتەرىن قاردان تازارتۋدىڭ جاڭا سيكلى جانە جينالعان قاردى سىرتقى پوليگوندارعا شىعارۋ باستالادى.
ايتا كەتەرلىگى، ءبىر كۇن بۇرىن سينوپتيكتەر داۋىلدى ەسكەرتۋ جاريالادى، وسىعان بايلانىستى قۇتقارۋشىلار تۇرعىنداردى كوكتايعاق كەزىندە جولداردا وتە ساق جانە مۇقيات بولۋعا شاقىردى.